Kunsill Affarijiet Barranin, 20/04/2015, 20 ta' April 2015

Illum, aħna tajna reazzjoni b’saħħitha tal-UE għat-traġedji li rajna f’dawn l-aħħar jiem. Jeħtieġ li naġixxu malajr u naġixxu flimkien. Federica Mogherini, Rappreżentant Għoli tal-UE 

Riżultati prinċipali

Sessjoni konġunta bejn il-ministri għall-affarijiet barranin u dawk għall-intern iddiskutiet kwistjonijiet dwar il-migrazzjoni, wara l-ġrajjiet reċenti fil-Mediterran. Ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà, Federica Mogherini, qalet: "Illum, aħna tajna reazzjoni qawwija tal-UE għat-traġedji li rajna f’dawn l-aħħar jiem. Jeħtieġ li naġixxu malajr u naġixxu flimkien."

Il-ministri qablu li jsaħħu l-ġlieda kontra t-traffikar tal-bnedmin, isaħħu l-azzjoni tal-UE biex jiġu salvati l-ħajjiet fuq il-baħar kif ukoll isaħħu l-appoġġ għall-pajjiżi l-aktar esposti, billi jikkondividu r-risistemazzjoni tar-refuġjati.

Barra minn hekk, ser titwettaq azzjoni diplomatika biex isir aktar sabiex jiġu solvuti l-kawżi fundamentali tal-migrazzjoni, inklużi l-konflitti, il-faqar u vjolazzjonijiet tad-drittijiet tal-bniedem. Rihards Kozlovskis, il-Ministru għall-Intern Latvjan, ikkummenta: "Bħala l-Presidenza aħna impenjati li niffaċilitaw l-implimentazzjoni kemm tal-miżuri identifikati llum kif ukoll l-Aġenda Ewropea li jmiss dwar il-Migrazzjoni."

B’ħafna mill-flussi migratorji għaddejjin mil-Libja, il-ministri għall-affarijiet barranin għamlu rendikont tas-sitwazzjoni f’dak il-pajjiż u l-appoġġ possibbli tal-UE għall-formazzjoni ta’ gvern ta’ unità nazzjonali.

Barra minn hekk, il-Kunsill kellu dibattitu strateġiku dwar ir-relazzjonijiet tal-UE mal-Amerka Latina u l-Karibew. Il-ministri enfasizzaw in-natura strateġika tas-sħubija mal-Amerka Latina u l-Karibew kif ukoll ir-relazzjonijiet ekonomiċi solidi. L-UE hija ħerqana li tiżviluppa modi ġodda u innovattivi ta’ kooperazzjoni mal-istati tar-reġjun, alleati ewlenin fit-tfittxija ta' soluzzjonijiet multilaterali għal sfidi globali komuni.

Fl-aħħar nett, il-Kunsill esprima tħassib serju dwar is-sitwazzjoni li qed tiddeterjora rapidament fil-Jemen. Fakkar li fl-aħħar mill-aħħar is-soluzzjoni għal din il-kriżi għandha tkun waħda politika, f'għaqda mal-appell tal-komunità internazzjonali għal proċess politiku inklużiv. Il-Kunsill ħeġġeġ ukoll lill-partijiet kollha biex jagħtu aċċess bla restrizzjonijiet għas-sokkors u l-għajnuna umanitarja, sabiex tkun tista' tingħata assistenza vitali b' mod immedjat.

• Eżitu tal-laqgħa tal-Kunsill Affarijiet Barranin