Grupp tal-Euro, 05/05/2014, 5 ta' Mejju 2014

Il-Portugall jagħżel ħruġ "nadif" mill-programm 

Il-Grupp tal-Euro laqa' d-deċiżjoni tal-gvern Portugiż li joħroġ mill-programm ta' aġġustament ekonomiku tiegħu mingħajr ebda appoġġ ieħor. 

Il-Grupp tal-Euro appoġġa d-deċiżjoni tal-Portugall li ma jitlob ebda programm ta' segwitu.  Din id-deċiżjoni ssegwi l-konklużjoni b'suċċess tal-aħħar missjoni ta' rieżami tal-programm Portugiż mill-Kummissjoni, il-BĊE u l-FMI.  Il-ministri faħħru lill-awtoritajiet Portugiżi għall-implimentazzjoni b'suċċess tal-programm u lill-poplu Portugiż għall-kisbiet tiegħu f'ċirkostanzi diffiċli. 

Il-Grupp tal-Euro kkonkluda li l-programm ħoloq il-kondizzjonijiet it-tajbin biex il-Portugall jirritorna għat-tkabbir sostenibbli u l-ħolqien tal-impjiegi.  L-irkupru ekonomiku tal-Portugall qed jissaħħaħ.  Riformi strutturali fuq firxa wiesgħa għamlu lill-ekonomija aktar flessibbli u kompetittiva. L-aġġustament fiskali kien konsiderevoli u reġgħet inkisbet il-fiduċja tal-investituri. 

Il-Grupp tal-Euro ħeġġeġ lill-Portugall biex ikompli bir-riformi maħsuba biex ikomplu jtejbu l-kapaċità tal-ekonomija li tiġġenera l-impjiegi u t-tkabbir.  Intlaqa' favorevolment l-impenn tal-Portugall biex isostni politika fiskali prudenti.

Prospetti ġodda ta' tkabbir għall-Greċja

Il-Grupp tal-Euro ddiskuta l-iżviluppi pożittivi fil-Greċja. 

Fl-2013 il-prestazzjoni fiskali kienet waħda b'saħħitha u nkiseb bilanċ pożittiv primarju. Ir-ritorn tal-Greċja u tal-banek Griegi għas-swieq internazzjonali tal-kapital tqies bħala sinjal li l-fiduċja fis-swieq qed tiżdied.

L-awtoritajiet Griegi ppreżentaw l-istrateġija komprensiva fit-tul tagħhom għat-tkabbir.  Din intlaqgħet mill-Grupp tal-Euro bħala komplement utli għall-programm eżistenti. Matul ir-rieżami li jmiss tal-programm, ser jitqiesu miżuri biex tittejjeb is-sostenibbiltà tad-dejn tal-Greċja.   

Il-Grupp tal-Euro jwettaq rieżami tal-abbozzi tal-baġits tal-Awstrija u l-Ġermanja

Il-ministri kkunsidraw il-valutazzjoni mill-Kummissjoni tal-abbozzi tal-baġits tal-Ġermanja u l-Awstrija.  Huma qablu mal-valutazzjoni li l-Ġermanja hija konformi b'mod sħiħ mar-regoli tal-Patt ta' Stabbiltà u Tkabbir (PST).

Il-Grupp tal-Euro laqa' l-korrezzjoni tad-defiċit nominali tal-Awstrija iżda qabel mat-tħassib tal-Kummissjoni li l-abbozz tal-baġit tal-Awstrija seta' jwassal biex il-baġit strutturali tagħha jiddevja mit-triq ta' aġġustament skont il-PST. 

Il-Grupp tal-Euro laqa' l-impenn mill-Gvern Awstrijak li jieħu aktar miżuri biex jindirizza dan it-tħassib u stieden lill-Kummissjoni tivvaluta jekk humiex adegwati.  Il-ministri talbu lill-Kummissjoni u lill-gvern Awstrijak biex jaħdmu flimkien biex jikkonkludu malajr dan il-proċess ta' valutazzjoni.

• Ritratti u filmati tal-laqgħa tal-Grupp tal-euro, 5 ta' Mejju 2014