Kunsill Affarijiet Ekonomiċi u Finanzjarji, 11/10/2016, 11 ta' Ottubru 2016

Riżultati ewlenin

Tibdil fil-klima - Aspetti ta’ finanzjament

Il-Kunsill adotta konklużjonijiet dwar it-tibdil fil-klima bi tħejjija għat-22 konferenza tal-partijiet (COP22) għall-Konvenzjoni Qafas tan-NU dwar it-tibdil fil-klima, li ser issir f’Marrakech mis-7 sat-18 ta’ Novembru 2016.

Il-konklużjonijiet jikkostitwixxu l-mandat tal-UE għall-Konferenza ta’ Marrakech, li ser tiddiskuti l-implimentazzjoni ta’ ftehim globali ġdid dwar il-klima li ntlaħaq f’COP21 f’Pariġi f’Diċembru 2015.

Il-konklużjonijiet jikkonċentraw fuq l-aspetti ta’ finanzjament tat-tibdil fil-klima. Fit-30 ta’ Settembru 2016, il-Kunsill Ambjent adotta ukoll konklużjonijiet, li jkopru aspetti aktar ġenerali.

“It-tibdil fil-klima huwa mingħajr dubju sfida globali serja u azzjoni rapida tibqa’ prijorità ewlenija għall-UE. Il-finanzjament pubbliku għall-klima ser ikompli jkollu rwol ċentrali ", qal Peter Kažimír, il-ministru għall-finanzi Slovakk u president tal-Kunsill. Huwa żied: “Aħna kkonfermajna li l-UE tinsab impenjata li tagħti s-sehem tagħha tal-mira tal-pajjiżi żviluppati biex b’mod konġunt jimmobilizzaw 100 biljun dollaru fis-sena sal-2020 u mbagħad sal-2025 għall-mitigazzjoni u l-adattament, minn varjetà wiesgħa ta’ sorsi, strumenti u mezzi.”

Trasparenza fiskali

Il-Kunsill adotta konklużjonijiet bi tweġiba għal komunikazzjoni tal-Kummissjoni dwar it-trasparenza fiskali wara r-rivelazzjonijiet tal-Panama Papers f’April 2016.

Il-konklużjonijiet jenfasizzaw il-ħtieġa kontinwa biex jiġi evitat il-ħabi tal-fondi fuq skala kbira, li jxekkel l-isforzi biex jitrażżnu l-evażjoni tat-taxxa, il-ħasil tal-flus u l-finanzjament tat-terroriżmu.

Fil-komunikazzjoni tagħha ta’ Lulju 2016, il-Kummissjoni rrakkomandat approċċ ikkoordinat għall-prevenzjoni tal-abbuż fiskali, kemm fil-livell tal-UE u kif ukoll f’dak internazzjonali. Filwaqt li sar progress fil-livell tal-UE, għad hemm xi lakuni u hija maħsuba aktar azzjoni.

Il-Kunsill approva wkoll il-ftehim ma' Monaco dwar it-tassazzjoni, li jagħti lill-amministrazzjonijiet tat-taxxa aċċess transkonfinali aħjar għall-informazzjoni dwar il-kontijiet finanzjarji tar-residenti ta’ xulxin.