"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (Riċerka u spazju), 8 ta' Diċembru 2023
Riżultati prinċipali
Riċerka
L-impatt tar-riċerka u l-innovazzjoni fit-tfassil tal-politika
Il-ministri approvaw konklużjonijiet tal-Kunsill dwar l-impatt tar-riċerka u l-innovazzjoni fit-tfassil tal-politika.
It-tfassil tal-politika tajjeb huwa essenzjali għall-progress tar-riċerka u l-innovazzjoni, iżda r-riċerka u l-innovazzjoni huma wkoll fundamentali għas-suċċess tal-proċess regolatorju. It-tisħiħ tal-kontribut tar-riċerka u l-innovazzjoni għat-tfassil tal-politika huwa ta' benefiċċju għas-soċjetà, għandu impatt pożittiv fuq il-pjaneta u eventwalment itejjeb il-ħajja taċ-ċittadini u jsaħħaħ id-demokrazija.
Diana Morant Ripoll, Ministru ta' Spanja għax-Xjenza, l-Innovazzjoni u l-Universitajiet
Il-konklużjonijiet, li huma prijorità tal-presidenza Spanjola, jirriflettu dwar kif it-tfassil, ir-riċerka u l-innovazzjoni adatti jistgħu jtejbu t-tfassil tal-politika permezz tal-inklużjoni tal-evidenza u l-għarfien xjentifiċi. Il-konklużjonijiet tal-Kunsill jenfasizzaw tliet dimensjonijiet ewlenin: l-importanza tar-riċerka u l-innovazzjoni għall-proċess tat-tfassil tal-politika fl-Unjoni; l-importanza tal-ekosistemi reġjonali tar-riċerka u l-innovazzjoni; u l-impatt tal-politika tal-Faċilità għall-Irkupru u r-Reżiljenza fuq il-politika tar-riċerka u l-innovazzjoni tal-Unjoni u fuq iż-Żona Ewropea tar-Riċerka.
Qafas Ewropew biex jiġu attirati u miżmuma t-talenti fir-riċerka, fl-innovazzjoni u intraprenditorjali fl-Ewropa
Il-ministri laħqu qbil politiku dwar rakkomandazzjoni tal-Kunsill għal qafas Ewropew li jiġu attirati u miżmuma t-talenti fir-riċerka, fl-innovazzjoni u intraprenditorjali fl-Ewropa.
B'dan l-att, qed nistabbilixxu standards li jistgħu jiggwidaw lill-Istati Membri, lill-organizzazzjonijiet tar-riċerka, lill-finanzjaturi u lill-partijiet ikkonċernati biex iżidu l-istabbiltà u l-attraenza tal-karrieri fir-riċerka fl-Ewropa. Biex nilħqu dan l-għan jeħtieġ li nikkoordinaw aħjar il-politiki nazzjonali tagħna dwar ir-Riċerka u l-Innovazzjoni; u jeħtieġ ukoll li ninvolvu lir-riċerkaturi kollha b'talent, irrispettivament mill-ġeneru, id-diżabilità, l-età, l-orjentazzjoni sesswali, ir-razza jew l-etniċità, l-oriġini soċjoekonomika jew kwalunkwe ċirkostanza oħra billi nindirizzaw b'mod effettiv l-inugwaljanzi persistenti fil-karrieri fir-riċerka.
Diana Morant Ripoll, Ministru għax-Xjenza, l-Innovazzjoni u l-Universitajiet
Din ir-rakkomandazzjoni għandha l-għan li tappoġġa lir-riċerkaturi u l-karrieri fir-riċerka fl-UE, iżda wkoll li tiżviluppa suq tax-xogħol Ewropew aktar attraenti, miftuħ u sostenibbli għar-riċerkaturi, li huwa wkoll attraenti għat-talent barrani. Ir-rakkomandazzjoni tinkludi l-"Karta Ewropea għar-Riċerkaturi" ġdida, li tissostitwixxi t-test applikabbli bħalissa.
Il-valorizzazzjoni tar-riċerka bħala għodda għall-irkupru ekonomiku u industrijali u r-reżiljenza
Il-ministri kellhom dibattitu ta' orjentazzjoni dwar "Il-valorizzazzjoni tar-riċerka bħala għodda għall-irkupru ekonomiku u industrijali u r-reżiljenza". Il-ministri ġew mistiedna jikkondividu l-aħjar prattiki dwar kif ir-riżultati tar-riċerka jistgħu jintużaw biex tingħata ħajja ġdida lill-ekonomija u l-industrija tal-Unjoni b'rispons għal tliet temi ppreżentati mill-presidenza f'nota: L-isfidi tal-valorizzazzjoni tar-riżultati tar-riċerka biex l-industrija u l-ekonomija tal-UE jingħataw spinta ġdida; kif niżguraw li l-valorizzazzjoni tar-riċerka u l-innovazzjoni twieġeb għall-prijoritajiet tal-UE u dawk nazzjonali f'konformità mal-ħtiġijiet taċ-ċittadini; miżuri nazzjonali għall-promozzjoni tal-valorizzazzjoni tar-riċerka min-naħa tad-domanda u l-ħiliet u t-tagħlim għall-fehim tal-valorizzazzjoni tal-għarfien mill-perspettiva tal-industrija.
Dibattitu waqt l-ikla ta' nofsinhar - It-trawwim ta' politiki għaż-żgħażagħ u l-ugwaljanza bejn il-ġeneri fir-Riċerka u l-Innovazzjoni
Waqt ikla informali ta' nofsinhar, il-ministri ddiskutew kif l-aħjar jitrawmu politiki għaż-żgħażagħ u l-ugwaljanza bejn il-ġeneri fir-Riċerka u l-Innovazzjoni. Id-dibattitu kien ibbażat fuq nota tal-presidenza u ffoka fuq erba' kwistjonijiet: l-isfidi fl-implimentazzjoni ta' politiki li jappoġġaw lin-nisa fix-xjenza u r-riċerka; il-miżuri biex jiġi evitat il-preġudizzju bejn il-ġeneri fl-evalwazzjoni tal-prestazzjoni xjentifika jew fil-ħatra ta' pożizzjonijiet ta' tmexxija u ta' teħid ta' deċiżjonijiet; l-ostakli għal talent żagħżugħ li jibda karriera fix-xjenza u l-innovazzjoni u kif dawn jingħataw perkors tal-karriera aktar sostenibbli u prevedibbli; u miżuri ta' appoġġ possibbli biex tiżdied l-attraenza tal-karrieri xjentifiċi għar-riċerkaturi fil-bidu tal-karriera tagħhom.
Suġġetti oħra fuq l-aġenda
Il-ministri ġew infurmati dwar ħames kwistjonijiet taħt "affarijiet oħra":
id-delegazzjoni Spanjola infurmat lill-ministri dwar il-kontinwazzjoni tas-sħubija fir-riċerka u l-innovazzjoni fiż-żona tal-Mediterran (PRIMA).
infurmaw ukoll lill-ministri dwar l-avvenimenti relatati mar-riċerka organizzati mill-Presidenza Spanjola matul is-semestru tagħha
il-Kummissjoni Ewropea kellha punt ta' informazzjoni dwar l-ewwel edizzjoni tar-rapport ta' monitoraġġ fil-livell tal-UE taż-Żona Ewropea tar-Riċerka (ŻER)
il-Kummissjoni Ewropea infurmat ukoll lill-ministri dwar il-progress li sar fil-valutazzjoni u l-azzjonijiet tar-riċerka u dwar inizjattiva ġdida dwar materjali avvanzati għat-tmexxija industrijali li ġiet inkluża fil-Programm ta' Ħidma għall-2024
fl-aħħar nett, il-ministri ġew infurmati mid-delegazzjoni Belġjana dwar il-programm ta' ħidma tal-presidenza li jmiss fil-qasam tar-riċerka
Il-ministri approvaw konklużjonijiet tal-Kunsill dwar "L-immaniġġjar tat-traffiku fl-ispazju: is-sitwazzjoni attwali".
Il-politika dwar l-ispazju ma baqgħatx fil-fantaxjenza u saret element kruċjali ta' ħajjitna ta' kuljum, fosthom kif naraw it-televiżjoni, il-monitoraġġ tat-tibdil fil-klima jew inkella l-għażla tal-ġurnata għall-ħsad tal-qamħ. L-aċċess għall-ispazju ser ikun fundamentali għall-awtonomija strateġika miftuħa tagħna. Il-konklużjonijiet adottati llum juru t-triq biex tiġi garantita preżenza Ewropea fl-orbiti tal-pjaneta tagħna b'mod sikur, sigur u sostenibbli.
Diana Morant Ripoll, Ministru ta' Spanja għax-Xjenza, l-Innovazzjoni u l-Universitajiet
Il-konklużjonijiet jenfasizzaw l-urġenza li jiġi żviluppat approċċ tal-UE għall-ġestjoni tat-traffiku fl-ispazju u jirrikonoxxu l-importanza li tiġi proposta leġiżlazzjoni tal-UE relatata mal-ispazju li tkopri aspetti ta' sikurezza, sigurtà u sostenibbiltà. Il-presidenza ressqet dan l-abbozz ta' konklużjonijiet tal-Kunsill biex tenfasizza l-kontribut konsiderevoli tal-ġestjoni tat-traffiku fl-ispazju għall-prijoritajiet politiċi ewlenin tal-UE, inkluż il-Patt Ekoloġiku tal-UE u t-Trasformazzjoni Diġitali tal-UE, kif ukoll għall-aċċess awtonomu, sigur u kosteffiċjenti tal-Ewropa għall-ispazju.
Futur tal-politika tal-UE dwar l-ispazju f'dinja li qed tinbidel
Il-ministri kellhom skambju ta' fehmiet dwar il-futur tal-politika tal-UE dwar l-ispazju f'dinja li qed tinbidel abbażi ta' dokument imħejji mill-presidenza li fih xi informazzjoni ġenerali u tliet kwistjonijiet biex jiggwidaw id-dibattitu: Is-sostenibbiltà tal-ispazju; is-sigurtà u d-difiża; l-awtonomija strateġika tal-UE
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
It-tfassil tal-politika tajjeb huwa essenzjali għall-progress tar-riċerka u l-innovazzjoni, iżda r-riċerka u l-innovazzjoni huma wkoll fundamentali għas-suċċess tal-proċess regolatorju. It-tisħiħ tal-kontribut tar-riċerka u l-innovazzjoni għat-tfassil tal-politika huwa ta' benefiċċju għas-soċjetà, għandu impatt pożittiv fuq il-pjaneta u eventwalment itejjeb il-ħajja taċ-ċittadini u jsaħħaħ id-demokrazija.
