Il-Grupp tal-Euro, 07/03/2016, 7 ta' Marzu 2016

Riżultati ewlenin

Greċja: is-sitwazzjoni attwali

Il-Grupp tal-Euro ddiskuta s-sitwazzjoni attwali tal-ewwel reviżjoni li għaddejja bħalissa tal-implimentazzjoni tal-programm ta’ aġġustament ekonomiku tal-Greċja. Il-ministri ġew informati li l-kapijiet tal-missjoni tal-istituzzjonijiet ser jirritornaw Ateni dalwaqt.

Il-Grupp tal-Euro appella lill-awtoritajiet Griegi u lill-persunal tal-missjoni ta' reviżjoni biex ikomplu l-kooperazzjoni kostruttiva tagħhom biex ir-reviżjoni tkun tista' tiġi konkluża malajr. Ir-reviżjoni tkopri kwistjonijiet bħar-riforma tal-pensjonijiet, l-istrateġija fiskali u l-ħidma bil-għan li l-fond ta’ privatizzazzjoni jsir operattiv.

• Greċja: it-tielet programm ta' aġġustament ekonomiku
• Skeda ta' żmien: it-tielet programm ta' aġġustament ekonomiku għall-Greċja

Ċipru: is-sitwazzjoni attwali

Il-Grupp tal-Euro kellu skambju ta’ fehmiet dwar l-implimentazzjoni tal-programm ta’ aġġustament tal-Mekkaniżmu Ewropew ta’ Stabbiltà għal Ċipru, li jiskadi fil-31 ta’ Marzu 2016. Il-Grupp tal-Euro ppubblika dikjarazzjoni li tappoġġa d-deċiżjoni tal-awtoritajiet ta' Ċipru li joħorġu mill-programm mingħajr programm suċċessur.

Ċipru implimenta b’suċċess għadd ta’ riformi skont il-programm, inklużi konsolidazzjoni fiskali u riformi strutturali u finanzjarji ambizzjużi. Dan ippermetta li l-pajjiż jerġa’ jikseb il-fiduċja tal-investituri u jżid il-likwidità fis-suq tal-bonds sovrani.

Il-Grupp tal-Euro laqa’ l-impenn tal-awtoritajiet biex ir-ritmu tar-riforma jinżamm.

• Programm ta’ aġġustament ekonomiku għal Ċipru
• Dikjarazzjoni tal-Grupp tal-Euro dwar Ċipru

Segwitu għall-abbozz tal-pjanijiet baġitarji tal-2016

Il-ministri vvalutaw il-progress li sar mill-istati membri taż-żona tal-euro fl-implimentazzjoni tal-abbozzi tal-pjanijiet baġitarji tagħhom għall-2016 u l-impenji li jinsabu fid-dikjarazzjoni tal-Grupp tal-Euro tat-23 ta’ Novembru 2015. Il-Grupp tal-Euro ħareġ dikjarazzjoni ġdida.

L-abbozzi tal-pjanijiet baġitarji ta’ 7 stati membri huma kkunsidrati li qegħdin f’riskju ta’ nonkonformità mar-regoli fiskali tal-Patt ta’ Stabbiltà u Tkabbir. L-istati membri affermaw mill-ġdid l-impenn tagħhom li jiżguraw il-konformità ma’ dawn ir-regoli.

Il-Grupp tal-Euro ser ikompli jissorvelja s-sitwazzjoni baġitarja fiż-żona tal-euro u ser jerġa' jindirizza l-kwistjoni aktar tard din ir-rebbiegħa.

• Dikjarazzjoni tal-Grupp tal-Euro dwar is-segwitu tal-Abbozz tal-Pjanijiet Baġitarji għall-2016
• Abbozz ta' pjan baġitarju tal-istati membri taż-żona tal-euro
• Laqgħa tal-Grupp tal-Euro, 23 ta' Novembru 2015

Valutazzjoni komparattiva: il-kunċett u l-applikazzjoni fiż-żona tal-euro

Il-ministri kellhom skambju ta’ fehmiet dwar esperjenzi relatati mad-diskussjonijiet tematiċi tal-Grupp tal-Euro dwar kwistjonijiet strutturali fiż-żona tal-euro. L-għan ta’ dawn id-dibattiti huwa li jikkontribwixxu għall-implimentazzjoni tar-rakkomandazzjonijiet maħruġa għaż-żona tal-euro u l-istati membri tagħha taħt is-Semestru Ewropew u javvanzawhom.

Il-Grupp tal-Euro qabel li jkompli dawn it-taħditiet, u jipprevedi l-użu ta’ valutazzjoni komparattiva b’mod aktar wiesa’.

Dan għandu jippermetti li l-ministri jitgħallmu mill-esperjenzi ta' xulxin fl-implimentazzjoni tar-riformi ta’ politika u jqabblu l-prestazzjoni ta' pajjiżhom ma’ dik ta’ oħrajn f’qasam ta’ politika partikolari.

Dan l-eżerċizzju huwa partikolarment rilevanti għall-istati membri taż-żona tal-euro li l-ekonomiji tagħhom jiddependu minn xulxin u għalhekk huma aktar suxxettibbli li jiġu influwenzati mill-politiki domestiċi ta’ xulxin.

Trasparenza

B'segwitu għall-inizjattiva tal-President tal-Grupp tal-Euro biex tiżdied it-trasparenza tal-ħidma tal-Grupp tal-Euro, il-ministri qablu li, fil-futur, id-dokumenti tal-laqgħat tal-Grupp tal-Euro jiġu ppubblikati fi żmien qasir wara l-laqgħat.

Dawn id-dokumenti ser jiġu ppublikati dment li l-istituzzjonijiet li jkunu abbozzawhom ma joġġezzjonawx. Id-dokumenti li ma jkunux ġew iffinalizzati jew li jkun fihom informazzjoni sensittiva għas-suq mhux ser jiġu ppubblikati.

Fil-laqgħa tiegħu fi Frar 2016, il-Grupp tal-Euro kien diġà qabel li jippubblika l-aġendi annotati għal-laqgħat tal-Grupp tal-Euro kif ukoll l-ittri ta' sinteżi.