Kunsill Affarijiet Ekonomiċi u Finanzjarji, 17/06/2016, 17 ta' Ġunju 2016

Riżultati ewlenin

Evitar tat-taxxa korporattiva

Il-Kunsill laħaq qbil ġenerali dwar abbozz ta’ direttiva li tindirizza l-evitar tat-taxxa korporattiva, suġġett għal proċedura ta’ silenzju li tintemm f’nofsillejl tal-20 ta’ Ġunju 2016.

L-abbozz ta’ direttiva jibni fuq ir-rakkomandazzjonijiet tal-2015 tal‑OECD li jindirizzaw l‑erożjoni tal‑bażi tat‑taxxa u t‑trasferiment tal‑profitt (BEPS). Huwa jindirizza sitwazzjonijiet fejn gruppi korporattivi jieħdu vantaġġ minn differenzi bejn sistemi nazzjonali tat-taxxa sabiex inaqqsu r-responsabbiltà fiskali tagħhom.

Jekk il-ftehim jiġi kkonfermat, id-direttiva ser tiġi sussegwentement ippreżentata lill-Kunsill għall-adozzjoni.

“Huwa importanti ħafna li l-UE tkun fuq quddiem nett fil-ġlieda kontra l-evitar tat-taxxa, u llum ħadna pass importanti,” qal Jeroen Dijsselbloem, il-ministru għall-finanzi tan-Netherlands u president tal-Kunsill. “L-għan huwa li tkun żgurata implimentazzjoni koerenti tal-pjan ta’ azzjoni tal-OECD dwar il-BEPS, u li nittrasponu dan il-pjan f’liġi li torbot applikabbli madwar l-UE kollha.”

Tisħiħ tal-unjoni bankarja

Il-Kunsill qabel dwar ‘pjan direzzjonali’ għal aktar ħidma biex titlesta l-unjoni bankarja tal-UE.

Il-pjan direzzjonali jistabbilixxi prijoritajiet u miri għas-snin li ġejjin, f’termini kemm ta’ qsim tar-riskji u t-tnaqqis tar-riskji fis-settur bankarju kif ukoll ta' li jiġu indirizzati sfidi attwali.

Il-ħidma ser titmexxa fi tliet oqsma ewlenin:

• skema Ewropea ta’ assigurazzjoni tad-depożiti (EDIS);
• garanzija ta’ kontinġenza komuni għall-fond uniku ta’ riżoluzzjoni;
• regolamenti bankarji bl-għan li jitnaqqsu r-riskji.

“Ir-riżultat għandu jkun unjoni bankarja aktar reżiljenti, li ssaħħaħ l-istabbiltà finanzjarja fiż-żona tal-euro u fl-UE kollha kemm hi,” qal is-Sur Dijsselbloem. “L-aspettattivi huma għolja, peress li l-unjoni bankarja hija wieħed mill-akbar suċċessi tal-UE, wara li tat kontribut essenzjali biex terġa’ tinbena l-fiduċja.”

Il-konklużjonijiet tal-Kunsill jipprovdu gwida dwar is-sekwenza tal-miżuri għat-tnaqqis tar-riskji, il-garanzija ta’ kontinġenza komuni u l-EDIS.

• Unjoni bankarja (informazzjoni ġenerali)

Defiċits, politiki ekonomiċi, l-unjoni tas-swieq kapitali, il-fondi tas-suq monetarju

Il-Kunsill għalaq proċeduri ta’ defiċit eċċessiv għal Ċipru, l-Irlanda u s-Slovenja.

Il-Kunsill approva rakkomandazzjonijiet speċifiċi għall-pajjiżi għall-istati membri dwar il-politiki ekonomiċi u fiskali tagħhom.

Il-Kunsill qabel dwar ftehim dwar ir-regoli tal-prospetti għall-ħruġ u l-offerti ta’ titoli, parti minn pjanijiet usa’ għal unjoni tas-swieq kapitali.

Huwa qabel ukoll dwar abbozz ta’ regoli dwar il-fondi tas-suq monetarju, bl-għan li jagħmlu tali prodotti aktar robusti.

Streaming dirett, filmati u ritratti

• Streaming dirett ta’ sessjonijiet pubbliċi u okkażjonijiet għall-istampa
• Ritratti u filmati tal-laqgħa, Kunsill Affarijiet Ekonomiċi u Finanzjarji, 17 ta' Ġunju 2016