"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Kummerċ), 21/11/2019, 21 ta' Novembru 2019
Riżultati ewlenin
Punti ewlenin mill-Kunsill dwar il-Kummerċ li sar fi Brussell fil-21 ta' Novembru 2019
Modernizzazzjoni tal-Organizzazzjoni Dinjija tal-Kummerċ
Il-Kunsill iddiskuta l-istat attwali tan-negozjati fl-Organizzazzjoni Dinjija tal-Kummerċ, u l-progress fil-proċess ta’ riforma tiegħu.
Il-Kummissjoni għarrfet lill-ministri dwar l-aħħar inizjattivi tagħha għall-promozzjoni ta' approċċ komprensiv tal-UE lejn il-modernizzazzjoni tal-funzjonijiet ewlenin kollha tad-WTO: it-tfassil tar-regoli, il-monitoraġġ u s-soluzzjoni tat-tilwim. Saret enfasi partikolari fuq il-ħtieġa li jinstabu soluzzjonijiet operazzjonali biex tiġi evitata l-paraliżi tas-sistema tas-soluzzjoni tat-tilwim ladarba l-mandat ta’ wieħed mit-tliet imħallfin li fadal tal-Korp tal-Appell jiskadi fil-11 ta’ Diċembru 2019 u l-qorti ma tkunx tista’ tkompli topera.
Sistema ta’ soluzzjoni tat-tilwim li taħdem sew hija kruċjali għall-effettività, ir-rilevanza u l-kredibbiltà tad-WTO b'mod ġenerali. L-importanza tagħha hija kbira u r-riforma tagħha hija kruċjali għal sistema multilaterali ta’ suċċess. Aħna impenjati li nindirizzaw l-għeruq tan-nuqqas ta’ sodisfazzjon bis-sistema eżistenti u li nressqu soluzzjonijiet li jindirizzaw kemm id-diffikultajiet fuq medda qasira ta' żmien kif ukoll dawk aktar fit-tul.
Ville Skinnari, Ministru għall-Kooperazzjoni għall-Iżvilupp u l-Kummerċ Barrani tal-Finlandja
Il-Kummissjoni pprovdiet ukoll lill-Kunsill rapport dwar is-sitwazzjoni attwali dwar it-tħejjijiet għat-12-il Konferenza Ministerjali tad-WTO (KM12) li ser issir f’Nur-Sultan, il-Każakistan, f’Ġunju 2020, u r-riżultati li jista' jkollha.
L-istati membri kienu ġeneralment favur eżitu ambizzjuż għall-KM 12, filwaqt li ddikjaraw mill-ġdid l-importanza tal-proċess multilaterali u li jippermettu riżultati konkreti kemm permezz ta’ negozjati plurilaterali kif ukoll multilaterali. Il-kwistjonijiet ta’ prijorità għall-UE jinkludu, fost l-oħrajn, is-sussidji għas-sajd, is-soluzzjoni tat-tilwim, is-sussidji industrijali u l-kummerċ elettroniku.
Relazzjonijiet kummerċjali bejn l-UE u l-Istati Uniti
Il-Kunsill ħa nota tal-aħħar żviluppi rigward ir-relazzjonijiet kummerċjali bejn l-UE u l-Istati Uniti.
Il-ministri enfasizzaw l-appoġġ tagħhom għall-istrateġija attwali li jinżamm jew saħansitra jitwessa’ l-kamp ta’ applikazzjoni ta’ aġenda kummerċjali pożittiva mal-Istati Uniti, abbażi tal-ftehim milħuq mill-Presidenti Juncker u Trump fil-25 ta’ Lulju 2018, filwaqt li jiġu difiżi l-prinċipji bażiċi tas-sistema multilaterali.
Il-Kummissjoni ppreżentat l-aħħar żviluppi fuq il-fergħat differenti tar-relazzjonijiet bilaterali mal-Istati Uniti, fosthom:
negozjati dwar il-valutazzjoni tal-konformità u l-eliminazzjoni tat-tariffi għal prodotti industrijali
impożizzjoni potenzjali ta’ miżuri restrittivi tal-Istati Uniti (l-hekk imsejħa tariffi tat-“taqsima 232”) fuq importazzjonijiet tal-karozzi mill-UE u
segwitu għat-tilwim WTO Airbus/Boeing
Il-ministri semmew ukoll il-kuntest kummerċjali usa’ u ddiskutew l-aħħar żviluppi fir-relazzjonijiet bejn l-Istati Uniti u ċ-Ċina u bejn l-Istati Uniti u l-Ġappun fil-kuntest tal-impatt tagħhom fuq l-interessi tal-UE u l-ekonomija dinjija ġenerali.
Il-Kunsill kellu dibattitu ta’ orjentazzjoni dwar l-implimentazzjoni ta’ ftehimiet kummerċjali abbażi ta’ rapport tal-Kummissjoni.
Ir-rapport jenfasizza li l-kumpaniji Ewropej komplew jagħmlu użu tajjeb mill-opportunitajiet li ħoloq in-netwerk kummerċjali tal-UE. B’mod ġenerali, il-kummerċ jammonta għal 35% tal-prodott domestiku gross tal-UE, filwaqt li aktar minn 36 miljun impjieg huma appoġġati mill-esportazzjonijiet barra mill-UE. L-UE rreġistrat eċċess ta’ EUR 84.6 biljun f’kummerċ ta’ merkanzija mas-sħab tagħha fil-ftehim kummerċjali, meta mqabbel mad-defiċit kummerċjali globali tagħha mal-bqija tad-dinja ta’ madwar EUR 24.6 biljun.
Waqt id-diskussjoni, il-ministri enfasizzaw l-importanza li tiġi żgurata l-implimentazzjoni effettiva tal-ftehimiet kummerċjali sabiex il-kumpaniji u ċ-ċittadini tal-UE jkunu jistgħu jgawdu bis-sħiħ minnhom. F’dan ir-rigward il-ministri enfasizzaw ukoll l-importanza ta’ kooperazzjoni mill-qrib u komunikazzjoni tajba bejn il-Kummissjoni, l-istati membri, il-kumpaniji privati u l-partijiet interessati.
Waqt l-ikla ta’ nofsinhar, il-ministri ddiskutew ir-relazzjonijiet kummerċjali maċ-Ċina. Il-Kummissjoni pprovdiet ukoll ħarsa ġenerali lejn negozjati kummerċjali oħra li għaddejjin bħalissa.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Sistema ta’ soluzzjoni tat-tilwim li taħdem sew hija kruċjali għall-effettività, ir-rilevanza u l-kredibbiltà tad-WTO b'mod ġenerali. L-importanza tagħha hija kbira u r-riforma tagħha hija kruċjali għal sistema multilaterali ta’ suċċess. Aħna impenjati li nindirizzaw l-għeruq tan-nuqqas ta’ sodisfazzjon bis-sistema eżistenti u li nressqu soluzzjonijiet li jindirizzaw kemm id-diffikultajiet fuq medda qasira ta' żmien kif ukoll dawk aktar fit-tul.
