"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ekonomiċi u Finanzjarji, 9 ta' Novembru 2021
Riżultati ewlenin
Governanza ekonomika u rkupru ekonomiku
Il-ministri kellhom skambju ta' fehmiet dwar l-ekonomija tal-UE wara l-pandemija tal-COVID-19, u dwar l-implikazzjonijiet tal-iżvilupp reċenti għall-governanza ekonomika. Huma ddiskutew il-futur tal-qafas ta' governanza ekonomika tal-UE u taw il-fehmiet inizjali tagħhom dwar it-triq 'il quddiem. Dan is-suġġett ser jiġi diskuss aktar u l-ministri ser ikomplu l-konsultazzjonijiet tagħhom sabiex jilħqu kunsens wiesa' fi żmien debitu.
L-isforzi tagħna biex nagħtu spinta lill-irkupru ekonomiku qed jidħlu fis-seħħ. Ir-rispons tal-UE għall-pandemija qed juri riżultati tajbin. Issa wasal iż-żmien li nirriflettu dwar il-futur tal-governanza ekonomika tagħna. Illum, kellna skambju ta' fehmiet inizjali dwar il-futur tal-politika fiskali. Huwa meħtieġ li nkomplu d-diskussjonijiet u nippruvaw insibu bażi komuni.
Andrej Šircelj, Ministru għall-Finanzi tas-Slovenja
Huma ddiskutew ukoll is-sitwazzjoni attwali rigward il-finanzjament ta' Next Generation EU, pakkett ta' rkupru temporanju biex jgħin jagħti spinta lill-ekonomiji tal-UE wara l-COVID-19, u l-implimentazzjoni tal-Faċilità għall-Irkupru u r-Reżiljenza, il-qofol ta' Next Generation EU li tappoġġa r-riformi u l-investimenti fl-istati membri tal-UE permezz ta' self u għotjiet.
Il-ministri approvaw konklużjonijiet dwar il-futur tas-Semestru Ewropew b'rabta mal-Faċilità għall-Irkupru u r-Reżiljenza. Il-konklużjonijiet jappellaw għar-ritorn tal-elementi essenzjali tas-Semestru Ewropew fiċ-ċiklu tal-2022, b'mod partikolari r-rapporti tal-pajjiżi u r-rakkomandazzjonijiet speċifiċi għall-pajjiżi.
Il-ministri ddiskutew iż-żieda qawwija reċenti fil-prezzijiet tal-enerġija u tal-konsumatur u l-implikazzjonijiet ta' politika assoċjati. Huma kellhom skambju ta' fehmiet dwar is-sett ta' għodod ta' miżuri tal-Kummissjoni li l-UE u l-istati membri tagħha jistgħu jużaw u diġà qed jużaw biex jindirizzaw l-impatt immedjat taż-żidiet fil-prezzijiet tal-enerġija.
Il-ministri għall-ekonomija u l-finanzi kellhom dibattitu ta' orjentazzjoni dwar sett ta' proposti leġiżlattivi mmirati l-aktar lejn l-implimentazzjoni tal-ftehimiet pendenti ta' Basel III, jiġifieri miżuri ta' riforma maħsuba biex jgħinu fit-tisħiħ tar-reżiljenza tas-settur bankarju tal-UE u jsaħħu s-superviżjoni u l-ġestjoni tar-riskju tiegħu. L-iskambju ta' fehmiet kien preċedut minn preżentazzjoni ta' dan il-pakkett ta' proposti mill-Kummissjoni.
Il-presidenza Slovena pprovdiet ukoll informazzjoni dwar il-proposti leġiżlattivi attwali dwar is-servizzi finanzjarji.
Laqgħat internazzjonali
Il-presidenza Slovena u l-Kummissjoni Ewropea pprovdew informazzjoni u segwu l-laqgħat tal-ministri għall-finanzi u l-gvernaturi tal-banek ċentrali tal-G20 u dwar il-laqgħat annwali tal-FMI tat-13 u l-14 ta' Ottubru 2021.
Affarijiet oħra
Il-Qorti Ewropea tal-Awdituri ppreżentat ir-rapport annwali tagħha dwar l-implimentazzjoni tal-baġit tal-UE għas-sena finanzjarja 2020.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-isforzi tagħna biex nagħtu spinta lill-irkupru ekonomiku qed jidħlu fis-seħħ. Ir-rispons tal-UE għall-pandemija qed juri riżultati tajbin. Issa wasal iż-żmien li nirriflettu dwar il-futur tal-governanza ekonomika tagħna. Illum, kellna skambju ta' fehmiet inizjali dwar il-futur tal-politika fiskali. Huwa meħtieġ li nkomplu d-diskussjonijiet u nippruvaw insibu bażi komuni.
