An Chomhairle Gnóthaí Eachtracha (Trádáil), 22/5/2018, 22 Bealtaine 2018

Na príomhthorthaí

An caidreamh leis na príomh‑chomhpháirtithe trádála

Bhreathnaíomar inniu ar an dul chun cinn atá á dhéanamh sa chaibidlíocht trádála le roinnt tíortha tábhachtacha. Léirítear cé chomh tábhachtach atá an trádáil dhomhanda don Aontas leis an gclár mór oibre atá againn. Is den riachtanas é idirphlé oscailte, cuiditheach a choinneáil ar siúl lenár gcuid comhpháirtithe. Is uirlis riachtanach í an tsaorthrádáil chun fás domhanda a bhaint amach, trí na deiseanna nua eacnamaíochta a bhaintear amach agus an feabhas a chuirtear ar an gcomhar straitéiseach. Emil Karanikolov, Aire Geilleagair na Bulgáire

An Astráil agus an Nua-Shéalainn

Tá cead tugtha ag an gComhairle don Choimisiún tús a chur leis an gcaibidlíocht trádála leis an Astráil agus leis an Nua-Shéalainn. Ghlac na hairí leis na treoracha caibidlíochta do gach ceann de na próisis chaibidlíochta.

Is ar bhacainní ar an trádáil a laghdú, ar dhleachtanna custaim ar earraí a bhaint agus ar rochtain níos fearr a fháil ar sheirbhísí agus ar sholáthar poiblí san Astráil agus sa Nua-Shéalainn is mó a dhíreofaí sna comhaontuithe trádála leis an dá thír.

• Tá cead tugtha ag an gComhairle do chaibidlíocht trádála leis an Astráil agus leis an Nua-Shéalainn (preaseisiúint, 22/5/2018)

An tSeapáin agus Singeapór

Bhí malartú tuairimí ag an gComhairle maidir le comhaontuithe saorthrádála leis an tSeapáin agus le Singeapór, agus maidir le comhaontú cosanta infheistíochta le Singeapór, ar bhonn na moltaí a ghlac an Coimisiún ar an 18 Aibreán 2018.

Chuir na hairí béim ar thábhacht eacnamaíoch agus straitéiseach na gcomhaontuithe leis an dá chomhpháirtí agus dúirt siad gur cheart leanúint leis an dianobair go síneofaí iad agus go dtabharfaí i gcrích iad. Is é an aidhm atá ann go gcuirfí an dá chomhaontú chun feidhme i rith na bliana 2019.

Thug an Coimisiún faisnéis don Chomhairle freisin maidir leis an dul chun cinn atá á dhéanamh i gcaibidlíocht trádála eile atá ar siúl faoi láthair, go háirithe le Meicsiceo, le Mercosur, leis an tSile agus le Vítneam.

Le linn an lóin, phléigh na hairí na himeachtaí is déanaí i gcaidreamh trádála an Aontais Eorpaigh leis na Stáit Aontaithe.

Comhdhéanamh nua na gcomhaontuithe trádála

Ghlac an Chomhairle conclúidí maidir le caibidlíocht agus cur i gcrích chomhaontaithe trádála an Aontais. Sna conclúidí leagtar amach na príomhphrionsabail a bheidh mar bhonn le cur chuige na Comhairle i leith na caibidlíochta trádála as seo amach.

Dírítear sna conclúidí go háirithe ar an rún atá ag an gCoimisiún a mholadh go ndéanfaí forálacha a bhaineann leis an infheistíocht agus forálacha trádála eile a chur i gcomhaontuithe ar leith agus dírítear freisin ar ról na Comhairle sa chaibidlíocht trádála.

• Cur chuige nua glactha ag an gComhairle maidir le comhaontuithe trádála de chuid an Aontais a chaibidliú agus a chur i gcrích (preaseisiúint, 22/5/2018)