Kunsill Affarijiet Ekonomiċi u Finanzjarji, 12/07/2016, 12 ta' Lulju 2016

Riżultati ewlenin

Il-Portugall u Spanja

Il-Kunsill sab li l-Portugall u Spanja ma kinux ħadu azzjoni effettiva f’rispons għar-rakkomandazzjonijiet tiegħu dwar miżuri biex jikkoreġu d-defiċits eċċessiv tagħhom.

Huwa kkonferma li dawn mhux ser ikunu naqqsu d-defiċit tagħhom għal taħt it-3% tal-PDG, il-valur ta' referenza tal-UE għad-defiċits tal-gvern, sal-iskadenza rakkomandata. U sab li l-isforz fiskali li sar miż-żewġ pajjiżi huwa ħafna inqas minn dak li kien rakkomandat.

Id-deċiżjonijiet tal-Kunsill ser jiskattaw sanzjonijiet skont l-Artikolu 126(8) tat-Trattat dwar il-Funzjonament tal-Unjoni Ewropea. Il-Kummissjoni għandha 20 jum sabiex tirrakkomanda u l-Kunsill ser ikollu 10 ijiem biex japprova l-multi.

"Ninsab ċert li fl-aħħar ser ikollna riżultat għaqli u intelliġenti", qal Peter Kažimír, ministru għall-finanzi tas-Slovakkja u president tal-Kunsill.

Trasparenza fiskali, ħasil tal-flus u finanzjament tat-terroriżmu

Il-Kunsill adotta regoli ġodda li jindirizzaw prattiki ta' evitar tat-taxxa korporattiva, wara ftehim li ntlaħaq fil-21 ta' Ġunju 2016.

Id-direttiva tibbaża fuq rakkomandazzjonijiet tal-2015 tal‑OECD fir-rigward tal‑erożjoni tal‑bażi tat‑taxxa u t‑trasferiment tal‑profitt. Hija tindirizza sitwazzjonijiet fejn gruppi korporattivi jieħdu vantaġġ minn disparitajiet bejn sistemi nazzjonali tat-taxxa sabiex inaqqsu r-responsabbiltà fiskali tagħhom.

Il-Kunsill iddiskuta miżuri ulterjuri possibbli biex titjieb it-trasparenza tat-taxxa u jiġi evitat l-abbuż fiskali, abbażi ta' komunikazzjoni mill-Kummissjoni.

"Il-Presidenza tippjana li tagħmel progress fl-azzjoni biex tiġi miġġielda l-evażjoni tat-taxxa u l-evitar tat-taxxa fix-xhur li ġejjin", qal is-Sur Kažimír. "M'hemmx għalfejn ngħidu li l-għexieren u mijiet ta’ miljuni ta’ euro li ntilfu minħabba l-frodi jew l-evitar tat-taxxa setgħu jiġu investiti fl-ekonomiji tagħna u rridu nindirizzaw din il-marda bil-mezzi kollha."

Il-Kunsill iddiskuta wkoll proposta biex jissaħħu r-regoli tal-UE maħsuba għall-prevenzjoni tal-ħasil tal-flus u l-finanzjament tat-terroriżmu.

Il-proposta hija element ċentrali tar-rispons tal-UE għall-attakki terroristiċi reċenti fl-Ewropa, kif ukoll għar-rivelazzjonijiet f'April 2016 tal-Panama Papers. Il-ħidma teknika ser tibda f’Lulju 2016, bl-għan li jkun hemm qbil fil-Kunsill fix-xhur li ġejjin.

Programm tal-presidenza

Il-Kunsill iddiskuta l-programm ta’ ħidma tal-Presidenza Slovakka.

"Irridu nżidu r-reżiljenza tal-UE fir-rigward tal-isfidi esterni u interni u nerġgħu nagħtu lura l-fiduċja liċ-ċittadini tagħna fil-proġett Ewropew", qal is-Sur Kažimír.

Il-prijoritajiet tal-presidenza jinkludu:

• approfondiment għaqli tal-unjoni ekonomika u monetarja tal-UE;
• ġlieda kontra l-evitar tat-taxxa u l-evażjoni tat-taxxa;
• unjoni tas-swieq kapitali tal-UE;
• unjoni bankarja;
• investiment;
• il-baġit ġenerali tal-UE għall-2017.