"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (Suq intern u industrija), 25 ta' Settembru 2023
Riżultati ewlenin
Rieżami tal-leġiżlazzjoni tal-UE dwar il-protezzjoni tad-disinji
Il-ministri adottaw approċċi ġenerali dwar il-pakkett tal-Kummissjoni biex tiġi aġġornata l-leġiżlazzjoni Ewropea dwar il-protezzjoni tad-disinji: wieħed dwar id-direttiva dwar il-protezzjoni legali tad-disinji u wieħed dwar ir-regolament dwar id-disinji tal-Unjoni. Dawn it-testi leġiżlattivi għandhom l-għan li jimmodernizzaw ir-regoli Ewropej li ilhom jeżistu 20 sena dwar id-disinji u jadattawhom sabiex ikunu adatti għall-era diġitali u tal-istampar 3D (jiġifieri jagħmlu r-reġistrazzjoni u l-protezzjoni tad-disinji fis-suq uniku aktar rapidi, sikuri u affordabbli).
Protezzjoni tajba tad-disinji hija essenzjali għall-kompetittività tal-industrija tagħna. Ir-regoli l-ġodda ser jgħinu biex tingħata spinta lill-kreattività tad-disinjaturi u tal-kumpaniji tagħna b'mod aktar rapidu u aktar affidabbli, adattat għall-isfidi tal-era diġitali, fil-ġlieda kontra l-kontrafazzjonijiet.
Héctor Gómez Hernández, aġent Ministru għall-Industrija, il-Kummerċ u t-Turiżmu ta' Spanja
L-approċċi ġenerali tal-Kunsill jappoġġaw l-objettivi ġenerali tar-reviżjoni tal-leġiżlazzjoni, iżda jintroduċu wkoll għadd ta' elementi ta' titjib sabiex il-protezzjoni tad-disinji ssir aktar faċli (b'mod partikolari billi jinżammu d-data tar-reġistrazzjoni u r-rappreżentazzjoni tad-disinji, anke jekk xi dokumenti jkunu neqsin). Jagħtu wkoll lill-istati membri l-possibbiltà li jipprevedu proċeduri amministrattivi ta' appell f'każ li d-drittijiet tad-disinn jiġu ddikjarati invalidi. Jiżguraw li t-tariffi tar-reġistrazzjoni nazzjonali jkunu orħos minn dawk għall-Ewropa kollha u jippermettu l-akkumulazzjoni tad-drittijiet tad-disinn u tad-drittijiet tal-awtur. Il-pożizzjonijiet tal-Kunsill iżommu wkoll il-"klawżola dwar it-tiswija", li tarmonizza l-protezzjoni tad-disinji għall-partijiet ta' rikambju tal-komponenti użati għat-tiswija ta' prodotti kumplessi (eż. partijiet tal-karozzerija).
Il-Kunsill adotta wkoll il-pożizzjoni tiegħu ('approċċ ġenerali') dwar ir-regolament Euro 7, li jistabbilixxi regoli dwar l-approvazzjoni tat-tip ta' vetturi bil-mutur u magni, iżda wkoll ta' sistemi, komponenti u unitajiet tekniċi separati, fir-rigward tal-emissjonijiet tagħhom u d-durabbiltà tal-batteriji. Ir-regolament il-ġdid ikopri, f'att legali wieħed, il-limiti tal-emissjonijiet għal karozzi, vannijiet, xarabanks u trakkijiet.
L-Ewropa hija magħrufa madwar id-dinja għall-produzzjoni ta' karozzi b'emissjonijiet baxxi u tal-ogħla kwalità. Irridu nkomplu nsegwu l-għan li ntejbu l-kwalità tal-arja. Il-pożizzjoni tagħna hija li nkomplu mmexxu l-mobbiltà tal-futur u nadottaw livelli realistiċi ta' emissjonijiet għall-vetturi tal-għaxar snin li ġejjin filwaqt li ngħinu lill-industrija tagħna tagħmel qabża definittiva lejn karozzi nodfa fl-2035. Il-presidenza Spanjola uriet sensittività għad-diversi esiġenzi u talbiet tal-istati membri u nemmnu li, b'din il-proposta, ksibna appoġġ wiesa', bilanċ fl-ispejjeż tal-investiment tad-ditti tal-manifattura u qed intejbu l-benefiċċji ambjentali li jirriżultaw mir-regolament.
Héctor Gómez Hernández, aġent Ministru għall-Industrija, il-Kummerċ u t-Turiżmu ta' Spanja
Il-ministri sabu bilanċ adegwat bejn rekwiżiti stretti għall-emissjonijiet tal-vetturi u investimenti addizzjonali fl-industrija, f'mument meta l-manifatturi Ewropej tal-karozzi qed jersqu lejn il-produzzjoni ta' karozzi b'emissjonijiet żero.
L-approċċ ġenerali jżomm il-limiti tal-emissjonijiet u l-kundizzjonijiet tat-test eżistenti għall-vetturi ħfief, iżda għall-vetturi tqal, il-limiti tal-emissjonijiet tnaqqsu u l-kundizzjonijiet tat-test ġew aġġustati kemxejn. Euro 7 fih ukoll dispożizzjoni speċjali dwar ix-xarabanks urbani biex tiġi żgurata l-koerenza mal-mira ta' emissjonijiet żero ta' CO2 għall-2030 għal dawn il-vetturi li għadha kif ġiet proposta.
Lesti għall-mira ta' 55%: għalfejn l-UE qed issaħħaħ l-istandards għall-emissjonijiet tas-CO2 għall-karozzi u l-vannijiet (Infografika)
Kompetittività u produttività fit-tul – Kontrolli tal-kompetittività fil-proposti leġiżlattivi
Il-ministri kellhom dibattitu politiku dwar ir-rwol tal-kontrolli tal-kompetittività fil-formulazzjoni ta' proposti leġiżlattivi. Id-diskussjoni kienet ibbażata fuq nota mill-presidenza Spanjola li tistabbilixxi l-kuntest ġenerali u li titlob lid-delegazzjonijiet jippreżentaw il-ħsibijiet tagħhom dwar erba' mistoqsijiet:
Liema elementi għandhom ikunu indispensabbli fil-kontrolli tal-kompetittività?
X'jista' jsir biex tiġi żgurata l-implimentazzjoni ta' dawn il-kontrolli?
Il-kontrolli tal-kompetittività għandhom japplikaw biss għal proposti leġiżlattivi jew ukoll għal strateġiji u pjanijiet ta' azzjoni?
Il-Kunsill Kompetittività kif jista' jikkontribwixxi għall-valutazzjoni tal-kompetittività tal-proposti leġiżlattivi tal-Kummissjoni?
Id-diskussjoni tal-lum kienet segwitu għad-dibattiti preċedenti li ffukaw fuq il-kompetittività fit-tul u fuq ir-rwol futur tas-suq uniku li saru matul il-Kunsilli Ewropej ta' Marzu u Ġunju 2023, u fil-Kunsill COMPET ta' Mejju. B'mod partikolari, il-Kunsill Ewropew tat-23 ta' Marzu appella biex tiġi avvanzata l-ħidma fuq qafas regolatorju li jsaħħaħ it-tkabbir, billi jitnaqqas il-piż amministrattiv u jitwettqu kontrolli tal-kompetittività għal proposti leġiżlattivi ġodda.
Il-ministri rreferew għall-komunikazzjonijiet tal-Kummissjoni dwar it-30 Sena mis-Suq Uniku u l-kompetittività fit-tul tal-UE, li ġew ippreżentati f'Marzu, u għall-pakkett ta' għajnuna għall-SMEs li ġie adottat mill-Kummissjoni għaxart ijiem ilu.
Eżatt qabel id-dibattitu politiku, il-ministri kellhom ikla ta' nofsinhar ma' Enrico Letta, President tal-Istitut Jacques Delors u eks Prim Ministru tal-Italja, li bħalissa qed iħejji rapport indipendenti dwar il-futur tas-suq uniku fuq talba tal-Kunsill Ewropew. Is-Sur Letta informa lill-ministri dwar il-progress fir-rigward ta' dan id-dokument, li ser jiġi ppreżentat lill-mexxejja tal-UE fil-Kunsill Ewropew ta' Marzu 2024.
Rapport tal-Forum Ibero-Amerikan tal-Aġenziji Governattivi għall-Protezzjoni tal-Konsumatur
Il-presidenza infurmat lill-ministri dwar l-eżitu tal-Forum Ibero-Amerikan tal-Aġenziji Governattivi għall-Protezzjoni tal-Konsumatur (FIAGC), li sar f'Madrid fit-13 u l-14 ta' Settembru 2023.
Direttiva dwar l-għoti tas-setgħa lill-konsumaturi għat-tranżizzjoni ekoloġika
Il-presidenza infurmat lill-ministri dwar il-ftehim proviżorju li ntlaħaq dwar id-direttiva dwar l-għoti tas-setgħa lill-konsumaturi għat-tranżizzjoni ekoloġika wara t-trilogu li sar fil-Parlament Ewropew fid-19 ta' Settembru. Il-proposta maqbula nhar l-Erbgħa li għadda għandha l-għan li tiġġieled prattiki kummerċjali inġusti (eż. greenwashing) li jxekklu lill-konsumaturi milli jagħżlu prodotti u servizzi aktar ekoloġiċi jew aktar ċirkolari.
Il-leġiżlazzjoni farmaċewtika tal-UE minn perspettiva industrijali u tal-kompetittività
Id-delegazzjoni Awstrijaka u dik Ġermaniża taw preżentazzjoni dwar il-leġiżlazzjoni farmaċewtika tal-UE minn perspettiva industrijali u tal-kompetittività.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Protezzjoni tajba tad-disinji hija essenzjali għall-kompetittività tal-industrija tagħna. Ir-regoli l-ġodda ser jgħinu biex tingħata spinta lill-kreattività tad-disinjaturi u tal-kumpaniji tagħna b'mod aktar rapidu u aktar affidabbli, adattat għall-isfidi tal-era diġitali, fil-ġlieda kontra l-kontrafazzjonijiet.
