Kunsill Affarijiet Barranin (Difiża), 06/03/2018, 6 ta' Marzu 2018

Riżultati ewlenin

Kooperazzjoni strutturata permanenti (PESCO)

Illum, kellna laqgħa inizjali storika tal-Kunsill mal-ministri għad-difiża, fil-qafas tal-kooperazzjoni strutturata permanenti. Għandna responsabilità kollettiva biex nimplimentaw id-deċiżjonijiet li ttieħdu u nwettqu l-impenji meħuda tal-istati membri li jipparteċipaw fil-PESCO. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-ministri għad-difiża ltaqgħu fil-"format PESCO" għall-ewwel darba. Dan ifisser li, għalkemm kienu preżenti ministri mill-istati membri kollha, dawk li jirrappreżentaw l-istati membri li jipparteċipaw fil-PESCO biss kienu involuti fl-adozzjoni tal-atti legali. Illum adottaw deċiżjoni li tistabbilixxi formalment il-lista ta’ proġetti li għandhom jiġu żviluppati taħt il-PESCO u rakkomandazzjoni dwar pjan direzzjonali ta’ implimentazzjoni.

Fid-diskussjoni tagħhom, il-ministri għad-difiża ssottolinjaw l-importanza li jiġu implimentati l-proġetti tal-PESCO u li titkompla l-ħidma sabiex jiġu ddefiniti l-proċessi u l-governanza fix-xhur li ġejjin.

Kooperazzjoni bejn l-UE u n-NATO

Il-kooperazzjoni bejn in-NATO u l-Unjoni Ewropea qatt ma kienet tajba daqs kemm hi llum. Hemm komplementarjetà u koerenza sħiħa bejn il-ħidma li aħna nwettqu biex insaħħu s-sigurtà u d-difiża tal-Unjoni Ewropea u l-kooperazzjoni bejn l-Unjoni Ewropea u n-NATO. Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Il-ministri għad-difiża ddiskutew il-kooperazzjoni bejn l-UE u n-NATO mal-Viċi Segretarju Ġenerali tan-NATO, Rose Gottemoeller. Il-ministri ssottolinjaw l-importanza tal-ħidma li għaddejja fir-rigward ta' 74 proposta f’seba’ oqsma differenti — ħidma li l-UE qed twettaq man-NATO u li qarrbet iż-żewġ organizzazzjonijiet ma' xulxin aktar minn qatt qabel. Il-ministri enfasizzaw il-ħtieġa li ssir ħidma dwar l-implimentazzjoni biex jinkisbu aktar riżultati konkreti. Huma enfasizzaw il-kooperazzjoni f’oqsma bħar-reżiljenza, iċ-ċibersigurtà u l-ġlieda kontra t-theddid ibridu, u enfasizzaw b’mod partikolari l-mobbiltà militari.

Il-ministri indikaw ukoll li kooperazzjoni Ewropea aktar b’saħħitha fid-difiża tirriżulta f’pilastru Ewropew aktar robust fi ħdan in-NATO, u li din il-ħidma qed titwettaq b’komplementarjetà sħiħa man-NATO. Filwaqt li jinnotaw li dan ser jagħti impetu politiku ġdid lill-kooperazzjoni bejn iż-żewġ organizzazzjonijiet, huma laqgħu l-qbil bejn il-President tal-Kunsill Ewropew, il-President tal-Kummissjoni Ewropea u s-Segretarju Ġenerali tan-NATO biex jibdew jaħdmu favur dikjarazzjoni ġdida li tista’ tiġi ffirmata fil-marġini tas-Summit li jmiss tan-NATO f’Lulju.

Sigurtà u difiża

Il-ministri għad-difiża tal-UE kellhom skambju ta’ fehmiet dwar l-aspetti ġenerali tal-kooperazzjoni fil-qasam tas-sigurtà u d-difiża, inkluż il-konsistenza bejn inizjattivi tal-UE fir-rigward tad-difiża li għaddejjin bħalissa. Id-dibattitu kopra kwistjonijiet bħall-Fond Ewropew għad-Difiża u l-ħidma li għaddejja biex jiġi adottat ir-regolament dwar il-Programm Ewropew għall-Iżvilupp fl-Industrija tad-Difiża.

Il-ministri enfasizzaw ukoll l-importanza tal-mobbiltà militari bħala prijorità importanti għal aktar kooperazzjoni bejn l-istati membri tal-UE kif wkoll bejn l-UE u n-NATO. Issemmiet ukoll il-ħtieġa ta' riżorsi u strumenti finanzjarji adegwati biex jintlaħaq livell ġdid ta’ ambizzjoni tal-UE fil-qasam tas-sigurtà u d-difiża. F’dan il-kuntest, ir-Rappreżentant Għoli ppreżentat lill-ministri l-inizjattiva tagħha dwar proposta għal faċilità Ewropea għall-paċi li mhix mill-baġit tal-UE, u li l-ħidma preparatorja dwarha ser titkompla fix-xhur li ġejjin.

Missjonijiet ta' taħriġ

Waqt l-ikla ta’ nofsinhar, il-ministri għad-difiża eżaminaw il-missjonijiet u l-operazzjonijiet tal-PSDK tal-UE. Huma ffukaw fuq tliet missjonijiet ta’ taħriġ militari mhux eżekuttivi fir-Repubblika Ċentru-Afrikana, fil-Mali u fis-Somalja.

Il-ministri għad-difiża laqgħu l-valur miżjud li ġabet magħha l-Kapaċità Militari tal-Ippjanar u t-Tmexxija (MPCC), li kellha r-responsabbiltà għall-ippjanar u t-tmexxija operazzjonali tat-tliet missjonijiet sa mill-ħolqien tagħha sena ilu. Il-ministri ssottolinjaw l-impenn tagħhom li jkomplu jappoġġaw lill-MPCC u lill-iskwadri ta’ taħriġ fuq il-post b’persunal adegwat.