Grupp tal-Euro, 13/07/2015, 13 ta' Lulju 2015

Riżultati ewlenin

Greċja

Il-ministri kellhom diskussjoni ta’ segwitu dwar il-ftehim innegozjat fil-Grupp tal-Euro u s-Summit taż-Żona tal-Euro matul l-aħħar jumejn, wara t-talba mill-Greċja għal għajnuna finanzjarja mill-Mekkaniżmu Ewropew ta’ Stabbiltà, li saret fid-9 ta’ Lulju 2015.

Fit-13 ta’ Lulju, il-mexxejja taż-żona tal-euro qablu dwar ġabra ta’ miżuri li għandhom jiġu implimentati qabel ma jkunu jistgħu jibdew in-negozjati formali dwar programm ġdid tal-MES.

Il-passi li jmiss

Il-President ippreżenta fil-qosor il-passi li jmiss li mistennija li jittieħdu skont dan il-ftehim:

• Sal-Erbgħa (15 ta’ Lulju) il-Greċja hija mistennija timplimenta l-ewwel ġabra ta’ miżuri deskritti fid-dikjarazzjoni tas-Summit taż-Żona tal-Euro
• Imbagħad jibdew il-proċeduri nazzjonali, li huma meħtieġa biex jawtorizzaw il-bidu tan-negozjati dwar il-programm
• Wara l-proċeduri nazzjonali, il-Grupp tal-Euro ikun jista' jagħti lill-istituzzjonijiet mandat biex jibdew in-negozjati mal-awtoritajiet Griegi dwar Memorandum ta’ Qbil ġdid
• B’mod parallel man-negozjati, l-awtoritajiet Griegi ser ikomplu jimplimentaw il-miżuri miftiehma
• Imbagħad tittieħed id-deċiżjoni formali finali dwar il-programm tal-MES.

Finanzjament transitorju

Il-Grupp tal-Euro ddeċieda li jwaqqaf grupp ta’ ħidma ad-hoc magħmul minn esperti li ser jesplora l-għażliet kollha possibbli u jirrapporta aktar tard din il-ġimgħa. Il-Grupp tal-Euro mbagħad ser ikollu konferenza telefonika dwar din il-kwistjoni biex jiddeċiedi dwar il-passi li jmiss. 

• Laqgħa tas-Summit taż-Żona tal-Euro, 12 ta' Lulju 2015
• Dikjarazzjoni tas-Summit taż-Żona tal-Euro, Brussell, 12 ta' Lulju 2015
• Laqgħa tal-Grupp tal-Euro, 12 ta' Lulju 2015

Segwitu għall-Kunsill Ewropew ta' Ġunju: ir-Rapport tal-ħames presidenti

Il-ministri qasmu l-fehmiet tagħhom dwar ir-Rapport tal-ħames presidenti, li jiddeskrivi pjan biex tkompli tissaħħaħ l-Unjoni Ekonomika u Monetarja (UEM). Huma esprimew appoġġ qawwi għat-teħid ta’ passi ‘l quddiem f’dan il-proċess. Id-diskussjoni ser tkompli fil-laqgħa tal-Kunsill Ecofin fl-14 ta’ Lulju 2015.

• Nikkompletaw l-Unjoni Ekonomika u Monetarja tal-Ewropa (informazzjoni ġenerali)
• Laqgħa tal-Kunsill Affarijiet Ekonomiċi u Finanzjarji tal-14 ta' Lulju 2015

Rieżami tal-patt fiskali: valutazzjoni tad-dispożizzjonijiet nazzjonali

Il-Kummissjoni Ewropea għarrfet lill-Grupp tal-Euro dwar l-analiżi li qed tagħmel dwar kif l-istati membri li huma firmatarji tat-Trattat dwar l-Istabbiltà, il-Koordinazzjoni u l-Governanza (magħruf bħala l-‘patt fiskali’) qed jittrasponu d-dispożizzjonijiet tal-patt dwar baġit ibbilanċjat fil-liġi nazzjonali. Il-Grupp tal-Euro ser jerġa' jiddiskuti din il-kwistjoni f’Settembru 2015.

• It-Trattat dwar l-Istabbiltà, il-Koordinazzjoni u l-Governanza (TSKG)

Elezzjoni tal-President tal-Grupp tal-Euro

Il-Grupp tal-Euro eleġġa mill-ġdid lill-Ministru tal-Finanzi Olandiż Jeroen Dijsselbloem bħala l-President tiegħu għat-tieni terminu ta’ sentejn u nofs. 

• Eurogroup statement on the appointment of the President of the Eurogroup
• Il-President tal-Grupp tal-Euro