Kunsill Affarijiet Ekonomiċi u Finanzjarji, 5 ta' Ottubru 2021

Riżultati ewlenin

Irkupru ekonomiku

Il-ministri għall-ekonomija u l-finanzi ddiskutew l-implimentazzjoni tal-Faċilità għall-Irkupru u r-Reżiljenza (RRF) u adottaw deċiżjoni ta' implimentazzjoni tal-Kunsill li tapprova l-pjan nazzjonali għall-irkupru u r-reżiljenza għal Malta. B'54 % tal-allokazzjoni totali tal-pjan iddedikat għall-objettivi klimatiċi u 26 % għal miżuri li jappoġġaw id-diġitalizzazzjoni, dan ipoġġi enfasi qawwija fuq it-tranżizzjoni ekoloġika u diġitali.

• Il-Kunsill japprova l-pjan ta' rkupru ta' Malta (stqarrija għall-istampa, 5 ta' Ottubru 2021)

Il-ministri kellhom skambju ta' fehmiet dwar is-sitwazzjoni attwali rigward SURE, strument Ewropew għall-għoti ta' appoġġ temporanju biex jittaffew ir-riskji tal-qgħad f'emerġenza, li tnieda bħala parti mir-rispons tal-UE għall-pandemija tal-COVID-19. S'issa, l-UE pprovdiet kważi €90 biljun f'appoġġ lil 19-il stat membru biex tgħinhom jipproteġu l-impjiegi u d-dħul tal-ħaddiema. SURE huwa stmat li appoġġa madwar 31 miljun persuna u 2.5 miljun ditta fl-2020.

• It-tieni rapporti dwar l-implimentazzjoni ta' SURE (Kummissjoni Ewropea)

L-irkupru ekonomiku Ewropew miexi tajjeb. Irreaġixxejna għall-isfidi li l-pandemija ħolqot għall-ekonomija tagħna b'mod deċiżiv u f'waqtu. Issa għandna 19-il pjan għall-irkupru u r-reżiljenza approvati u kważi dawn l-istati membri kollha rċevew il-prefinanzjament mitlub minnhom. Strument ieħor tal-UE, SURE, wera li kellu suċċess kbir fil-protezzjoni tal-impjiegi u l-għajxien taċ-ċittadini tagħna matul il-pandemija. Irridu nżommu dan il-momentum u niżguraw li l-irkupru jibqa' b'saħħtu.

Andrej Šircelj, Ministru għall-Finanzi tas-Slovenja

Il-ministri kellhom ukoll skambju ta' fehmiet dwar it-tagħlimiet meħuda mis-Semestru Ewropew 2021 u dwar it-triq 'il quddiem possibbli fil-kuntest tal-pjanijiet nazzjonali ta' rkupru. Id-diskussjoni ffokat fuq il-possibbiltajiet ta' allinjament tal-implimentazzjoni tal-RRF maċ-ċiklu li jmiss tas-Semestru Ewropew.

Tħejjijiet għal-laqgħat internazzjonali

Il-ministri għall-ekonomija u l-affarijiet finanzjarji komplew it-tħejjijiet għal-laqgħa tal-ministri għall-finanzi u l-gvernaturi tal-banek ċentrali tal-G20 skedata għat-13-14 ta' Ottubru 2021, u għal-laqgħa annwali tal-FMI. F'dan il-kuntest, approvaw it-termini ta' referenza tal-UE għall-G20 u d-dikjarazzjoni lill-Kumitat Monetarju u Finanzjarju Internazzjonali (IMFC).

Il-ministri approvaw ukoll konklużjonijiet dwar il-finanzjament għall-klima qabel is-26 Konferenza tal-Partijiet għall-Konvenzjoni Qafas tan-Nazzjonijiet Uniti dwar it-Tibdil fil-Klima (COP26) fi Glasgow. Il-konklużjonijiet jenfasizzaw l-appoġġ qawwi kontinwu mill-UE u l-istati membri tagħha għall-implimentazzjoni tal-għanijiet tal-Ftehim ta' Pariġi. Huma jenfasizzaw ukoll l-impenn tagħhom li jżidu l-kontribuzzjoni tagħhom għall-finanzjament internazzjonali għall-klima kif ukoll il-ħtieġa li tissaħħaħ il-mobilizzazzjoni tal-finanzjament privat f'dawn l-isforzi.

• Konklużjonijiet tal-Kunsill ECOFIN dwar il-finanzjament għall-klima

Leġiżlazzjoni dwar is-servizzi finanzjarji

Il-ministri għall-ekonomija u l-affarijiet finanzjarji ġew mistiedna jesprimu l-fehmiet tagħhom dwar ir-reviżjoni tar-regoli prudenzjali għall-kumpaniji tal-assigurazzjoni u tar-riassigurazzjoni, fil-qafas ta' Solvenza II. Id-dibattitu ġie preċedut mill-preżentazzjoni mill-Kummissjoni tal-proposti l-ġodda tagħha għar-reviżjoni ta' Solvenza II.

• Ġestjoni tar-riskju u s-superviżjoni tal-kumpaniji tal-assigurazzjoni (Solvenza II) (informazzjoni ġenerali, Kummissjoni Ewropea)

Taħt affarijiet oħra, il-presidenza Slovena tat aġġornament rigward il-proposti leġiżlattivi attwali dwar is-servizzi finanzjarji u l-Kummissjoni aġġornat lill-ministri rigward l-implimentazzjoni tal-leġiżlazzjoni dwar is-servizzi finanzjarji.