An Chomhairle Gnóthaí Eachtracha, 20/04/2015, 20 Aibreán 2015

Thug an tAontas freagairt láidir inniu i bhfianaise na dtubaistí a tharla le cúpla lá anuas. Ní mór dúinn gníomhú go tapa agus gníomhú as láimh a chéile.” Federica Mogherini, Ardionadaí an Aontais Eorpaigh 

Na príomhthorthaí

Pléadh na saincheisteanna maidir leis an imirce ag seisiún comhpháirteach idir Airí Gnóthaí Eachtracha agus Airí Gnóthaí Baile, tar éis an méid a tharla le déanaí sa Mheánmhuir. Dúirt Federica Mogherini, Ardionadaí an Aontais Eorpaigh do Ghnóthaí Eachtracha agus don Bheartas Slándála an méid a leanas: "Thug an tAontas freagairt láidir inniu i bhfianaise na dtubaistí a tharla le cúpla lá anuas. Ní mór dúinn gníomhú go tapa agus gníomhú as láimh a chéile.”

Chomhaontaigh na hAirí an comhrac i gcoinne na gáinneála ar dhaoine a atreisiú, gníomh ón Aontas a neartú le beatha daoine ar muir a shábháil agus feabhas a chur ar an tacaíocht a thugtar do thíortha atá ar an túslíne trí athlonnú na dteifeach a roinnt.

Chomh maith leis sin, rachfar i mbun gnímh thaidhleoireachta ionas go ndéanfar níos mó le bunchúiseanna na himirce a réiteach - coinbhleachtaí, an bhochtaineacht agus sáruithe ar chearta an duine san áireamh. Dúirt Rihards Kozlovskis, Aire Gnóthaí Baile na Laitvia: "Táimid, mar an Uachtaránacht, tiomanta do chur chun feidhme an dá bheart a sainaithníodh inniu agus don Chlár Oibre Eorpach maidir leis an Imirce a bheidh ann amach anseo a éascú."

Agus an oiread sin sreafaí imirce ag dul tríd an Libia, chuir na hAirí Gnóthaí Eachtracha an cás sa tír sin san áireamh freisin chomh maith le tacaíocht a d'fhéadfaí a fháil ón Aontas le rialtas ina mbeidh aontacht náisiúnta a bhunú.

Thairis sin, bhí díospóireacht straitéiseach sa Chomhairle faoi chaidreamh an Aontais le Meiriceá Laidineach agus leis an Muir Chairib. Chuir na hAirí béim ar chineál straitéiseach na Comhpháirtíochta le Meiriceá Laidineach agus leis an Muir Chairib agus ar chaidreamh láidir eacnamaíoch. Tá an tAontas ag tnúth le bealaí nua, nuálacha a fhorbairt le dul i mbun comhar leis na stáit sa réigiún, ar comhghuaillithe lárnacha iad agus iarracht á déanamh teacht ar réitigh iltaobhacha ar dhúshláin choiteanna dhomhanda.

Ar deireadh, chuir an Chomhairle in iúl gur cúis mhór imní di an staid in Éimin atá ag dul chun donais go gasta. Mheabhraigh sí nach bhfuil de réiteach ar an ngéarchéim seo ach réiteach polaitiúil agus seasann sí leis an gcomhphobal idirnáisiúnta agus próiseas cuimsitheach polaitiúil á iarraidh acu. Tathantaigh an Chomhairle freisin ar gach taobh rochtain neamhshrianta a thabhairt do sheirbhísí daonnúla fóirithinte, ionas gur féidir cúnamh ríthábhachtach a sholáthar láithreach bonn.

• Toradh chruinniú na Comhairle Gnóthaí Eachtracha