Kunsill Affarijiet Barranin, 26/02/2018, 26 ta' Frar 2018

Riżultati ewlenin

Affarijiet attwali

Fil-bidu tal-laqgħa tagħhom, ir-Rappreżentant Għoli u l-ministri għall-affarijiet barranin tal-UE ddiskutew is-sitwazzjoni fil-Lvant ta' Ghouta, is-Sirja. Huma appellaw għall-implimentazzjoni b'urġenza tar-riżoluzzjoni 2401 tal-Kunsill tas-Sigurtà tan-NU adottata fl-24 ta' Frar, li titlob li l-partijiet kollha jwaqqfu l-ostilitajiet mingħajr dewmien.

Qed nistennew implimentazzjoni sħiħa u immedjata tar-riżoluzzjoni tal-Kunsill tas-Sigurtà tan-NU li għadha kif ġiet adottata. Illum ser nibgħat ittra lill-ministri għall-affarijiet barranin tat-tliet garanti tal-proċess ta' Astana - ir-Russja, it-Turkija u l-Iran - biex nitlobhom jaħdmu għall-implimentazzjoni tar-riżoluzzjoni. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

• Is-Sirja: reazzjoni tal-Kunsill għall-kriżi

Il-Venezwela

Il-Kunsill tkellem dwar l-aħħar żviluppi fil-Venezwela, inkluż is-sitwazzjoni umanitarja kritika fil-pajjiż u l-pajjiżi ġirien tiegħu, peress li aktar minn 1.5 miljun persuna diġà telqu mill-Venezwela. Kellhom skambju ta' fehmiet dwar l-impass politiku fil-pajjiż, bis-sospensjoni tad-djalogu ta' Santo Domingo bejn il-gvern u l-oppożizzjoni u l-elezzjonijiet Presidenzjali programmati għat-22 ta' April. Il-ministri għall-affarijiet barranin esprimew is-solidarjetà tagħhom ma' Spanja, b'segwitu għad-deċiżjoni mill-awtoritajiet Venezwelani li jiddikjaraw l-Ambaxxatur ta' Spanja persona non grata. Il-ministri għall-affarijiet barranin qablu li jkomplu jwettqu monitoraġġ mill-qrib tas-sitwazzjoni u jżommu miftuħin il-kanali ta' komunikazzjoni, kemm mal-oppożizzjoni kif ukoll mal-gvern.

Qed nistennew elezzjonijiet ħielsa u ġusti, u li l-partiti politiċi kollha fil-proċess politiku jitħallew jipparteċipaw fil-proċess politiku. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

• Dikjarazzjoni mir-Rappreżentant Għoli f'isem l-UE dwar l-aħħar żviluppi fil-Venezwela

Proċess ta' paċi fil-Lvant Nofsani

Il-ministri għall-affarijiet barranin tal-UE u r-Rappreżentant Għoli kellhom ikla mas-Segretarju Ġenerali tal-Lega tal-Istati Għarab (LAS), Ahmed Aboul Gheit, u mal-ministri għall-affarijiet barranin, membri tad-delegazzjoni ministerjali tal-LAS dwar Ġerusalemm ippreseduta mill-Ġordan, u inkluż l-Eġittu, l-Arabja Sawdija, il-Marokk, l-Emirati Għarab Magħquda u l-Awtorità Palestinjana.

Huma ddiskutew mezzi biex jerġa' jitqajjem il-proċess ta' paċi fil-Lvant Nofsani b'mod inklużiv, bil-għan li tinkiseb soluzzjoni ta' żewġ stati, b'Ġerusalemm bħala l-belt kapitali futura taż-żewġ stati. Huma ddiskutew ukoll l-importanza li jiżdied l-appoġġ internazzjonali kollettiv lill-Aġenzija ta' Fondi u tax-Xogħol tan-Nazzjonijiet Uniti għar-refuġjati tal-Palestina fil-Lvant Qarib (UNRWA)

Il-Moldova

Il-ministri għall-affarijiet barranin kellhom skambju ta’ fehmiet dwar ir-Repubblika tal-Moldova. Il-Kunsill adotta konklużjonijiet fi tmiem id-dibattitu. Fid-diskussjoni, il-ministri għall-affarijiet barranin tennew l-impenn tal-UE lejn it-tisħiħ tar-relazzjonijiet bilaterali. Huma ssottolinjaw ukoll il-ħtieġa li jkomplu jiġu adottati u implimentati riformi ċentrali, għall-benefiċċju taċ-ċittadini Moldovani.

• Il-Moldova: il-Kunsill jadotta konklużjonijiet