An Chomhairle Iompair, Teileachumarsáide agus Fuinnimh (Iompar), 06/06/2019, 6 Meitheamh 2019

Na príomhthorthaí

Chomhaontaigh an Chomhairle a seasamh (cur chuige ginearálta) maidir le togra chun an earnáil iompair a dhéanamh níos éifeachtúla trí chreat dlíthiúil aonfhoirmeach a bhunú d'úsáid agus tarchur faisnéis leictreonach faoi iompar lastais.

• Úsáid níos éasca a bhaint as faisnéis dhigiteach d'iompar lastais - a seasamh comhaontaithe ag an gComhairle (preaseisiúint, 6/6/2019)

Is díol sásaimh dom seasamh na Comhairle a comhaontaíodh inniu maidir le faisnéis dhigiteach faoi iompar lastais, faisnéis a chuirfidh le héifeachtúlacht an mhargaidh. Bhreithníomar freisin an dul chun cinn suntasach a baineadh amach i roinnt tograí eile laistigh de thréimhse an-ghairid. Is léiriú é an líon mór comhaontuithe tábhachtacha ar thángthas orthu leis an bParlaimint go raibh éifeacht lenár n-iarrachtaí beart a dhéanamh sna réimsí is mó tábhacht. Răzvan Cuc, Aire Iompair na Rómáine agus cathaoirleach ar chruinniú na Comhairle

Thug an Chomhairle dá haird an dul chun cinn atá déanta i leith togra chun bearta deonaithe ceadanna a shruthlíniú d'fhonn tabhairt chun críche an ghréasáin tras-Eorpaigh iompair (TEN-T) a éascú.

Rinne an Chomhairle measúnú ar an dul chun cinn atá déanta i leith togra chun creat soiléir rialála a bhunú do mhargadh na bhfeithiclí arna bhfruiliú agus chun srianta a laghdú ar fheithiclí fruilithe a úsáid san iompar idirnáisiúnta.

Bhreithnigh na hairí dul chun cinn atá déanta i leith togra chun rialacha muirearaithe bóithre an Aontais (Eurovignette) a athrú, lena dtabharfar aghaidh ar shaincheisteanna a bhaineann le maoiniú don bhonneagar bóithre, brú tráchta agus astaíochtaí gás ceaptha teasa.

Rinne an Chomhairle measúnú ar an dul chun cinn atá déanta i leith dréachtrialachán lena ndéanfar cearta paisinéirí iarnróid a athbhreithniú.

I measc líon mór ábhar eile faoi 'aon ghnó eile' fuarthas faisnéis ón uachtaránacht maidir leis an líon mór sainchomhad a comhaontaíodh le Parlaimint na hEorpa faoi uachtaránacht na Rómáine ar cheisteanna amhail sábháilteacht bonneagair bhóithre a bhainistiú, timpeallacht Ionaid Ilfhreastail Mhuirí Eorpaigh, oiliúint maraithe, feithiclí glana agus tíosach ar fhuinneamh, cábáin aeraidinimiciúla, agus an tSaoráid um Chónascadh na hEorpa. Chuir uachtaránacht na Rómáine na hairí ar an eolas maidir le stádas an togra maidir le hathruithe ama séasúracha. Thíolaic uachtaránacht nua na Fionlainne a clár oibre.

Ar imeall chruinniú na Comhairle, bhí cruinniú aireachta Chomhpháirtíocht an Oirthir ar an iompar inar pléadh comhar maidir le sábháilteacht agus bonneagar bóithre. Formhuiníodh ag an gcruinniú dearbhú comhpháirteach maidir le comhar réigiúnach i réimse an iompair faoi chuimsiú Chomhpháirtíocht an Oirthir i gcomhthéacs chomóradh 10 mbliana Chomhpháirtíocht an Oirthir.

• Dearbhú Comhpháirteach Chomhpháirtíocht an Oirthir - an clár oibre don chomhar iompair a thabhairt chur chun cinn