Sajd
Tgħallem dwar ir-regoli tal-UE għall-ġestjoni sostenibbli tal-istokkijiet tal-ħut u l-prevenzjoni tas-sajd eċċessiv.
Ir-riżorsi tal-ħut huma limitati, u s-sajd żejjed jista' jkollu impatt fuq is-sopravivenza tal-istokk. L-UE għamlet regoli biex tiżgura s-sostenibbiltà tal-oċeani u tal-industrija tas-sajd u tal-akkwakultura.
L-għan tal-politika komuni tas-sajd tal-UE huwa li l-ħut ikun disponibbli għall-konsumaturi bi prezzijiet raġonevoli, u b'hekk is-settur tas-sajd jibqa' b'saħħtu.
L-għanijiet tal-politika tas-sajd tal-UE
Skont il-politika komuni tas-sajd tagħha, l-UE tirregola l-attivitajiet tas-sajd u tal-akkwakultura, tistabbilixxi kwoti tas-sajd, u tissalvagwardja s-sajd u l-oċeani.
Nippreservaw l-istokkijiet
L-evitar tas-sajd żejjed u l-iżgurar tal-kapaċità riproduttiva tal-istokkijiet tal-ħut.
Inżommu l-industrija kompetittiva
Il-faċilitazzjoni tal-kundizzjonijiet għal settur tas-sajd u tal-akkwakultura profittabbli.
Naqsmu l-opportunitajiet
L-iffissar ta' kwoti tas-sajd ġusti fost il-pajjiżi tal-UE.
Nippreservaw l-ekosistemi tal-baħar
Il-preservazzjoni tal-oċeani, l-ispeċijiet u l-ħabitats tagħhom.
Kif jiġu ġestiti l-istokkijiet tal-ħut
L-UE tistabbilixxi limiti fuq kemm jista' jinqabad ħut biex tissalvagwardja r-riżorsi tas-sajd. Dan huwa kruċjali għal settur tas-sajd vijabbli tal-UE. Il-limiti tal-qbid huma definiti kull sena għal aktar minn 200 speċi kummerċjali f'konformità ma' parir xjentifiku indipendenti.
Barra minn hekk, l-UE tadotta pjanijiet pluriennali għal żoni tal-baħar speċifiċi biex tiżgura konservazzjoni fit-tul. Il-miżuri biex jiġi indirizzat is-sajd illegali jgħinu wkoll biex jillimitaw il-ħsara lill-ekosistemi tal-baħar.
Niffissaw kwoti tas-sajd fost il-pajjiżi tal-UE
Il-Kunsill jaqdi rwol importanti fil-ħolqien tal-limiti tal-qbid (“qabdiet totali permissibbli” jew “TACs”) u l-kwoti nazzjonali għall-istokkijiet tal-ħut tal-UE, peress li din hija żona fejn għandu r-responsabbiltà unika għall-adozzjoni tal-leġiżlazzjoni.
- Konsultazzjoni u proposta: il-Kummissjoni tippreżenta proposta għal limiti tal-qbid fuq il-bażi ta' parir xjentifiku.
- Negozjati: ir-rappreżentanti tal-pajjiżi tal-UE janalizzaw u jiddiskutu l-proposta fil-Grupp ta' Ħidma tal-Kunsill dwar il-Politika tas-Sajd.
- Qbil: il-ministri tal-pajjiżi tal-UE jaqblu dwar il-limiti u l-kwoti tal-qbid fil-Kunsill Agrikoltura u Sajd.
- Adozzjoni: il-ftehim jiġi adottat formalment mill-Kunsill u jsir liġi.
Tnaqqis fis-sajd żejjed meta mqabbel ma' 20 sena ilu
Bis-saħħa tal-politika tas-sajd u l-miżuri tagħha biex is-sajd isir aktar sostenibbli, l-istokkijiet tal-ħut qed jirkupraw. Fl-2003, sebgħa minn kull għaxar stokkijiet ġew mistada żżejjed, filwaqt li fl-2022 is-sajd eċċessiv affettwa biss tlieta minn kull għaxar stokkijiet. Dan huwa tnaqqis ta' 40 punti perċentwali fis-sajd żejjed f'madwar 20 sena.
Filwaqt li din id-data turi l-impatt pożittiv tar-regoli tal-UE fuq is-saħħa tal-istokkijiet tal-ħut, is-sajd żejjed għadu sfida. L-istatus tal-istokkijiet tal-ħut fil-Baħar Mediterran, fil-Baħar l-Iswed u fil-Baħar Baltiku b'mod partikolari għadu kritiku u jeħtieġ aktar azzjoni.
Ftehimiet internazzjonali
L-UE kkonkludiet ftehimiet mas-sħab fid-dinja għall-ġestjoni u l-qsim tar-riżorsi tal-ħut. Permezz ta' dawn il-ftehimiet, il-bastimenti tal-UE jiksbu aċċess għall-ilmijiet tal-pajjiżi sħab u l-istokkijiet tal-ħut tagħhom.
Ir-Renju Unit huwa s-sieħeb ewlieni, peress li madwar 100 stokk tal-ħut jinqasmu bejn l-UE u r-Renju Unit.
L-aħħar aħbarijiet
L-aħħar spjegazzjonijiet
L-aħħar reviżjoni: 26 ta' Ottubru 2026