An Chomhairle Gnóthaí Eachtracha (Forbairt), 22/05/2018, 22 Bealtaine 2018

Na príomhthorthaí

An caidreamh idir an tAontas agus Ballstáit ACC i ndiaidh 2020

Rinne na hairí breithniú ar an dul chun cinn atá déanta agus treoir ón gComhairle á hullmhú lena gceadaítear don Choimisiún dul i mbun caibidlíochta maidir leis an gcaidreamh a bheidh ann amach anseo idir an tAontas Eorpach agus Stáit san Afraic, sa Mhuir Chairib agus san Aigéan Ciúin (ACC).

Mhol an Chomhairle Uachtaránacht na Bulgáire as an dianobair a rinneadh i gcomhlachtaí ullmhúcháin ábhartha na Comhairle ó foilsíodh i mí na Nollag 2017 moladh an Choimisiúin i leith athchóiriú ar an gcreat atá ann faoi láthair don chomhar le Ballstáit ACC.

Dhearbhaigh an Chomhairle an cuspóir atá aici na treoracha caibidlíochta a thabhairt chun críche a luaithe is féidir, d'fhonn a bheith réidh le tabhairt faoi chaibidlíocht le tíortha comhpháirtíochta ACC faoi mhí Lúnasa 2018, mar atá beartaithe sa chomhaontú reatha, Comhaontú Cotonou.

• Comhaontú Cotonou (faisnéis chúlra)
• Molann an Coimisiún Eorpach dréacht-treoracha caibidlíochta le haghaidh Comhpháirtíocht nuachóirithe leis na tíortha san Afraic, i Muir Chairib agus san Aigéan Chiúin, 12 Nollaig 2017

Ciste iontaobhais éigeandála an Aontais Eorpaigh don Afraic

Phléigh an Chomhairle ciste iontaobhais éigeandála an Aontais Eorpaigh don Afraic. Rinne na hairí breithniú ar chur chun feidhme agus ar phríomh-mhórghníomhartha an chiste, agus ar an staid ina bhfuil an ciste maidir le gnéithe airgeadais, ar bhonn cur i láthair ón gCoimisiún.

Ón 8 Bealtaine 2018, thángthas ar chomhaontú maidir le 147 gclár ar luach iomlán thart ar EUR 2.59 bhilliún roinnte idir na trí limistéar gheografacha - an tSaiheil agus Loch Sead, Corn na hAfraice agus réigiún na hAfraice Thuaidh. Tá an ciste á mhaoiniú ag an Aontas agus ag Ballstáit aonair araon. Ar an iomlán, bhí EUR 3.39 bhilliún d'acmhainní ag an gCiste faoi dheireadh na bliana 2017.

Ionstraimí seachtracha maoinithe a úsáid

Bhí malartú tuairimí ag na hairí maidir leis an mbuiséad cúnaimh don iasacht le haghaidh na tréimhse 2021-2027, ar bhonn na dtograí ón gCoimisiún maidir leis an gcreat airgeadais ilbhliantúil (CAI) amach anseo a tíolacadh ar an 2 Bealtaine.

Molann an Coimisiún clúdach EUR 123 bhilliún a chur i leataobh sa chéad CAI eile chun a bheartas seachtrach a mhaoiniú. Is méadú 26 % é seo i gcomparáid leis an tréimhse reatha.

Ghlac an Chomhairle conclúidí freisin maidir le cur chun feidhme ionstraimí an Aontais chun a gcuid gníomhaíochtaí seachtracha a mhaoiniú in 2016, mar aon le húsáid éifeachtach gach foinse maoinithe agus bealaí cur chun feidhme eile chun an fhorbairt inbhuanaithe a chothú.

• Bileog eolais CAI an Choimisiúin maidir le gníomhaíocht sheachtrach - "an chomharsanacht agus an domhan"
• Conclúidí ón gComhairle maidir le cur chun feidhme ionstraimí na gníomhaíochta seachtraí in 2016
• Conclúidí ón gComhairle maidir le hinfheistíocht san fhorbairt inbhuanaithe

Fuinneamh agus forbairt

Ghlac an Chomhairle conclúidí i dtaca leis na bealaí ar féidir le comhar maidir le fuinneamh inbhuanaithe tacú le clár 2030 maidir le forbairt inbhuanaithe a bhaint amach.

Leagtar béim sna conclúidí ar thrí phríomhchuspóir i réimse an fhuinnimh agus na forbartha: aghaidh a thabhairt ar an easpa rochtana ar fhuinneamh; an éifeachtúlacht fuinnimh agus giniúint an fhuinnimh in-athnuaite a mhéadú; agus cur leis an gcomhrac i gcoinne na hathraithe aeráide, i gcomhréir le comhaontú Páras.