"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ekonomiċi u Finanzjarji, 18 ta' Jannar 2022
Riżultati ewlenin
Il-prijoritajiet tal-Presidenza Franċiża
Il-presidenza Franċiża ppreżentat il-prijoritajiet tagħha għall-affarijiet ekonomiċi u finanzjarji għall-ewwel nofs tal-2022. Dan ġie segwit minn skambju ta' fehmiet tal-ministri.
L-Ewropa rnexxielha tirkupra mill-agħar kriżi ekonomika mill-1929 'l hawn. Ħadna l-azzjoni t-tajba fil-ħin opportun. Madankollu, il-kriżi wrietna li huwa meħtieġ li jinbena mudell ekonomiku ġdid, ibbażat fuq awtonomija strateġika. X'tip ta' Ewropa rridu nibnu? Irridu Ewropa indipendenti li tkun kapaċi tiddefendi l-valuri tagħha, tippromwovi l-investiment fl-innovazzjoni u t-teknoloġiji ewlenin, u tipproteġi l-ambjent. Irridu nibnu mudell ġdid ibbażat fuq it-tkabbir sostenibbli.
Bruno Le Maire, Ministru Franċiż għall-Affarijiet Ekonomiċi, il-Finanzi u l-Irkupru
Il-ministri kellhom dibattitu ta' orjentazzjoni dwar id-direttiva tal-Kunsill proposta dwar l-iżgurar ta' livell minimu globali ta' tassazzjoni għall-gruppi multinazzjonali fl-Unjoni. Dan wara li l-Kummissjoni ressqet il-proposta tagħha għal direttiva fl-aħħar ta' Diċembru. Il-Presidenza Franċiża għalhekk ħadet l-ewwel opportunità biex tavvanza l-ħidma fil-livell tal-Kunsill.
Fl-interventi tagħhom, il-ministri kkonfermaw in-natura prijoritarja ta' dan il-fajl u l-ħtieġa li r-regoli maqbula dwar it-tassazzjoni korporattiva internazzjonali jiġu trasposti malajr kemm jista' jkun.
L-għan tad-direttiva huwa li tittrasponi l-Qafas Inklużiv (IF) globali tal-OECD/G20 dwar l-erożjoni tal-bażi tat-taxxa u trasferiment tal-profitti (BEPS) dwar riforma b'żewġ pilastri tar-regoli dwar it-tassazzjoni korporattiva internazzjonali fil-liġi tal-UE. Dan il-ftehim internazzjonali, li jiġbor flimkien 137 pajjiż u ġuriżdizzjoni, jikkostitwixxi pass importanti lejn sistema effettiva u ġusta ta' tassazzjoni fuq il-profitti. Id-direttiva tikkonċerna l-hekk imsejjaħ "Tieni Pilastru" tar-riforma, li jippreċedi l-"Ewwel Pilastru", li fuqu għadha għaddejja ħidma teknika fil-qafas inklużiv dwar il-BEPS tal-OECD.
Il-ftehim tat-8 ta' Ottubru 2021 huwa suċċess għall-komunità internazzjonali u, fuq kollox, suċċess Ewropew. Dan ser jipprovdi ġustizzja, effiċjenza u stabbiltà għan-negozji u ċ-ċittadini tagħna. Ninsab kuntent ħafna li mid-diskussjoni tal-lum nikkonkludu li lkoll naqsmu x-xewqa li nagħmlu progress rapidu. L-UE tinsab fuq quddiem nett ta' din ir-riforma storika u din hija aħbar tajba.
Bruno Le Maire, Ministru Franċiż għall-Affarijiet Ekonomiċi, il-Finanzi u l-Irkupru
The Council gave political guidance on new taxation rules for big multinational companies
Irkupru ekonomiku
Il-ministri għall-ekonomija u l-finanzi ddiskutew is-sitwazzjoni attwali tal-implimentazzjoni tal-Faċilità għall-Irkupru u r-Reżiljenza (RRF).
F'dan l-istadju, il-valutazzjonijiet tal-Kummissjoni tal-Pjanijiet għall-Irkupru u r-Reżiljenza (RRPs) għal ħames stati membri għadhom pendenti. Wieħed minn dawn il-ħames stati membri għad irid jippreżenta l-RRP tiegħu. Il-Kunsill aġixxa malajr fuq il-proposti tal-Kummissjoni u adotta deċiżjonijiet ta' implimentazzjoni tal-Kunsill li japprovaw il-valutazzjonijiet ta' 22 pjan fiż-żmien qasir stabbilit fir-regolament. Il-Kummissjoni qiegħda f'diskussjonijiet mal-Bulgarija, l-Ungerija, il-Polonja u l-Iżvezja dwar il-valutazzjoni tal-RRPs tagħhom.
S'issa, 18-il stat membru rċevew prefinanzjament (13% tal-ammonti mitluba) għal total ta' €54.2 biljun. Biex tiffinanzja l-pjanijiet, il-Kummissjoni diġà ssellfet €71 biljun permezz ta' strumenti fit-tul u €28 biljun permezz ta' strumenti għal żmien qasir fis-swieq finanzjarji.
L-RRF hija strument temporanju ta' rkupru li jippermetti lill-Kummissjoni toħroġ dejn f'isem l-Unjoni biex tgħin lill-Istati Membri jimplimentaw ir-riformi u l-investimenti. Dan jagħmel €723.8 biljun (fi prezzijiet attwali) disponibbli f'self (€385.8 biljun) u għotjiet (€338 biljun).
Fl-interventi tagħhom, ħafna ministri enfasizzaw l-importanza ta' żborż rapidu lill-istati membri. Il-Kunsill jistenna li l-parti l-kbira tal-implimentazzjoni tal-RRF issir fl-2022.
Illum l-Ewropa hija aktar b'saħħitha milli kienet qabel il-kriżi. Urejna lid-dinja l-għaqda u s-solidarjetà tagħna bi ftehim storiku dwar pakkett ta' rkupru ta' €750 biljun.
Issa għandna 22 pjan għall-irkupru u r-reżiljenza approvati u 18 minn dawn l-istati membri rċevew prefinanzjament għal total ta' €54.2 biljun. Din hija aħbar tajba. Irridu nżommu dan il-momentum politiku u nkomplu ninvestu fil-futur tagħna.
Bruno Le Maire, Ministru Franċiż għall-Affarijiet Ekonomiċi, il-Finanzi u l-Irkupru
Fond għall-irkupru: l-UE tagħti riżultati (Infografika)
Semestru Ewropew 2022
Il-Kunsill beda l-proċess annwali tas-"Semestru Ewropew" għall-monitoraġġ tal-politiki ekonomiċi, tal-impjieg u fiskali tal-istati membri. Huwa adotta konklużjonijiet dwar ir-rapport dwar il-mekkaniżmu ta' twissija għall-2022, kif ukoll konklużjonijiet dwar l-istħarriġ annwali dwar it-tkabbir sostenibbli tal-2022. Huwa approva r-rakkomandazzjoni tal-2022 dwar il-politika ekonomika taż-żona tal-euro (EAR). L-EAR ser tiġi ppreżentata għall-approvazzjoni lill-Kunsill Ewropew f'Marzu 2022 qabel ma tkun tista' tiġi adottata mill-Kunsill f'waħda mil-laqgħat tiegħu li jmiss tal-Ecofin.
Il-ministri taw gwida għal aktar ħidma dwar it-Termini ta' Referenza tal-UE għall-G20, u b'hekk avvanzaw it-tħejjijiet għal-laqgħa tal-ministri tal-finanzi u l-gvernaturi tal-banek ċentrali tal-G20 skedata għas-17 u t-18 ta' Frar 2022 fl-Indoneżja.
Affarijiet oħra
Taħt affarijiet oħra, il-Presidenza aġġornat lill-ministri dwar proposti leġiżlattivi fil-qasam tas-servizzi finanzjarji. Id-delegazzjoni Ġermaniża aġġornat lill-ministri dwar il-prijoritajiet tal-Presidenza tal-G7. Il-ministri ġew aġġornati wkoll dwar l-aħħar rapport ta' investiment tal-BEI.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-Ewropa rnexxielha tirkupra mill-agħar kriżi ekonomika mill-1929 'l hawn. Ħadna l-azzjoni t-tajba fil-ħin opportun. Madankollu, il-kriżi wrietna li huwa meħtieġ li jinbena mudell ekonomiku ġdid, ibbażat fuq awtonomija strateġika. X'tip ta' Ewropa rridu nibnu? Irridu Ewropa indipendenti li tkun kapaċi tiddefendi l-valuri tagħha, tippromwovi l-investiment fl-innovazzjoni u t-teknoloġiji ewlenin, u tipproteġi l-ambjent. Irridu nibnu mudell ġdid ibbażat fuq it-tkabbir sostenibbli.
