Kunsill Agrikoltura u Sajd, 27 ta' Jannar 2020

Riżultati ewlenin

Agrikoltura

It-tranżizzjoni lejn ekonomija newtrali għall-klima hija waħda mill-akbar sfidi għall-UE. Il-bdiewa u s-sajjieda ser ikollhom rwol kruċjali fil-kisba ta’ dan l-għan importanti. Iżda se jkollhom bżonn l-għajnuna. Il-politiki futuri tagħna jridu jiżguraw tranżizzjoni ġusta u għajxien deċenti. Sadanittant, il-bdiewa Ewropej jistħoqqilhom ċertezza u prevedibbiltà. F'dan il-kuntest, jeħtieġ li nilħqu ftehim dwar ir-regoli tranżizzjonali tal-PAK mill-aktar fis possibbli, u nżommu r-regoli antiki jiffunzjonaw matul il-perjodu tranżizzjonali. Ħadd ma għandu jitħalla jaqa’ lura. Marija Vučković, Ministru għall-Agrikoltura tal-Kroazja

Patt Ekoloġiku Ewropew

F’seduta pubblika l-Kummissjoni ppreżentat il-komunikazzjoni tagħha "Il-Patt Ekoloġiku Ewropew" ippubblikata fil-11 ta’ Diċembru 2019. L-istrateġija "Mill-Għalqa sal-Platt" u l-Politika Agrikola Komuni (PAK) huma identifikati fil-komunikazzjoni bħala l-għodod ewlenin biex jgħinu lill-bdiewa u lis-sajjieda jiġġieldu t-tibdil fil-klima, jipproteġu l-ambjent u jippreservaw il-bijodiversità.

Wara l-preżentazzjoni, il-ministri kellhom diskussjoni dwar l-aspetti agrikoli tal-Patt Ekoloġiku Ewropew abbażi ta' nota ta’ gwida mħejjija mill-presidenza.

• Patt Ekoloġiku Ewropew (Kummissjoni Ewropea)
• Il-Patt Ekoloġiku Ewropew - aspetti agrikoli, 15 ta’ Jannar 2020
• Skambju ta’ fehmiet dwar il-Patt Ekoloġiku Ewropew, 27 ta’ Jannar 2020

Regolament dwar ir-regoli tranżizzjonali tal-PAK

Abbażi ta’ dokument tal-presidenza, il-ministri kellhom ukoll skambju ta' fehmiet dwar il-proposta għal regolament dwar ir-regoli tranżizzjonali tal-PAK. Din għandha l-għan li tiżgura l-kontinwità tal-appoġġ tal-PAK lill-bdiewa Ewropej u lil benefiċjarji oħra fl-2021 peress li l-pjanijiet strateġiċi il-ġodda mhux se jkunu jistgħu japplikaw minn Jannar 2021.

• Regolament li jistabbilixxi dispożizzjonijiet tranżizzjonali għall-appoġġ tal-FAEŻR u l-FAEG fl-2021, tħejjija tad-dibattitu tal-Kunsill, 14 ta’ Jannar 2020
• Proposta għal Regolament li jistabbilixxi dispożizzjonijiet tranżizzjonali għall-appoġġ tal-FAEŻR u l-FAEG fl-2021, 14 ta’ Jannar 2020
• Skambju ta’ fehmiet dwar ir-regoli tranżizzjonali tal-PAK, 27 ta’ Jannar 2020

Affarijiet oħra

Tikkettar tat-trattament xieraq tal-annimali

Id-delegazzjoni Ġermaniża pprovdiet informazzjoni dwar diskussjonijiet parlamentari fil-Ġermanja rigward tikketta nazzjonali li tiddistingwi ikel prodott skont l-istandards tat-trattament xieraq tal-annimali li jmorru lil hinn mir-rekwiżiti legali minimi, u rigward il-pożizzjoni tal-Ġermanja favur tikketta dwar it-trattament xieraq tal-annimali fl-UE kollha għal dan it-tip ta’ ikel.

• Nota ta' informazzjoni mid-delegazzjoni Ġermaniża

Deni Afrikan tal-Ħnieżer (ASF)

Il-Kummissjoni Ewropea infurmat dwar l-eżitu tal-konferenza internazzjonali ta’ livell għoli “Il-futur tal-produzzjoni globali tal-majjal taħt theddida mid-deni Afrikan tal-ħnieżer”.

• Eżitu tal-konferenza internazzjonali ta’ livell għoli "Il-futur tal-produzzjoni globali tal-majjal taħt theddida mid-deni Afrikan tal-ħnieżer", 22 ta' Jannar 2020

Dikjarazzjoni Konġunta ta’ Franza, il-Ġermanja u Spanja dwar il-PAK futura

Id-delegazzjoni Franċiża ppreżentat dikjarazzjoni konġunta ffirmata fid-19 ta’ Diċembru 2019 mill-Ministri għall-agrikoltura tal-Ġermanja, Spanja u Franza rigward il-futur tal-Politika Agrikola Komuni.

• Dikjarazzjoni Konġunta tal-Ministri għall-Agrikoltura tal-Ġermanja, Spanja u Franza dwar il-PAK futura fil-kuntest tal-Patt Ekoloġiku Ewropew, 22 ta' Jannar 2020

Tikkettar tal-għasel

F’isem diversi delegazzjonijiet, is-Slovenja u l-Portugall ippreżentaw dikjarazzjoni dwar it-tikkettar tal-oriġini tat-taħlit tal-għasel.

• Nota ta’ informazzjoni dwar it-tikkettar tal-oriġini tat-taħlit tal-għasel, 22 ta’ Jannar 2020