Kunsill Affarijiet Barranin, 26/05/2015, 26 ta' Mejju 2015

Riżultati ewlenin

Dak li qbilna dwaru llum huwa bażi soda għal azzjoni tal-UE u r-rwol tagħha ta' tmexxija fil-proċess ta’ negozjati li jmiss. Huwa sinjal ċar tal-impenn tal-UE għall-qerda tal-faqar u għall-iżvilupp sostenibbli globali” Ir-Rappreżentant Għoli għall-Affarijiet Barranin u l-Politika ta' Sigurtà, Federica Mogherini

Aġenda għall-iżvilupp wara l-2015

Il-ministri tal-UE għall-iżvilupp kellhom skambju ta’ fehmiet dwar il-finanzjament għall-iżvilupp fil-kuntest tan-negozjati dwar l-aġenda ġdida għall-iżvilupp wara l-2015.

Il-Kunsill adotta konklużjonijiet li jistabbilixxu l-pożizzjoni tal-UE għall-konferenza dwar il-finanzjament għall-iżvilupp f’Lulju u s-summit tan-NU f’Settembru dwar l-aġenda għall-iżvilupp wara l-2015.

Ir-Rappreżentant Għoli tal-UE għall-Affarijiet Barranin u l-Politika ta' Sigurtà, Federica Mogherini, qalet: “Dak li qbilna dwaru llum huwa bażi soda għal azzjoni tal-UE u r-rwol tagħha ta' tmexxija fil-proċess ta’ negozjati li jmiss." Il-Kunsill ġedded l-impenn kollettiv tiegħu li jilħaq il-mira ta’ 0.7% tal-għajnuna uffiċjali għall-iżvilupp (ODA) / tad-dħul nazzjonali gross (DMG) fil-perijodu ta' żmien tal-aġenda ta' wara l-2015. “Huwa sinjal ċar tal-impenn tal-UE għall-qerda tal-faqar u għall-iżvilupp sostenibbli globali”, żiedet tgħid ir-Rappreżentant Għoli.

Migrazzjoni

Il-Kunsill iddiskuta il-kwistjonijiet interrelatati tal-migrazzjoni u l-iżvilupp, bħala segwitu għall-Kunsill Ewropew straordinarju tat-23 ta’ April. 

L-approċċ komprensiv tal-UE jinkludi ħidma dwar il-kawżi bażiċi tal-migrazzjoni irregolari. L-UE hija impenjata li ssaħħaħ il-ħidma dwar ir-rabtiet bejn il-migrazzjoni u l-iżvilupp filwaqt li tkompli tindirizza l-abbużi tad-drittijiet tal-bniedem u r-riżoluzzjoni tal-konflitti fil-pajjiżi tal-oriġini.

• Eżitu tal-laqgħa tal-Kunsill