Kunsill Affarijiet Ekonomiċi u Finanzjarji, 08/03/2016, 8 ta' Marzu 2016

Riżultati ewlenin

Evitar tat‑taxxa korporattiva

Għandna appoġġ qawwi għal ftehim politiku dwar din id-direttiva, li se tittrasponi b’mod preċiż fil-leġislazzjoni tal-UE l-istandard tal-OECD dwar ir-rappurtar pajjiż b’pajjiż” Jeroen Dijsselbloem, il-ministru għall-finanzi tan-Netherlands u President tal-Kunsill

Il‑Kunsill laħaq qbil dwar il‑pożizzjoni tiegħu, fi stennija tal‑opinjoni tal‑Parlament Ewropew, rigward abbozz ta' direttiva dwar l‑iskambju ta' informazzjoni relatata mat‑taxxa dwar l‑attivitajiet ta' kumpaniji multinazzjonali.

“Dan huwa l-ewwel pass li qegħdin nieħdu f’ħidmitna fuq il-pakkett kontra l-evitar tat-taxxa”, qal Jeroen Dijsselbloem, il-Ministru għall-Finanzi tan-Netherlands u President tal-Kunsill. “Għandna appoġġ qawwi għal ftehim politiku dwar din id-direttiva, li se tittrasponi b’mod preċiż fil-leġislazzjoni tal-UE l-istandard tal-OECD dwar ir-rappurtar pajjiż b’pajjiż.”

Il-ftehim politiku huwa soġġett għal konsultazzjoni tal-parlament tiegħu minn stat membru wieħed.

Id‑direttiva se tirrikjedi li l‑kumpaniji multinazzjonali jirrappurtaw informazzjoni relatata mat‑taxxa, dettaljata skont il‑pajjiż, u li l‑awtoritajiet tat‑taxxa nazzjonali jiskambjaw dik l‑informazzjoni awtomatikament.

Hija tkopri kumpaniji multinazzjonali b'total ta' dħul konsolidat tal‑grupp ta' mill‑anqas €750 miljun, li jkun fih 90% tad-dħul tal-kumpaniji.

• Press release - Corporate tax avoidance

Kodiċi ta' kondotta dwar it-tassazzjoni tal-intrapriżi

Il-Kunsill adotta konklużjonijiet dwar it-tisħiħ tal-kodiċi ta’ kondotta bl-għan li jiġu eliminati l-miżuri li jistgħu joħolqu sitwazzjonijiet ta' kompetizzjoni fiskali inġusta.

Il-kodiċi ta’ kondotta jintuża biex jivvaluta l-impatt negattiv tal-miżuri fiskali adottati, jew li qegħdin fil-proċess li jiġu adottati, mill-istati membri. Grupp ta’ ħidma jissorvelja l-implimentazzjoni tiegħu.

Il-konklużjonijiet tal-Kunsill jipprevedu titjib tal-governanza, it-trasparenza u l-metodi ta’ ħidma tal-grupp ta’ ħidma.

L-effiċjenza se titjieb billi titħaffef il-valutazzjoni tal-impatt potenzjalment negattiv tas-sistemi fiskali, b’involviment aktar kmieni u aktar frekwenti tal-Kunsill. Se tissaħħaħ l-informazzjoni lill-pubbliku dwar il-ħidma kurrenti u fil-passat tal-grupp.

Il-presidenza beħsiebha tieħu deċiżjoni oħra li għandha tittieħed sal-aħħar ta’ Ġunju 2016 dwar ir-reviżjoni tal-mandat tal-grupp.

• Council conclusions on the code of conduct on business taxation

Politika ekonomika u fiskali

Il-ministri ddiskutew l-implimentazzjoni ta’ rakkomandazzjonijiet speċifiċi għall-pajjiż fil-qafas tas-“Semestru Ewropew”, il-proċess annwali ta’ monitoraġġ tal-politika tal-UE. Il-Kummissjoni ppreżentat rapporti dwar il-politiki ekonomiċi tal-istati membri, li jiffukaw fuq il-miżuri meħuda biex ineħħu l-ostakli għall-investiment.

Il-Kunsill ħareġ rakkomandazzjoni dwar il-politiki ekonomiċi taż-żona tal-euro, li tagħmilha possibbli li jitqiesu kwistjonijiet taż-żona tal-euro fir-rakkomandazzjonijiet speċifiċi għall-pajjiżi tal-2016.

Huwa adotta wkoll konklużjonijiet dwar is-sostenibbiltà fiskali, li identifikaw l-isfidi li qed jiffaċċjaw l-istati membri fir-rigward tal-finanzi pubbliċi tagħhom.

• Semestru Ewropew (informazzjoni ġenerali)