Tacaíocht d’fhiontair bheaga agus mheánmhéide (FBManna)

FBManna san Eoraip

Is ionann na 34 mhilliún FBM Eorpach agus 99.8 % de na gnólachtaí uile agus cuireann siad thart ar dhá thrian den fhostaíocht ar fáil san Aontas.

Tá FBManna lárnach i gcreatlach eacnamaíoch agus shóisialta na hEorpa agus tacaíonn siad le rathúnas agus iomaíochas fadtéarmach.

Chun go meastar gur FBM atá ann, ní mór na critéir seo a leanas a shásamh:

Straitéis an Aontais chun tacú le FBManna

Is mian leis an Aontas tacú le FBManna agus iad a chumhachtú, gan beann ar a méid agus ar an earnáil lena mbaineann siad.

Tá sé ag obair chun FBManna a dhéanamh níos iomaíche agus níos athléimní trí aghaidh a thabhairt ar na príomhdhúshláin oibríochtúla atá rompu:

• an t-ualach riaracháin agus bacainní rialála
• moilleanna ar íocaíochtaí
• fadhbanna le teacht ar mhaoiniú
• easpa oibrithe oilte agus bainisteoirí a bhfuil taithí acu

Ó mhí Feabhra 2025, mar fhreagairt ar iarraidh ar shimpliú ón gComhairle Eorpach, tá plé á dhéanamh ag an Aontas ar shraith tograí maidir le simpliú, ar a dtugtar ‘pacáistí omnibus’, agus tá siad á nglacadh aige freisin, chun go mbeidh rath ar ghnólachtaí an Aontais, agus go háirithe FBManna, agus go gcothófar timpeallacht infheistíochta níos nuálaí.

An t-ualach riaracháin a laghdú

I bhFlais-Eorabharaiméadar i mí Iúil 2025, thuairiscigh 64 % de FBManna gur dúshlán leanúnach iad an t-ualach riaracháin agus bacainní rialála. Tá an tAontas ag obair go gníomhach chun dul i ngleic leis an tsaincheist sin.

An ceanglas tuairiscithe a chuíchóiriú

Tá sé ríthábhachtach go gcinnteofar comhlíonadh na reachtaíochta chun faireachán agus forfheidhmiú éifeachtach a dhéanamh. Mar sin féin, d’fhéadfadh na ceanglais tuairiscithe ghaolmhara a bheith dian, costais a thabhú agus bac a chur ar fhás gnólachtaí, go háirithe FBManna.

D’fhéadfadh sé go mbeadh deis ann oibleagáidí tuairiscithe a shimpliú chun an brú ar FBManna a mhaolú.

Ó bhí mí Feabhra 2025 ann, tá roinnt tograí maidir le simpliú a thíolaic an Coimisiún glactha ag an Aontas chun costais riaracháin agus ceanglais tuairiscithe ar ghnólachtaí an Aontais a laghdú.

Áirítear ar na spriocanna nithiúla costais agus oibleagáidí tuairiscithe a laghdú 35% ar a laghad i gcás FBManna faoi 2030.

An claochlú digiteach a mhéadú

Tá an tAontas ag obair go gníomhach chun digiteáil FBManna a mhéadú. Fágann an digiteáil go mbíonn próisis riaracháin FBManna níos inacmhainne, níos tapúla agus níos éadroime.

I mí na Nollag 2024, ghlac an tAontas rialacha nua chun an úsáid a bhaintear as uirlisí agus próisis dhigiteacha i ndlí na gcuideachtaí a leathnú agus a uasghrádú a thuilleadh.

Leis na rialacha nua:

• moltar úsáid a bhaint as ‘prionsabal na haonuaire’ (cuid den Tairseach Aonair Dhigiteach) agus fochuideachtaí agus brainsí á mbunú i mBallstát eile
• deimhniú ilteangach cuideachta AE a thabhairt isteach
• deireadh a chur le foirmiúlachtaí, mar shampla an gá atá le hapastaile ar dhoiciméid chuideachta trí chumhacht aturnae dhigiteach an Aontais a úsáid i nósanna imeachta trasteorann

A bhuí leis na bearta beidh an gnó trasteorann níos tapúla, níos éasca agus níos trédhearcaí.

• Treoir lena ndéantar dlí na gcuideachtaí a uasghrádú don ré dhigiteach glactha ag an gComhairle (preaseisiúint, an 16 Nollaig 2024)

Simpliú cánach

Mhol an Coimisiún córas cánach ceannoifige a bhunú do FBManna chun cur ar a gcumas dóibh siúd a oibríonn thar theorainneacha déileáil le riarachán cánach amháin, seachas iallach a bheith orthu córais cánach éagsúla a urramú.

Tá an togra sin á scrúdú faoi láthair ag an gComhairle. Ní mór do na Ballstáit uile teacht ar chomhaontú d’aon toil, tar éis dul i gcomhairle leis an bParlaimint.

• Córas Cánach Ceannoifige do FBManna, togra ón gCoimisiún, an 13 Meán Fómhair 2023

Thairis sin,ón 1 Eanáir 2025, beidh rialacha nua CBL i bhfeidhm, rud a chiallaíonn go mbeidh earraí agus seirbhísí a sholáthraíonn gnólachtaí beaga incháilithe de thionscnamh Ballstáit eile, agus an Bhallstáit bunaíochta, díolúinte ó CBL.

• Rialacha CBL d’fhiontair bheaga (an Coimisiún Eorpach)

An teacht ar mhaoiniú

Íocaíochtaí déanacha a chomhrac

Bíonn tionchar diúltach ar leith ar FBManna ag íocaíocht dhéanach sonrasc toisc go mbraitheann siad ar shruthanna rialta intuartha airgid thirim agus gur lú an teacht a bhíonn acu ar leachtacht ná mar a bhíonn ag gnólachtaí móra.

Chun gnólachtaí Eorpacha, go háirithe FBManna, a chosaint, mhol an Coimisiún Eorpach gur cheart athbhreithniú a dhéanamh ar an treoir maidir le híocaíochtaí déanacha. Le laghdú ar íocaíochtaí déanacha, meastar go dtarlóidh an méid seo a leanas:

• cuirfear ar chumas FBManna infheistíocht a dhéanamh sa nuálaíocht
• cuirfear laghduithe costais ar aghaidh chuig tomhaltóirí
• méadófar cinnteacht do ghnólachtaí

Tá an togra á athbhreithniú faoi láthair ag an gComhairle agus ag an bParlaimint, ina gcáil mar chomhreachtóirí.

• Rialachán maidir le híocaíochtaí déanacha, togra ón gCoimisiún, an 14 Meán Fómhair 2023

  Níl an acmhainn seo ar fáil faoi láthair ach amháin sa teanga (sna teangacha) seo a leanas:

  EN

Teacht na FBManna ar mhaoiniú a fheabhsú

Meastar go mbeidh an tacaíocht fhoriomlán do FBManna cothrom le níos mó ná €200 billiún faoi 2027 trí chláir chistiúcháin an Aontais.

Beidh FBManna in ann teacht ar chistiú freisin tríd an ardán nua-chomhaontaithe um theicneolaíochtaí straitéiseacha don Eoraip. Tá sé d’aidhm leis an ardán um Theicneolaíochtaí Straitéiseacha don Eoraip, a cruthaíodh mar chuid den athbhreithniú ar bhuiséad fadtéarmach an Aontais 2021-2027, breis deiseanna tacaíochta agus infheistíochta a chur chun cinn le haghaidh teicneolaíochtaí criticiúla atá ábhartha don aistriú glas agus don aistriú digiteach.

• Rialachán maidir le híocaíochtaí déanacha, togra ón gCoimisiún, an 14 Meán Fómhair 2023

Liostaí ar stocmhalartáin na hEorpa

Ba mhaith leis an Aontas é a dhéanamh níos fusa do chuideachtaí idir bheag agus mhór, agus do FBManna chomh maith, a bheith liostaithe ar stocmhalartáin na hEorpa.

Mar chuid d’Aontas na Margaí Caipitil, le cruthú ‘margaí fáis FBManna’, ionaid trádála atá dírithe ar eisitheoirí beaga, is saoire agus is éasca do FBManna í an rochtain ar mhargaí poiblí.

Chun an rochtain a fheabhsú a thuilleadh, ghlac an Chomhairle an gníomh um liostú i mí Dheireadh Fómhair 2024 arb é is aidhm dó an méid seo a leanas a dhéanamh:

• an rómhaorlathas agus na costais a laghdú chun cabhrú le cuideachtaí an Aontais rochtain a fháil ar níos mó foinsí maoiniúcháin
• úinéirí cuideachtaí a spreagadh chun scaireanna a gcuideachta a liostú den chéad uair trí úsáid a bhaint as struchtúr scaireanna ilvótaí

• Liostaí ar stocmhalartáin na hEorpa: an gníomh um liostú glactha ag an gComhairle (preaseisiúint, an 8 Deireadh Fómhair 2024)

An teacht ar oibrithe oilte

Tá an tAontas ag tacú le forbairt agus neartú scileanna iomchuí, i gcomhar leis na Ballstáit agus leis na páirtithe leasmhara, trí chláir éagsúla, lena n-áirítear an clár oibre Eorpach um scileanna, comhshocrú an Aontais maidir le scileanna agus na hacadaimh um scileanna glan-nialasacha a bheidh ann amach anseo.

Linn Tallainne an Aontais

Chun cabhrú le FBManna tallann a mhealladh ó thar lear, bunóidh an tAontas faoi 2027 linn tallainne an Aontais, ardán ar líne a mheaitseálfaidh folúntais phoist fostóirí atá bunaithe san Aontas le próifílí cuardaitheoirí poist ó thríú tíortha atá ina gcónaí lasmuigh den Aontas.

Is é cuspóir an Aontais margadh saothair an Aontais a dhéanamh níos iomaíche agus dul i ngleic le ganntanais i margadh an tsaothair.

Is ar bhonn deonach a bheidh rannpháirtíocht na mBallstát i linn tallainne an Aontais.

• An solas glas deiridh tugtha ag an gComhairle d'ardán tallainne an Aontais le haghaidh cuardaitheoirí poist as tíortha lasmuigh den Aontas (preaseisiúint, an 30 Márta 2026)

Rialacha corparáideacha comhchuibhithe

I míonna an Mhárta agus Dheireadh Fómhair 2025, d’iarr an Chomhairle Eorpach ar an gCoimisiún an 28^ú córas roghnach um dhlí na gcuideachtaí a mholadh gan mhoill lena bhféadfadh cuideachtaí nuálacha uas-scálú a dhéanamh agus é mar aidhm an gnó san Eoraip a dhéanamh níos éasca agus níos tapúla.

I mí an Mhárta 2026, chuir an Coimisiún síos togra le haghaidh rialachán maidir leis an 28ú córas den chreat dlíthiúil corparáideach lena dtugtar isteach foirm dhlíthiúil dhigiteach chomhchuibhithe, 'EU Inc.' is féidir le bunaitheoirí agus cuideachtaí a roghnú a úsáid chun tús agus dlús a chur le gnólachtaí san Eoraip, seachas a bheith ag plé le córais náisiúnta éagsúla. Ar na príomhghnéithe tá:

• corprú digiteach laistigh de 48 uair an chloig sna Ballstáit uile
• nósanna imeachta dócmhainneachta níos tapúla agus digiteacha
• cánachas comhchuibhithe ar scair-roghanna fostaithe

Tá an togra á athbhreithniú faoi láthair ag an gComhairle agus ag an bParlaimint, ina gcáil mar chomhreachtóirí.

• Rialachán maidir leis an 28ú córas den chreat dlíthiúil corparáideach, togra ón gCoimisiún, an 18 Márta 2026

Féach freisin