"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ekonomiċi u Finanzjarji, 7 ta' Diċembru 2021
Riżultati ewlenin
Rati tal-VAT
Il-ministri qablu dwar proposta għal direttiva tal-Kunsill dwar ir-rati tat-taxxa fuq il-valur miżjud (VAT). L-aġġornamenti għal-leġiżlazzjoni għandhom l-għan li jiżguraw li l-istati membri jiġu ttrattati b'mod ugwali u jagħtuhom aktar flessibbiltà biex japplikaw rati tal-VAT imnaqqsa u żero. Ir-regoli għandhom l-għan ukoll li jeliminaw gradwalment it-trattamenti preferenzjali għal oġġetti li jagħmlu ħsara lill-ambjent.
Illum, qbilna dwar il-proposta għal direttiva tal-Kunsill dwar ir-rati tat-taxxa fuq il-valur miżjud. Dan il-fajl ilu jiġi diskuss fil-Kunsill għal żmien twil, u ninsab kuntent li sibna mod kif nikkonkluduh.
Andrej Šircelj, Ministru għall-Finanzi tas-Slovenja
Ir-regoli l-ġodda għandhom l-għan li jirriflettu l-ħtiġijiet attwali tal-istati membri u l-objettivi ta' politika attwali tal-UE, li nbidlu b'mod konsiderevoli minn meta kienu ġew stabbiliti r-regoli l-antiki.
Il-ġlieda kontra l-ħasil tal-flus u l-finanzjament tat-terroriżmu
Il-Kunsill ħa nota tar-rapport ta' progress tal-presidenza dwar il-pakkett leġiżlattiv dwar il-ġlieda kontra l-ħasil tal-flus u l-finanzjament tat-terroriżmu.
Fl-1 ta' Diċembru 2021 l-ambaxxaturi għall-UE qablu dwar mandat biex jinnegozjaw mal-Parlament Ewropew dwar waħda mill-proposti tal-pakkett, dwar aġġornament tar-regoli eżistenti dwar l-informazzjoni li takkumpanja t-trasferimenti ta' fondi. L-aġġornament għandu l-għan li jestendi l-kamp ta' applikazzjoni tar-regoli għal ċerti kriptoassi.
Il-proposti l-oħra tal-pakkett għadhom qed jiġu kkunsidrati fil-Kunsill.
Il-presidenza infurmat lill-ministri dwar is-sitwazzjoni attwali tal-pakkett dwar il-finanzi diġitali. Fl-24 ta' Novembru 2021, il-Kunsill adotta l-pożizzjoni tiegħu dwar proposta għal Regolament dwar is-Swieq fil-Kriptoassi (MiCA) u proposta għal Att dwar ir-Reżiljenza Operazzjonali Diġitali (DORA). Dan il-ftehim jifforma l-mandat ta' negozjar tal-Kunsill għan-negozjati tat-trilogu mal-Parlament Ewropew.
Fl-24 ta' Novembru 2021, il-presidenza u n-negozjaturi tal-Parlament Ewropew laħqu qbil proviżorju fil-livell politiku dwar reġim pilota għall-infrastrutturi tas-suq ibbażat fuq teknoloġija ta' reġistru distribwit (DLT). Id-dettalji tal-ftehim ser jiġu rranġati fil-livell tekniku u wara dan l-ambaxxaturi tal-istati membri għall-UE ser japprovaw il-ftehim, qabel ma titnieda l-proċedura formali ta' adozzjoni mill-Kunsill u mill-Parlament Ewropew.
Il-ministri evalwaw il-progress fit-tisħiħ tal-Unjoni Bankarja abbażi ta' rapport tal-presidenza li jkopri d-diskussjonijiet li saru fil-grupp ta' ħidma ad hoc tal-Kunsill dwar it-tisħiħ tal-Unjoni Bankarja matul it-tieni semestru tal-2021.
Il-ministri kellhom l-ewwel skambju ta' fehmiet dwar il-proposti leġiżlattivi fil-qasam tal-Unjoni tas-Swieq Kapitali (CMU) ippreżentati mill-Kummissjoni fil-25 ta' Novembru.
Il-pakkett tas-CMU, magħmul minn komunikazzjoni biex tevalwa l-pjan ta' azzjoni u seba' leġiżlazzjonijiet settorjali li jistgħu jinġabru f'erba' blokok leġiżlattivi differenti: AIFMD; ELTIF; ESAP; MiFID/MiFIR. L-għan tal-pakkett leġiżlattiv huwa li l-kumpaniji tal-UE jiġu konnessi aħjar mal-investituri u jitjieb l-aċċess tagħhom għall-finanzjament, kif ukoll jitwessgħu l-opportunitajiet ta' investiment għall-investituri fil-livell tal-konsumatur u jiġu integrati aħjar is-swieq kapitali.
Il-ministri evalwaw l-implimentazzjoni tal-Faċilità għall-Irkupru u r-Reżiljenza (RRF).
L-implimentazzjoni tal-Faċilità qed timxi sew. Ġew approvati 22 pjan ta' rkupru mill-Kunsill. B'mod ġenerali, il-pjanijiet approvati s'issa jirrappreżentaw €291 biljun f'finanzjament mhux ripagabbli u €154 biljun f'self. 18-il stat membru diġà rċevew il-flus tal-prefinanzjament b'valur totali ta' aktar minn €54.2 biljun biex jappoġġaw l-ekonomiji tagħhom abbażi tat-tranżizzjoni ekoloġika u t-trasformazzjoni diġitali.
Andrej Šircelj, Ministru għall-Finanzi tas-Slovenja
L-istati membri kollha minbarra n-Netherlands ippreżentaw il-Pjanijiet għall-Irkupru u r-Reżiljenza (RRPs) tagħhom.
Il-Kunsill adotta 22 deċiżjoni ta' implimentazzjoni tal-Kunsill li japprovaw il-valutazzjonijiet tal-Kummissjoni tal-RRPs u diġà żborża aktar minn €50 biljun ta' prefinanzjament biex jagħti spinta għall-bidu tal-investimenti u r-riformi.
Fond għall-irkupru: l-UE tagħti riżultati (Infografika)
Semestru Ewropew
Il-ministri ddiskutew iċ-ċiklu tas-Semestru Ewropew 2022, inkluż stħarriġ annwali dwar it-tkabbir sostenibbli tal-2022, rapport dwar il-mekkaniżmu ta' twissija tal-2022 u rakkomandazzjoni dwar il-politika ekonomika taż-żona tal-euro, bħala parti mill-pakkett tal-ħarifa ppreżentat mill-Kummissjoni Ewropea fl-24 ta' Novembru 2021.
Il-President tal-Bord Fiskali Ewropew ippreżenta r-rapport annwali tal-2021 tal-Bord Fiskali Ewropew dwar l-iżviluppi reċenti fil-politika fiskali fl-UE.
Fl-10 ta' Novembru 2021, il-Bord Fiskali Ewropew ippubblika l-ħames rapport annwali tiegħu. Ir-rapport jivvaluta l-implimentazzjoni tal-qafas fiskali tal-UE matul l-ewwel sena tal-pandemija tal-COVID-19 u jfakkar fil-proposti tiegħu għat-titjib tal-governanza fiskali fl-isfond tat-tnedija mill-ġdid tar-rieżami tal-governanza ekonomika mill-Kummissjoni.
Il-ministri qablu li jżidu dikjarazzjoni mal-minuti tal-Kunsill dwar iż-żieda tal-persunal tal-Parlament Ewropew fil-baġit għall-2022.
Fit-23 ta' Novembru, il-Kunsill adotta l-baġit ġenerali tal-UE għall-2022 wara qbil li ntlaħaq mal-Parlament Ewropew fis-16 ta' Novembru 2021. Il-baġit tas-sena d-dieħla jistabbilixxi l-impenji totali għal €169.5 biljun u l-pagamenti għal €170.6 biljun.
Rapport lill-Kunsill Ewropew dwar kwistjonijiet ta' taxxa
Minn Ġunju 2012, il-Kunsill beda jħejji rapporti biannwali lill-Kunsill Ewropew dwar kwistjonijiet ta' taxxa. Dawn ir-rapporti huma maqbula fil-korpi preparatorji tal-Kunsill, u b'mod aktar speċifiku fil-grupp ta' ħidma dwar kwistjonijiet ta' taxxa.
Il-ministri ħadu nota mingħajr diskussjonijiet tar-rapport tal-presidenza dwar il-progress li ntlaħaq fil-proposti dwar il-pakkett "Lesti għall-mira ta' 55%", b'attenzjoni partikolari għall-proposti għal mekkaniżmu ta' aġġustament tal-karbonju fil-fruntieri u rieżami tad-direttiva dwar it-tassazzjoni fuq l-enerġija.
Wara r-riżenja ta' Magdalena Andersson mill-pożizzjoni ta' President tal-IMFC, il-ministri għall-finanzi u l-ekonomija appoġġaw lil Nadia Calviño, Viċi Prim Ministru ta' Spanja bħala l-kandidat il-ġdid tal-UE għall-pożizzjoni ta' President tal-Kumitat Monetarju u Finanzjarju Internazzjonali (IMFC) tal-FMI. Nadia Calviño issa ser tapplika għall-pożizzjoni permezz tal-proċeduri applikabbli fl-FMI.
Il-Kunsill adotta wkoll mingħajr diskussjoni l-punti li jidhru fil-listi ta' punti A leġiżlattivi u mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Illum, qbilna dwar il-proposta għal direttiva tal-Kunsill dwar ir-rati tat-taxxa fuq il-valur miżjud. Dan il-fajl ilu jiġi diskuss fil-Kunsill għal żmien twil, u ninsab kuntent li sibna mod kif nikkonkluduh.
