Kunsill Affarijiet Ġenerali, 11 ta' Frar 2014

Il-Kunsill Ewropew tar-Rebbiegħa ser jikkonċentra fuq l-ekonomija, il-klima u r-relazzjonijiet bejn l-UE u l-Afrika

Il-Kunsill Affarijiet Ġenerali ħejja għal-laqgħa li jmiss tal-Kunsill Ewropew, li ser issir fl-20 u l-21 ta' Marzu.

Il-laqgħa li ġejja tal-kapijiet ta' stat jew ta' gvern tal-UE ser tiffoka fuq żewġ suġġetti ewlenin:

• it-tkabbir, il-kompetittività u l-impjiegi
• ir-relazzjonijiet esterni.

Taħt l-ewwel suġġett, il-Kunsill Ewropew ser jikkonkludi l-ewwel fażi tas-Semestru Ewropew tal-2014: ser jivvaluta l-progress li sar fl-implimentazzjoni tar-rakkomandazzjonijiet speċifiċi għall-pajjiżi li ngħataw lill-istati membri fl-2013 u ser jagħtihom gwida dwar it-tħejjija tal-Programmi ta' stabbiltà tagħhom għall-2014 jew il-Programmi ta' konverġenza tagħhom u l-Programmi nazzjonali ta' riforma tagħhom.

Barra minn hekk, il-mexxejja ser jissottolinjaw għadd ta' kwistjonijiet marbutin mal-kompetittività industrijali, bħall-ispiża għall-enerġija fil-produzzjoni industrijali, id-diskrepanza fil-ħiliet, l-iżvilupp tal-infrastruttura, il-ħruġ ta' privattivi, il-ktajjen globali ta' valur.

Ser ikollhom ukoll dibattitu ta' orjentazzjoni dwar qafas għall-klima u l-enerġija fl-2020-2030.

Id-diskussjoni dwar ir-relazzjonijiet barranin ser tikkonċentra fuq it-tħejjijiet għas-summit li ġej bejn l-UE u l-Afrika, li ser isir fit-2 u t-3 ta' April. Il-mexxejja ser jiddiskutu fid-dettall ir-relazzjonijiet tal-UE mal-Afrika.

Punti ewlenin oħrajn fuq l-aġenda

L-Isvizzera

Il-ministri kellhom diskussjoni dwar ir-riżultat ta' referendum fl-Isvizzera li sar fi tmiem il-ġimgħa. Il-Kunsill appella lill-Isvizzera biex tirrispetta l-obbligi tagħha marbutin mal-moviment liberu taċ-ċittadini.

"Il-Kunsill tal-Unjoni Ewropea jirrispetta l-proċeduri demokratiċi interni tal-Isvizzera u r-riżultat tar-referendum. Min-naħa l-oħra, il-Kunsill jistenna li l-Konfederazzjoni Svizzera tonora l-obbligi tagħha li joħorġu mill-ftehimiet u t-trattati tagħha mal-Unjoni Ewropea," qal is-Sur Evangelos Venizelos, il-Viċi Prim Ministru u Ministru tal-Affarijiet Barranin Grieg, li ppresieda l-laqgħa.

Proposta dwar it-tqegħid fis-suq ta' qamħirrum ġenetikament modifikat

Il-Kunsill ma laħaq ebda qbil, la favur u lanqas kontra l-proposta tal-Kummissjoni, li tkun tawtorizza t-tqegħid ta' prodott tal-qamħirrum (Zea mays L., linja 1507) fis-suq għall-kultivazzjoni; il-prodott tal-qamħirrum huwa ġenetikament modifikat biex jirreżisti ċerti organiżmi ta' ħsara lepidopteri (friefet).

Ir-regoli jitolbu li d-deċiżjoni tittieħed mill-Kummissjoni f'każijiet bħal dawn.

Programm ta' ħidma tal-Presidenza Griega

Il-Presidenza Griega ppreżentat il-programm tagħha, li ġie diskuss mill-Kunsill.

Jinħatar il-viċi president tal-bord superviżorju tal-BĊE

Il-Kunsill adotta deċiżjoni li taħtar lil Sabine Lautenschläger bħala viċi president tal-bord superviżorju li għadu kif inħoloq tal-Bank Ċentrali Ewropew.

Adozzjoni ta' direttivi għar-riforma tal-akkwist pubbliku

Il-ministri adottaw id-direttivi li għandhom l-għan li jimmodernizzaw l-akkwist pubbliku fl-UE. Dawn ser itejbu firxa wiesgħa ta' oqsma li japplikaw għall-akkwist ta' prodotti, xogħlijiet u servizzi.