Kunsill Agrikoltura u Sajd, 14/05/2019, 14 ta' Mejju 2019

Riżultati ewlenin

Pakkett ta' riforma tal-Politika Agrikola Komuni (PAK) għal wara l-2020

Il-mudell ta' implimentazzjoni ġdid huwa l-qalba tar-riforma tal-PAK u l-aspett l-aktar innovattiv tagħha. Bis-saħħa ta' din il-bidla fil-qafas ta' ħsieb l-istati membri ser ikollhom vuċi akbar fit-tfassil tal-politiki nazzjonali tagħhom, iżda wkoll ser ikollhom aktar responsabbiltà. Il-progress fid-diskussjonijiet tagħna dwar dan l-aspett ser jgħinna niddefinixxu l-pożizzjoni tal-Kunsill dwar il-pakkett ta' riforma kollu kemm hu. Petre Daea, Ministru għall-Agrikoltura u l-Iżvilupp Rurali tar-Rumanija u President tal-Kunsill

Il-Kunsill kellu skambju ta' fehmiet f'sessjoni pubblika dwar il-mudell ta' implimentazzjoni ġdid tal-pakkett ta' riforma tal-PAK għal wara l-2020 fuq il-bażi ta' dokument tal-presidenza. Il-ministri ffokaw l-interventi tagħhom fuq ir-rappurtar ta' objettivi intermedji u analiżi tal-prestazzjoni, u l-possibbiltà ta' stabbiliment ta' ammonti unitarji għal interventi mhux ibbażati fuq is-superfiċje/l-annimali.

• Il-futur tal-PAK wara l-2020 (informazzjoni ġenerali)

Pjaneta Nadifa għal Kulħadd

Il-ġimgħa li għaddiet f'Sibiu l-mexxejja tagħna tennew l-urġenza li nindirizzaw b'mod kollettiv it-tibdil fil-klima. Minkejja li l-objettiv primarju tal-agrikoltura huwa li tiżgura s-sigurtà tal-ikel għall-Ewropa, l-agrikoltura u l-forestrija jistgħu jikkontribwixxu biex jilħqu l-miri ambjentali ambizzjużi tal-UE. Illum iddiskutejna kif nagħtu s-setgħa u ngħammru lill-bdiewa tagħna biex jilqgħu din l-isfida. Petre Daea, Ministru għall-Agrikoltura u l-Iżvilupp Rurali tar-Rumanija u President tal-Kunsill

Il-Kunsill ġie infurmat dwar l-aspetti agrikoli tal-komunikazzjoni tal-Kummissjoni ''Pjaneta nadifa għal kulħadd, u kellu skambju ta' fehmiet dwarhom: Viżjoni strateġika Ewropea fit-tul għal ekonomija għanja, moderna, kompetittiva u newtrali għall-klima".

Il-ministri ffukaw b'mod partikolari fuq l-azzjonijiet ta' prijorità li għandhom jitwettqu fil-livell tal-UE u dak nazzjonali fil-qasam tal-agrikoltura u l-forestrija biex jikkontribwixxu għall-kisba tal-miri tal-ftehim ta' Pariġi sal-2050.

• Pjaneta Nadifa għal kulħadd: Viżjoni strateġika Ewropea fit-tul għal ekonomija għanja, moderna, kompetittiva u newtrali għall-klima - aspetti agrikoli

Kwistjonijiet agrikoli relatati mal-kummerċ

Il-Kummissjoni aġġornat lill-Kunsill dwar il-prestazzjoni tal-kummerċ agrikolu tal-UE. Hija rrapportat b'mod partikolari dwar l-aħħar żviluppi fl-inizjattiva diplomatika tagħha biex tippromwovi l-prodotti agrikoli Ewropej madwar id-dinja, kif ukoll dwar in-negozjati kummerċjali li jew ġew konklużi inkella li għadhom għaddejjin, u li għandhom impatt fuq l-agrikoltura tal-UE. Dawn jinkludu: Il-Mercosur, l-Awstralja u New Zealand.

Il-ministri kellhom l-opportunità li jiskambjaw fehmiet u jirriflettu fuq il-kwistjonijiet sensittivi, kif ukoll il-prijoritajiet u l-benefiċċji, għall-agrikoltura tal-UE fil-kuntest tan-negozjati dwar il-kummerċ ħieles, li għaddejjin u li ġejjin, li qed jitwettqu mill-UE.

Suġġetti oħra fl-aġenda

Il-ministri ġew infurmati wkoll dwar:

• ir-regolament dwar il-Fond Ewropew għall-Affarijiet Marittimi u s-Sajd futur
• is-segwitu tad-deċiżjoni tal-Qorti tal-Ġustizzja tal-Unjoni Ewropea dwar organiżmi miksuba permezz ta' mutagenesis
• is-sitwazzjoni fis-settur tal-frott