Comhairle na nGnóthaí Eacnamaíocha agus Airgeadais, 10/10/2017, 10 Deireadh Fómhair 2017

Na príomhthorthaí

Ghlac an Chomhairle treoir lena dtugtar isteach córas nua chun díospóidí idir na Ballstáit maidir le cánachas dúbailte a réiteach. Leis an treoir, treisítear na sásraí a úsáidtear chun díospóidí idir na Ballstáit a réiteach arb ann dóibh i ngeall ar an léirmhíniú a thugtar ar chomhaontuithe maidir le cánachas dúbailte a dhíchur.

"Is fearr go mór an córas nua seo. Spreagfar an infheistíocht a bhuí leis, trí thimpeallacht chánach a bheidh níos fabhraí a chruthú agus trí na costais a laghdú do ghnóthaí", a dúirt Toomas Tõniste, Aire Airgeadais na hEastóine, an tír ag a bhfuil Uachtaránacht na Comhairle faoi láthair.

Roimh an gcéad chomhdháil eile a bheidh ag na páirtithe atá i gcoinbhinsiún na Náisiún Aontaithe ar an athrú aeráide, a bheidh ar siúl in Bonn i mí na Samhna 2017, ghlac an Chomhairle conclúidí ina leagtar amach seasamh an Aontais Eorpaigh maidir leis an athrú aeráide. Beidh na conclúidí mar shainordú d’idirbheartaithe an Aontais maidir leis na gnéithe maoiniúcháin a bhaineann leis an athrú aeráide. Is cuid í comhdháil Bonn den obair leantach atá ar siúl ar an gcomhaontú domhanda a rinneadh i bPáras i mí na Nollag 2015.

Tá an tAontas gona Bhallstáit tiomanta do ranníocaíochtaí airgeadais phoiblí a mhéadú sna blianta atá amach romhainn. Iarrtar sna conclúidí go mbeidh réimse níos leithne tíortha rannpháirteach agus moltar do thíortha forbartha eile a gcuid gealltanas a chomhlíonadh agus maoiniú príobháideach a spreagadh.

Rinne na hAirí breithniú ar ‘Seimeastar Eorpach’ 2017 go dtí seo, próiseas faireacháin beartais arb é is aidhm leis an cleachtas a dhéanamh níos réidhe agus níos éifeachtaí. Phléigh siad a bhfuil á dhéanamh mar ullmhúchán do chruinnithe G20 agus CAI a thionólfar in Washington i lár mhí Dheireadh Fómhair. Agus thíolaic an Coimisiún pacáiste tograí lena ndéanfaí athchóirú ar chóras CBL an Aontais, mar aon leis an gcur chuige beartais a mhol sé maidir leis an gcánachas agus an geilleagar digiteach.