Kunsill Affarijiet Barranin, 15/02/2016, 15 ta' Frar 2016

Riżultati ewlenin

Jeħtieġ li nirrispettaw l-impenji meħuda f’Munich. Aħna naraw qabża bejn dawn l-impenji u r-realtà fuq il-post fis-Sirja. lkoll konna tal-fehma li huwa fundamentali li jiġu mħarsa l-persuni ċivili fuq il-post, il-ħidma tal-NGOs u l-kunsinni ta’ għajnuna umanitarja. Dak li ġara llum f’Médecins Sans Frontières huwa kompletament inaċċettabbli. Federica Mogherini, Rappreżentant Għoli għall-Affarijiet Barranin u l-Politika ta’ Sigurtà

Sirja 

Il-Kunsill ddiskuta s-sitwazzjoni politika, ta’ sigurtà u umanitarja fis-Sirja. Il-Ministri enfasizzaw l-appoġġ sħiħ tagħhom għar-Riżoluzzjoni 2254 tal-Kunsill tas-Sigurtà tan-Nazzjonijiet Uniti, waqt li talbu l-implimentazzjoni sħiħa tagħha mill-partijiet kollha. Huma kkundannaw l-attakki fuq persuni ċivili u enfasizzaw l-importanza ta’ miżuri għall-bini ta’ fiduċja mmexxija min-NU, l-aċċess umanitarju u r-rispett għall-waqfien mill-ġlied.  

Belarussja

Il-Kunsill laħaq deċiżjoni politika li ma jestendix il-miżuri restrittivi għal 170 individwu u tliet kumpanniji li l-elenkar tagħhom attwalment huwa sospiż. Madankollu huwa qabel li l-embargo fuq l-armi fuq il-Belarussja u l-miżuri restrittivi relatati ma' erba’ individwi elenkati b’rabta mal-għajbien mhux riżolt ta’ żewġ politiċi tal-oppożizzjoni, negozjant u ġurnalist, ser jiġu estiżi għal perjodu ta’ tnax-il xahar.

• Konklużjonijiet tal-Kunsill dwar il-Belarussja

Moldova

Il-Kunsill iddiskuta s-sitwazzjoni fil-Moldova. Huwa adotta konklużjonijiet li jiffukaw fuq ir-riformi li l-Moldova trid twettaq skont il-ftehim ta’ assoċjazzjoni tagħha sabiex tissodisfa l-aspettattivi taċ-ċittadini.

• Konklużjonijiet tal-Kunsill dwar ir-Repubblika tal-Moldova tal-15 ta' Frar 2016

Diplomazija dwar il-klima 

Il-Kunsill enfasizza r-rwol ta’ diplomazija Ewropea dwar il-klima biex tħeġġeġ l-implimentazzjoni tal-ftehim globali dwar it-tibdil fil-klima li ntlaħaq f’Diċembru 2015. Huwa stabbilixxa l-parametri għal pjan ta’ azzjoni ta’ diplomazija dwar il-klima għall-2016, bil-messaġġi ewlenin iffokati fuq tliet oqsma ewlenin:

• Il-promozzjoni tal-ħidma fil-qasam tat-tibdil fil-klima tibqa' prijorità strateġika fi djalogi diplomatiċi, id-diplomazija pubblika u l-istrumenti ta’ politika esterna;
• L-appoġġ għall-implimentazzjoni tal-Ftehim ta’ Pariġi u l-kontributi intenzjonati determinati fuq livell nazzjonali fil-kuntest tal-iżvilupp b’emissjonijiet baxxi u reżiljenti għat-tibdil fil-klima;
• Żieda fl-isforzi biex tiġi indirizzata r-rabta bejn it-tibdil fil-klima, ir-riżorsi naturali, il-prosperità, l-istabbiltà u l-migrazzjoni.

• Konklużjonijiet tal-Kunsill dwar id-diplomazija klimatika
• Ftehimiet internazzjonali dwar azzjoni klimatika (informazzjoni ġenerali)