Vidjokonferenza tal-ministri għall-agrikoltura u s-sajd, 13 ta' Mejju 2020

Riżultati ewlenin

Agrikoltura

Il-ministri kellhom skambju ta' fehmiet dwar l-effettività tal-miżuri tal-UE li ttieħdu biex jiġi indirizzat l-impatt tat-tifqigħa tal-COVID-19 fuq l-agrikoltura.

Il-ministri evalwaw is-sitwazzjoni u vvalutaw id-diversi azzjonijiet meħuda mill-Kummissjoni Ewropea biex jiżguraw, b'mod partikolari, il-moviment ta' ħaddiema staġjonali, l-introduzzjoni ta' "korsiji ħodor", u l-possibbiltà li l-istati membri jipprovdu ħlasijiet bil-quddiem ogħla ta' pagamenti, għajnuna mill-istat ogħla u għajnuna għall-ħżin privat. Il-ministri laqgħu dawn il-passi u enfasizzaw il-ħtieġa għal aktar miżuri. Huma identifikaw oqsma addizzjonali li jeħtieġu appoġġ, bħas-setturi tal-ħalib, tal-vitella, taċ-ċanga, tat-tjur u tal-inbid, u talbu għal estensjoni tal-ambitu tal-iskemi ta' għajnuna għall-ħżin privat. Ħafna ministri appellaw ukoll għal baġit ta' politika agrikola komuni b'saħħtu għal wara l-2020.

Id-diskussjoni ttrattat ukoll il-proposti leġislattivi attwali, b'mod partikolari proposta biex jiġi emendat ir-Regolament 1305/2013 bil-għan li tiġi pprovduta likwidità biex tiġi żgurata l-kontinwità tal-attivitajiet tal-biedja u tan-negozji ż-żgħar involuti fl-ipproċessar, il-kummerċjalizzazzjoni u/jew l-iżvilupp ta' prodotti agrikoli.

• Proposta għal regolament li jemenda r-Regolament (UE) Nru 1305/2013

Sajd

Il-ministri evalwaw l-iżviluppi relatati mal-kriżi tal-COVID-19 fis-setturi tas-sajd u l-akkwakultura mill-aħħar laqgħa informali tagħhom. Huma pprovdew ukoll informazzjoni dwar l-implimentazzjoni tal-programmi attwali tal-fond Ewropew għall-affarijiet marittimi u s-sajd (FEMS) u ttrattaw ir-regolament li kien għadu kif ġie adottat li jemenda r-regolament dwar il-FEMS u r-regolament dwar l-organizzazzjoni komuni tas-swieq.

• Regolament (UE) 2020/560

Fi tmiem il-laqgħa l-Presidenza Kroata ħarġet stqarrija għall-istampa.

• Eżiti tal-vidjokonferenza tal-ministri għall-agrikoltura u s-sajd (sit web tal-presidenza Kroata, 13 ta' Mejju 2020)

• It-tifqigħa tal-coronavirus COVID-19 u r-rispons tal-UE (informazzjoni ġenerali)