Kunsill Affarijiet Barranin, 22/01/2018, 22 ta' Jannar 2018

Riżultati ewlenin

Il-Proċess ta' Paċi fil-Lvant Nofsani

Ir-Rappreżentant Għoli u l-ministri għall-affarijiet barranin tal-UE kellhom ikla informali ta' nofsinhar mal-President Palestinjan Mahmoud Abbas fil-marġini tal-Kunsill. Il-laqgħa kienet opportunità għall-Unjoni Ewropea biex ittenni l-messaġġi ċari u komuni tagħha dwar l-importanza li tiġi ppreservata s-soluzzjoni ta' żewġ stati u l-istatus ta' Ġerusalemm bħala l-kapitali futura ta' żewġ stati.

Aħna nkomplu nippromwovu s-soluzzjoni ta' żewġ stati. Aħna nopponu l-attività ta' insedjamenti li nqisu bħala illegali skont il-liġi internazzjonali. Biex niksbu dan l-objettiv irridu nitkellmu u naġixxu b'mod għaqli u konsistenti b'sens ta' responsabbiltà. Dan mhuwiex iż-żmien ta' diżimpenn; bil-kontra. Aħna nemmnu li l-Palestinjani u l-Iżraeljani jridu juru, aktar minn qatt qabel, l-impenn tagħhom mal-komunità internazzjonali, flimkien mal-atturi ewlenin f'dan il-proċess, sabiex flimkien naħdmu lejn eżitu nnegozjat. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Qabel l-ikla informali ta' nofsinhar, il-Kunsill kellu diskussjonijiet dwar l-aħħar żviluppi fil-Proċess ta' Paċi fil-Lvant Nofsani. Il-ministri taw ħarsa lejn kif l-UE tista' tgħin sabiex tiżgura l-impenn mill-partijiet kollha rilevanti sabiex isir progress fil-proċess ta' paċi.

• Proċess ta' Paċi fil-Lvant Nofsani (SEAE)

Il-Libja

Il-Kunsill kellu dibattitu dwar il-Libja. Ir-Rappreżentant Speċjali tas-Segretarju Ġenerali tan-Nazzjonijiet Uniti Ghassam Salamé ta ħarsa ġenerali tas-sitwazzjoni attwali tal-proċess politiku, inkluż il-progress lejn l-adozzjoni ta' Kostituzzjoni ġdida u l-elezzjonijiet li jmiss. Huwa kellu l-appoġġ sħiħ tal-ministri għall-affarijiet barranin fl-isforzi tiegħu jwasslu għall-unità u r-rikonċiljazzjoni fil-pajjiż.

Il-ministri għall-affarijiet barranin iddiskutew ukoll l-importanza tal-impenn tal-UE fil-Libja bħala mod kif tiġi appoġġata n-NU fl-isforzi tagħha sabiex ikun hemm stabbiltà politika kif wkoll dawk l-aġenziji tan-NU li jaħdmu biex jindirizzaw is-sitwazzjoni tal-migranti fil-Libja. Il-ministri enfasizzaw ukoll l-importanza li titkompla l-ħidma mal-pajjiżi ta' oriġini, b'mod partikolari fir-reġjun tas-Saħel.

• Relazzjonijiet UE-Libja (SEAE)

Relazzjonijiet futuri mal-istati Afrikani, tal-Karibew u tal-Paċifiku

Il-ministri għall-affarijiet barranin kellhom skambju inizjali dwar ir-rakkomandazzjoni tal-Kummissjoni u l-abbozz ta' direttivi ta' negozjati tat-12 ta' Diċembru 2017 għal ftehim futur bejn l-UE u l-pajjiżi AKP, minħabba li l-ftehim attwali li jirregola s-sħubija, il-ftehim ta' Cotonou, ser jiskadi fid-29 ta' Frar 2020.

Il-ministri esprimew l-appoġġ ġenerali tagħhom għall-approċċ tal-Kummissjoni li tersaq lejn ftehim komprensiv fil-livell AKP flimkien ma' tliet sħubiji reġjonali mfassla apposta għall-Afrika, il-Karibew u l-Paċifiku. Huma ssottolinjaw l-importanza li jsir progress abbażi tal-esperjenza miksuba permezz tal-kooperazzjoni skont il-ftehim ta' Cotonou attwali, b'mod partikolari fid-djalogu politiku u l-migrazzjoni.

Id-diskussjonijiet dwar il-mandat ta' negozjati ser ikomplu fil-korpi preparatorji rilevanti tal-Kunsill, bil-ħsieb li tiġi adottata deċiżjoni li tawtorizza l-ftuħ ta' negozjati u d-direttivi ta' negozjati fl-ewwel semestru tal-2018.

• Ftehim ta' Cotonou (informazzjoni ġenerali)