An Chomhairle um Ghnóthaí Ginearálta, 11 Feabhra 2014

Díreoidh Comhairle Eorpach an Earraigh ar an ngeilleagar, ar an athrú aeráide agus ar chaidreamh AE-na hAfraice

D'ullmhaigh an Chomhairle Gnóthaí Eachtracha cruinniú na Comhairle Eorpaí a bheidh ar siúl an 20 agus an 21 Márta.

Sa chruinniú a bheidh ag ceannairí stáit nó rialtais AE a bheidh ar siúl, díreofar ar an dá phríomhábhar a leanas:

• fás, iomaíochas agus poist
• caidreamh seachtrach.

Faoin gcéad ábhar, tabharfaidh an Chomhairle Eorpach i gcrích an chéad chéim de Sheimeastar Eorpach 2014: déanfaidh sí measúnú ar an dul chun cinn a baineadh amach ó thaobh na moltaí a bhaineann go sonrach le tír faoi leith a chur chun feidhme, ar moltaí iad a tugadh do na Ballstáit in 2013, agus cuirfidh sí treoir ar fáil do na Ballstáit maidir lena gclár Cobhsaíochta 2014 nó a gclár um Chóineasú agus a gclár náisiúnta um athchóiriú a ullmhú.

De bhreis air sin, cuirfidh na ceannairí béim láidir ar roinnt saincheisteanna a bhaineann le hiomaíochas tionsclaíoch, amhail costas an fhuinnimh sa táirgeadh tionsclaíoch, an mí-oiriúnú scileanna, an fhorbairt bhonneagair, an paitinniú, slabhraí luacha domhanda.

Tionólfaidh siad díospóireacht beartais freisin maidir le creat don aeráid agus don fhuinneamh in 2020-2030.

Díreofar sa phlé maidir le caidreamh seachtrach ar an ullmhúchán atá á dhéanamh do chruinniú mullaigh AE-na hAfraice a bheidh ar siúl an 2 agus an 3 Aibreán. Tionólfaidh na ceannairí díospóireacht ina bpléifear go mion caidreamh AE leis an Afraic.

Príomhábhair eile ar an gclár oibre

An Eilvéis

Thionóil na hAirí plé maidir le toradh reifrinn a reáchtáladh san Eilvéis thar an deireadh seachtaine. D'iarr an Chomhairle ar an Eilvéis na hoibleagáidí atá uirthi maidir le saorghluaiseacht saoránach a urramú.

"Urramaíonn Comhairle an Aontais Eorpaigh nósanna imeachta daonlathacha inmheánacha na hEilvéise agus toradh an reifrinn. Ar an taobh eile, tá súil ag an gComhairle go n-urramóidh Cónaidhm na hEilvéise na hoibleagáidí atá uirthi a eascraíonn as na comhaontuithe agus na conarthaí atá aici leis an Aontas Eorpach", a dúirt Evangelos Venizelos, Leas-Phríomh-Aire agus Aire Gnóthaí Eachtracha na Gréige a bhí mar chathaoirleach ar an gcruinniú.

An togra maidir le hArbhar Indiach géinmhodhnaithe a chur ar an margadh

Níor tháinig an Chomhairle ar chomhaontú go fóill, i bhfabhar nó i gcoinne an togra ón gCoimisiún, lena n-údarófaí táirge arbhair (Zea mays L., líne 1507) a chur ar an margadh lena shaothrú; déantar an táirge arbhair a ghéinmhodnú mar go bhfuil sé frithsheasmhach in aghaidh lotnaidí áirithe féileacán (lepidoptera).

Ceanglaítear leis na rialacha go ndéanfaidh an Coimisiún cinneadh i gcásanna den chineál sin.

Clár oibre Uachtaránacht na Gréige

Chur Uachtaránacht na Gréige a clár oibre i láthair, agus phléigh an Chomhairle é.

Ceapachán Leas-Chathaoirleach an Bhoird Maoirseachta deBCE

Ghlac an Chomhairle cinneadh lena gceaptar Sabine Lautenschläger mar leas-Chathaoirleach an bhoird maoirseachta den Bhanc Ceannais Eorpach a cruthaíodh le déanaí.

Treoracha le haghaidh athchóiriú ar an soláthar poiblí a ghlacadh

Ghlac na hAirí na treoracha lena ndírítear ar an soláthar poiblí in AE a nuachóiriú. Cuirfear feabhas leo ar raon leathan réimsí a bhaineann leis an soláthar earraí, oibreacha agus seirbhísí.