Kunsill Affarijiet Ekonomiċi u Finanzjarji, 08/11/2016, 8 ta' Novembru 2016

Riżultati ewlenin

Lista tal-UE ta' ġurisdizzjonijiet li ma jikkooperawx

Il-Kunsill qabel dwar il-kriterji u l-proċess għall-istabbiliment ta' lista tal-UE ta' ġurisdizzjonijiet li ma jikkooperawx fi kwistjonijiet ta' tassazzjoni.

L-iskrinjar ta' ġurisdizzjonijiet li ma jikkooperawx mistenni li jitlesta sa Settembru 2017, biex b'hekk il-Kunsill ikun jista' japprova l-lista sa tmiem l-2017. Huwa maħsub biex ikun proċess kontinwu u regolari.

L-inizjattiva hija reazzjoni għall-pakkett ta' proposti tal-Kummissjoni ta' Jannar 2016 biex tipprevjeni l-evitar tat-taxxa korporattiva, kif ukoll għar-rivelazzjonijiet tal-Panama Papers f'April 2016.

“Il-ftehim tal-lum bejn l-istati membri kollha huwa parti essenzjali tal-istrateġija konġunta tal-UE tagħna biex negħlbu l-isfidi globali bħall-erożjoni tal-bażi tat-taxxa u t-trasferiment tal-profitt. Huwa juri li qed nagħmlu progress fl-isforzi tagħna biex inkunu minn ta' quddiem nett f'dan il-qasam. Dan huwa l-ewwel pass kruċjali fil-proċess li ser isir matul l-2017. Ser jibda djalogu ma' dawk il-pajjiż li jonqsu milli jaderixxu mal-kriterji li stabbilixxejna, u huma biss dawk il-ġurisdizzjonijiet li jirrifjutaw li jikkooperaw u jirrifjutaw li jissodisfaw il-kriterji fi żmien mitlub li ser jitqiegħdu fuq l-hekk imsejħa lista sewda. L-għan ewlieni tagħna huwa li nagħtu inċentiv u mhux li nikkastigaw.

Peter Kažimír, ministru għall-finanzi Slovakk u president tal-Kunsill.

Riforma tat‑taxxa korporattiva

Il-Kunsill iddiskuta pakkett ta' proposti li għandhom l-għan li jirriformaw il-mod kif jiġu ntaxxati l-kumpaniji fl-UE.

Il-pakkett jinkludi proposti ġodda għal bażi komuni konsolidata tat-taxxa korporattiva. Il-Kummissjoni tipproponi ġabra unika ta' regoli għall-kalkolu tal-profitti taxxabbli tal-kumpaniji fl-UE kollha, b'dispożizzjonijiet li jimpedixxu l-opportunitajiet għall-evażjoni tat-taxxa korporattiva. Il-pakkett jinkludi wkoll sistema ġdida dwar ir-riżoluzzjoni ta' tilwim dwar taxxa doppja, u miżuri biex jingħalqu d-diskrepanzi ibridi bejn is-sistemi fiskali tal-istati membri u dawk tal-pajjiżi terzi.

Il-ħidma fuq il-proposta bdiet fil-livell tekniku, b’enfasi inizjali fuq il-proposta li tittratta d-diskrepanzi ibridi.

Evażjoni tat-taxxa u ħasil tal-flus

Il-Kunsill qabel dwar proposta li tagħti aċċess lill-awtoritajiet tat-taxxa għal informazzjoni li tkun għand l-awtoritajiet responsabbli għall-prevenzjoni tal-ħasil tal-flus.

Id-direttiva ser tirrikjedi li l-istati membri jippermettu l-aċċess għal informazzjoni dwar is-sjieda benefiċjarja ta’ kumpaniji. Għandha tapplika mill-1 ta' Jannar 2018.

Il-proposta hi waħda minn għadd ta' miżuri ppreżentati mill-Kummissjoni f'Lulju 2016, wara r-rivelazzjonijiet tal-Panama Papers f'April 2016.

Il-Kunsill ser jadotta d-direttiva ladarba l-Parlament Ewropew ikun ħareġ l-opinjoni tiegħu.