Grupp tal-Euro, 14/01/2016, 14 ta' Jannar 2016

Riżultati ewlenin

Greċja: is-sitwazzjoni attwali

L-istituzzjonijiet u l-Ministru għall-Finanzi Grieg, Euclid Tsakalotos, informa lill-Grupp tal-Euro dwar il-passi li jmiss fl-implimentazzjoni tal-programm ta' aġġustament ekonomiku tal-Greċja.

L-istituzzjonijiet bi ħsiebhom jibdew l-ewwel eżami tal-implimentazzjoni tal-programm l-ġimgħa d-dieħla. L-eżami mistenni jiffoka fuq il-kwistjonijiet ewlenin li ġejjin:

• ir-riforma tal-pensjonijiet
• il-baġit għall-2016
• l-istrateġija fiskali għal terminu medju
• l-immodernizzar tal-amministrazzjoni pubblika tal-Greċja
• ir-riformi fis-settur finanzjarju
• ir-riformi fis-settur tal-elettriku

Il-ministri appellaw lill-awtoritajiet Griegi biex jikkooperaw b'mod kostruttiv mal-istituzzjonijiet biex ikun żgurat li l-ewwel eżami jsir bla xkiel u bir-reqqa. It-tlestija b'suċċess ta' dan l-eżerċizzju għandha twitti t-triq għal deċiżjonijiet dwar miżuri possibbli ta' ħelsien mid-dejn u għal programm tal-FMI, kif kien maqbul mill-kapijiet ta' stat jew gvern f'Lulju 2015.

Ċipru: is-sitwazzjoni attwali 

Il-Grupp tal-Euro ddiskuta t-8 u l-aħħar eżami tal-programm ta' aġġustament ta' Ċipru. L-istituzzjonijiet innotaw li Ċipru kien għamel progress sinifikanti fl-implimentazzjoni tal-programm.

Ċipru issa huwa mistenni jissodisfa żewġ kundizzjonijiet pendenti, l-hekk imsejħa 'azzjonijiet preliminari', li għandhom jiġu implimentati biex formalment jiffinalizzaw l-eżami. Il-finalizzazzjoni tal-eżami ser twitti t-triq għall-ħlasijiet finali ta' madwar €300 miljun mill-MES.

• Dikjarazzjoni mill-Kummissjoni Ewropea, il-BĊE u l-FMI dwar Ċipru (Novembru 2015)
• Programm ta’ aġġustament ekonomiku għal Ċipru

Semestru Ewropew

Il-Grupp tal-Euro kellu skambju ta' fehmiet dwar l-implimentazzjoni tar-rakkomandazzjoni tal-2015 taż-żona tal-euro u ddiskuta l-abbozz ta' rakkomandazzjoni tal-Kunsill dwar il-politika ekonomika taż-żona tal-euro għall-2016, li hu ppjanat li tiġi approvata mill-Kunsill ECOFIN fil-15 ta' Jannar 2016.

Il-Ministri qablu dwar ħames prijoritajiet politiċi għaż-żona tal-euro fl-2016-2017, fuq il-bażi ta' proposta tal-Kummissjoni Ewropea: 

• ir-riformi strutturali
• l-appoġġ għall-impjiegi
• il-politiki fiskali fis-sod
• it-tnaqqis tad-dejn
• it-tkomplija tat-tisħiħ tal-Unjoni Ekonomika u Monetarja

Ir-rakkomandazzjoni ser tiġi ppreżentata lill-Kunsill Ewropew għall-approvazzjoni u mbagħad tiġi adottata formalment mill-Kunsill.

• Semestru Ewropew (informazzjoni ġenerali)
• Abbozz ta' rakkomandazzjoni tal-Kunsill dwar il-politika ekonomika taż-żona tal-euro (għall-2016)

Artikolu IV konsultazzjoni tal-FMI maż-żona tal-euro 

Il-Fond Monetarju Internazzjonali (FMI) informa lill-Grupp tal-Euro dwar ir-riżultati ewlenin tal-missjoni interim tiegħu fil-kuntest tal-konsultazzjoni dwar l-Artikolu IV tal-FMI, li saret fl-ewwel nofs ta' Diċembru 2015. 

Il-Grupp tal-Euro qabel mal-evalwazzjoni tal-FMI tal-perspettiva ekonomika għaż-żona tal-euro u l-isfidi politiċi tagħha.

Il-missjoni finali ser isseħħ u r-rapport sħiħ isir disponibbli aktar tard din is-sena.

Diskussjoni tematika dwar it-tkabbir u l-impjiegi: oqfsa nazzjonali ta' insolvenza

F'konformità mar-rakkomandazzjoni taż-żona tal-euro għall-2015, il-Grupp tal-Euro kellu skambju ta' fehmiet dwar l-oqfsa ta' insolvenza nazzjonali u l-applikazzjoni tagħhom, li jvarjaw ħafna minn stat membru għal ieħor.

Il-Grupp tal-Euro jaqbel li l-kwistjoni tal-oqfsa ta' insolvenza hija partikolarment rilevanti għaż-żona tal-euro, speċjalment biex tindirizza d-dejn eċċessiv, u wkoll minħabba li l-ekonomiji taż-żona tal-euro huma suxxettibbli għal effetti sekondarji.

Il-Grupp tal-Euro ddiskuta l-esperjenza ta' pajjiżi individwali fir-riforma tal-oqfsa nazzjonali ta' insolvenza. Il-ministri qablu li f'dan il-kuntest ikun utli li jiġi stabbilit sett ta' prinċipji u punti ta' referenza komuni biex jiżdiedu l-effiċjenza u l-effikaċja ta' dawn l-oqfsa, u qablu li jkomplu d-diskussjoni fir-rebbiegħa tal-2016.

Dan huwa sinjal ta' kooperazzjoni qawwija miż-żona tal-euro. Jeroen Dijsselbloem

Bank Asjatiku tal-Investiment fl-Infrastruttura (AIIB)

Il-President tal-Grupp tal-Euro Jeroen Dijsselbloem informa lill-ministri li l-istati membri kollha taż-żona tal-euro li bħalissa qed jieħdu sehem fl-AIIB qablu li jiffurmaw kostitwenza waħda għaż-żona tal-euro fil-bank.

Streaming dirett ta’ sessjonijiet pubbliċi u avvenimenti għall-istampa.

• Konferenzi stampa u avvenimenti pubbliċi permezz tal-video-streaming
• Ritratti u filmati tal-laqgħa tal-Grupp tal-Euro, 14 ta' Jannar 2016