Kunsill Affarijiet Barranin, 29/01/2015, 29 ta' Jannar 2015

Riżultati ewlenin tal-Kunsill Affarijiet Barranin

Il-Kunsill iltaqa' f'sessjoni straordinarja biex jiddiskuti ż-żieda fil-vjolenza l-aktar reċenti fl-Ukraina. Huwa kkundanna bil-qawwa l-bumbardament indiskriminat ta’ żoni residenzjali, speċjalment f’Mariupol, u ż-żieda tal-ġlied fir-reġjuni ta' Donetsk u ta' Luhansk.

Il-Kunsill jistenna li r-Russja teżerċita l-influwenza tagħha u twassal lis-separatisti sabiex iżommu bis-sħiħ l-impenji tagħhom skont il-ftehimiet ta' Minsk. Dawn jinkludu b'mod partikolari l-waqfien mill-ġlied u l-irtirar tal-armi tqal miż-żona ta' sigurtà bħala l-ewwel passi urġenti.

 "Nittamaw li dan jista' jgħin sabiex issir pressjoni, b'mod partikolari fuq ir-Russja, biex tagħmel passi pożittivi, u tipprevjeni l-passi negattivi li rajna fl-aħħar jiem. Federica Mogherini,  Rappreżentant Għoli tal-Unjoni għall-Affarijiet Barranin u l-Politika ta' Sigurtà

Estensjoni tal-miżuri restrittivi eżistenti

L-UE ser tappoġġa b'mod attiv l-isforzi diplomatiċi kollha li jwasslu għall-ħolqien ta' impetu politiku ġdid u ser timpenja ruħha aktar kif meħtieġ. L-implimentazzjoni sħiħa tal-ftehimiet ta' Minsk bħala bażi ta' soluzzjoni politika sostenibbli għall-kunflitt, li tirrispetta l-indipendenza u l-integrità territorjali tal-Ukraina, għandha tibqa' l-fokus ta' tali diskussjonijiet.

Minħabba s-sitwazzjoni li qed teħżien, il-Kunsill ħa deċiżjonijiet  dwar miżuri restrittivi. Ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà, Federica Mogherini qalet: "Nittamaw li dan jista' jgħin sabiex issir pressjoni, b'mod partikolari fuq ir-Russja, biex tagħmel passi pożittivi, u tipprevjeni l-passi negattivi li rajna fl-aħħar jiem."

Il-Kunsill qabel li jestendi l-miżuri restrittivi eżistenti, li attwalment huma mmirati lejn 132 persuna u 28 entità fir-rigward ta' azzjoni kontra l-integrità territorjali tal-Ukraina, sa Settembru 2015. Dan ser isir f'konformità sħiħa mar-rekwiżiti legali.

Huwa appella wkoll għal proposta fi żmien ġimgħa dwar sanzjonijiet addizzjonali mmirati, għal deċiżjoni fil-Kunsill Affarijiet Barranin fid-9 ta' Frar.

Fl-aħħar nett, il-Kunsill talab li l-Kummissjoni u s-Servizz Ewropew għall-Azzjoni Esterna jwettqu ħidma preparatorja dwar kwalunkwe azzjoni xierqa bil-għan li tiġi żgurata implimentazzjoni rapida u komprensiva tal-ftehimiet ta' Minsk.

• Eżitu tal-laqgħa tal-Kunsill