Kunsill Affarijiet Ekonomiċi u Finanzjarji, 21/02/2017, 21 ta' Frar 2017

Riżultati ewlenin

Evitar tat-taxxa korporattiva - Diskrepanzi ibridi

Il-Kunsill qabel dwar il-pożizzjoni tiegħu rigward regoli mmirata biex jeliminaw 'diskrepanzi ibridi' mas-sistemi tat-taxxa ta' pajjiżi terzi.

L-abbozz ta' direttiva huwa l-aktar reċenti minn għadd ta' miżuri mfassla biex jipprevjenu l-evitar tat-taxxa minn kumpaniji kbar.

Dan ser iżommhom milli jisfruttaw id-differenzi bejn żewġ ġurisdizzjonijiet jew aktar tat-taxxa biex inaqqsu l-obbligazzjoni ta' taxxa inġenerali tagħhom.

U ser jikkontribwixxi għall-implimentazzjoni tar-rakkomandazzjonijiet tal-OECD tal-2015 li jindirizzaw l-erożjoni tal-bażi tat-taxxa u t-trasferiment tal-profitt (BEPS) korporattiva.

''L-UE tinsab fuq quddiem nett fil-ġlieda kontra l-evitar tat-taxxa'', qal Edward Scicluna, ministru għall-finanzi ta' Malta, li bħalissa għandha l-presidenza tal-Kunsill. ''Irridu niżguraw l-implimentazzjoni koerenti fil-liġi tal-UE tal-pjan ta' azzjoni dwar il-BEPS tal-OECD.''

Il-proposta tindirizza d-diskrepanzi ibridi rigward pajjiżi li mhumiex fl-UE, minħabba li d-differenzi intra-UE huma koperti mid-'direttiva kontra l-evitar tat-taxxa' adottata f'Lulju 2016.

Lista tal-UE ta' ġurisdizzjonijiet li ma jikkooperawx

Il-Kunsill evalwa l-ħidma fuq lista tal-UE ta' ġurisdizzjonijiet ta' pajjiżi terzi li ma jikkooperawx fi kwistjonijiet ta' tassazzjoni.

Din l-inizjattiva ssegwi l-istrateġija esterna tal-UE għat-tassazzjoni u ser tikkontribwixxi għall-isforzi li għaddejjin biex jipprevjenu l-evażjoni tat-taxxa.

''L-għan tagħna li nistabbilixxu lista tal-UE hu li nippromwovu standards tajbin li diġà huma applikabbli fl-UE'', qal is-Sur Scicluna. ''Il-ġurisdizzjonijiet ser ikunu soġġetti għal skrinjar. Huma ser jiġu inklużi fil-lista jekk ikun determinat li l-politiki tat-tassazzjoni tagħhom ma jaqblux mal-istandards minimi tagħna.''

Il-Kunsill huwa mistenni jiffinalizza l-lista ta' ġurisdizzjonijiet li ma jikkooperawx qabel tmiem l-2017.

Il-ħidma qed titwettaq b'mod parallel mill-forum globali tal-OECD dwar it-trasparenza u l-iskambju ta' informazzjoni għal finijiet tat-taxxa.

Kwistjonijiet baġitarji tal-UE

Il-Kunsill stabbilixxa l-prijoritajiet tiegħu għall-baġit tal-UE għall-2018, waqt li appella għal baġit realistiku li joħloq bilanċ ġust bejn il-konsolidament fiskali u l-investimenti ġodda li jwasslu għat-tkabbir u l-impjiegi.

Il-ministri appellaw ukoll biex il-baġit tal-2018 jipprovdi riżorsi adegwati biex ikomplu jappoġġaw prijoritajiet tradizzjonali u li qed jevolvu fi ħdan l-UE, jiġifieri biex jgħinu l-irkupru ekonomiku, jindirizzaw sfidi umanitarji u tas-sigurtà u jonoraw l-impenji li ttieħdu.

Il-Kunsill irrakkomanda wkoll lill-Parlament Ewropew biex jagħti kwittanza lill-Kummissjoni għall-implimentazzjoni tal-baġit tal-UE għall-2015.