Regolamentazzjoni aħjar
Ir-regolamentazzjoni aħjar hija sistema ta' azzjonijiet, proċessi ta' teħid ta' deċiżjonijiet, impenji u salvagwardji li l-UE stabbiliet biex tiżgura li l-kwalità tal-leġiżlazzjoni tal-UE qed titjieb b'mod kostanti sabiex tkun tista' twieġeb aħjar għall-ħtiġijiet taċ-ċittadini u n-negozji tagħha.
Prinċipji u objettivi
Il-leġiżlazzjoni tal-UE għandha impatt sinifikanti fuq il-ħajja ta' aktar minn 450 miljun ċittadin. Hija tinteraġixxi direttament mal-leġiżlazzjoni nazzjonali tas-27 stat membru tal-UE, u ma' xibka kumplessa ta' impenji internazzjonali.
Għalhekk huwa vitali li l-istituzzjonijiet tal-UE jilħqu l-ogħla standards ta' kwalità meta joħolqu jew jaġġornaw il-leġiżlazzjoni. Huma jridu jiżguraw li kull dispożizzjoni ta' att leġiżlattiv tkun ibbażata fuq l-evidenza u ssegwi prinċipji ewlenin bħall-effettività, is-sempliċità, it-trasparenza, il-proporzjonalità u l-infurzabbiltà.
Ir-regolamentazzjoni aħjar tkopri ċ-ċiklu sħiħ tat-tfassil tal-liġijiet, mit-tfassil u t-tħejjija sal-adozzjoni, l-implimentazzjoni, l-applikazzjoni, l-evalwazzjoni u r-reviżjoni tal-politika.
-
1
Tfassil u tħejjija tal-politika
-
2
Adozzjoni
-
3
Implimentazzjoni
-
4
Applikazzjoni
-
5
Evalwazzjoni
-
6
Reviżjoni
L-għan huwa li jitfasslu u jitwettqu liġijiet u politiki li jkunu effettivi, sempliċi, ibbażati fuq l-evidenza, trasparenti u proporzjonati mingħajr ma jinħolqu piżijiet bla bżonn.
Dan jgħin ukoll biex titnaqqas il-burokrazija li r-regolamenti tal-UE jistgħu jinvolvu għan-negozji, u b'hekk l-Ewropa ssir aktar kompetittiva.
Għodod għat-tfassil aħjar tal-liġijiet
Ċerti prinċipji, għodod u proċeduri għandhom jiġu segwiti għal kull fażi taċ-ċiklu ta' politika biex jiġi żgurat li l-UE jkollha l-aħjar regolamenti possibbli.
Valutazzjonijiet tal-impatt
Qabel ma tipproponi leġiżlazzjoni ewlenija, il-Kummissjoni għandha tivvaluta l-impatti ekonomiċi, soċjali u ambjentali potenzjali. Għandha tidentifika l-problema li qed tipprova tindirizza, tiġbor l-għarfien espert pubbliku rilevanti kollu permezz ta' sejħiet għal evidenza, u tuża konsultazzjonijiet pubbliċi biex tiġbor feedback dwar ir-riflessjonijiet li qed twettaq u d-direzzjonijiet li tipproponi li tieħu.
Għandha wkoll tikkunsidra u tispjega l-għażliet ta' politika differenti u l-kostijiet u l-benefiċċji tagħhom sabiex il-koleġiżlaturi (il-Kunsill u l-Parlament) ikunu jistgħu jirfinaw il-proposti u jallinjawhom mal-objettivi politiċi tal-kostitwenzi tagħhom.
Sussidjarjetà u proporzjonalità
Il-prinċipji tas-sussidjarjetà u l-proporzjonalità, it-tnejn definiti fit-Trattat dwar l-Unjoni Ewropea, għandhom jiġu rrispettati meta tiġi żviluppata leġiżlazzjoni ġdida.
Sussidjarjetà
L-UE għandha taġixxi biss meta l-objettivi jkunu jistgħu jintlaħqu aħjar fil-livell tal-UE milli fil-livell nazzjonali, reġjonali jew lokali.
Proporzjonalità
L-azzjoni tal-UE ma għandhiex tmur lil hinn minn dak li hu meħtieġ biex jinkisbu l-objettivi tat-Trattati.
Politika bbażata fuq l-evidenza
Il-proposti tal-UE għandhom ikunu bbażati fuq l-aħjar evidenza u analiżi disponibbli u affidabbli biex jinkiseb l-impatt mixtieq għall-benefiċċju tas-soċjetà tal-UE kollha kemm hi. Għal dak l-għan, il-Kummissjoni tiġbor l-aħjar data disponibbli permezz ta' studji, konsultazzjonijiet mal-partijiet ikkonċernati u sejħiet għal evidenza.
Simplifikazzjoni u tnaqqis tal-piżijiet regolatorji
F'dawn l-aħħar snin, ħafna partijiet ikkonċernati ssuġġerew li l-UE għandu jkollha l-għan li tnaqqas il-kostijiet amministrattivi mhux meħtieġa u tagħmel il-leġiżlazzjoni aktar faċli biex tinftiehem u biex issir konformità magħha, speċjalment għan-negozji u l-SMEs.
Biex iwieġbu għal dan it-tħassib, il-Kunsill u l-Kummissjoni qablu dwar miri konkreti li jinkludu t-tnaqqis tal-kostijiet amministrattivi u l-obbligi ta' rappurtar b'mill-inqas 25% għan-negozji kollha, u b'mill-inqas 35% għall-intrapriżi żgħar u ta' daqs medju (SMEs), sal-2030. Dan għandu jsir mingħajr ma jiddgħajfu l-objettivi ta' politika relatati.
Is-simplifikazzjoni hija waħda mill-prijoritajiet ewlenin kemm tal-aġenda strateġika 2024-2029 kif ukoll tad-dikjarazzjoni ta' Budapest dwar il-patt il-ġdid dwar il-kompetittività Ewropea.
Konsultazzjoni u parteċipazzjoni tal-partijiet ikkonċernati
Iċ-ċittadini, in-negozji, l-NGOs, l-esperti u partijiet ikkonċernati oħra għandhom ikunu involuti fl-iżvilupp tal-inizjattivi tal-UE. Dan isir bl-użu ta' metodi bħal sejħiet għal evidenza, konsultazzjonijiet immirati ma' esperti, konsultazzjonijiet pubbliċi u kontrolli fattwali.
Fl-2025, il-portal tal-feedback tal-Kummissjoni rreġistra aktar minn 9 miljun żjara b'aktar minn 21 000 tweġiba ta' feedback dwar 51 proposta leġiżlattiva.
Il-feedback dwar l-abbozzi ta' atti leġiżlattivi mbagħad jiġi kondiviż mal-Kunsill u mal-Parlament.
Evalwazzjoni u rieżami
Il-leġiżlazzjoni eżistenti tal-UE għandha tiġi evalwata biex jiġi ddeterminat jekk għadhiex effettiva u jekk tipproduċix kostijiet mhux meħtieġa jew konsegwenzi mhux intenzjonati. Għal dak il-għan, kważi l-proposti leġiżlattivi l-ġodda kollha jinkludu klawżoli ta' rieżami regolari, xi wħud b'rieżamijiet ta' nofs it-terminu biex jiġi żgurat li l-implimentazzjoni tkun qed tipproċedi kif ippjanat.
Il-Kummissjoni torganizza djalogi dwar l-implimentazzjoni darbtejn fis-sena mal-partijiet ikkonċernati biex tiddiskuti r-realtà tal-implimentazzjoni fil-prattika u l-ostakli potenzjali.
Ir-rwol tal-Kunsill
It-tfassil aħjar tal-liġijiet huwa prijorità kontinwa tal-Kunsill.
Minħabba l-isforzi tal-Kunsill biex jiżgura li l-leġiżlazzjoni tal-UE tkun "adatta għall-iskop", diversi drabi xi wħud mill-konfigurazzjonijiet tiegħu adottaw konklużjonijiet dwar regolamentazzjoni aħjar.
- Ambjenti ta' esperimentazzjoni regolatorja u klawżoli ta' esperimentazzjoni bħala għodod għal regolamentazzjoni aħjar: il-Kunsill jadotta konklużjonijiet (stqarrija għall-istampa, 6 ta' Novembru 2020)
- Regolamentazzjoni aħjar għall-kompetittività u t-tkabbir sostenibbli u inklużiv: il-Kunsill jadotta konklużjonijiet (stqarrija għall-istampa, 27 ta' Frar 2020)
F'Novembru 2024, il-ministri kellhom dibattitu ta' orjentazzjoni dwar ir-regolamentazzjoni aħjar. Il-biċċa l-kbira tad-delegazzjonijiet kienu favur it-tnaqqis tal-piż tar-rappurtar b'25%, b'mira ta' 35% għall-SMEs, u l-ħolqien ta' kummissarju għall-implimentazzjoni u s-simplifikazzjoni.
F'Settembru 2025, il-ministri appellaw għall-applikazzjoni ta' prinċipji ta' regolamentazzjoni aħjar, bħall-użu sistematiku ta' valutazzjonijiet tal-impatt, evalwazzjonijiet ex post, konsultazzjonijiet mal-partijiet ikkonċernati u kontrolli fattwali. Kien hemm ukoll qbil ġenerali li l-Kunsill tal-Kompetittività għandu jibqa' attent biex jiġu evitati piżijiet addizzjonali futuri.
F'Diċembru 2025, il-ministri appellaw għal monitoraġġ aktar sistematiku tal-piżijiet aggregati li jirriżultaw mill-kostijiet amministrattivi u ta' aġġustament assoċjati ma' leġiżlazzjoni ġdida, filwaqt li stiednu lill-Kummissjoni twettaq valutazzjonijiet tal-impatt bir-reqqa dwar proposti leġiżlattivi li mistennija jkollhom impatti ekonomiċi, ambjentali jew soċjali sinifikanti.
F'dawn l-aħħar snin, il-mexxejja tal-UE fil-Kunsill Ewropew, diversi drabi indikaw ukoll il-ħtieġa li jiġu ssimplifikati r-regoli biex tingħata spinta lill-kompetittività fit-tul tal-UE.
F'Marzu 2026, huma appellaw lill-Kummissjoni biex:
- tiżgura li l-inizjattivi l-ġodda tal-UE jkunu konformi mal-prinċipju ta' "sempliċità mit-tfassil", ikunu akkumpanjati minn valutazzjonijiet tal-impatt ta' kwalità għolja, jikkontribwixxu għall-għanijiet tal-kompetittività tal-UE, u jnaqqsu l-kostijiet regolatorji u jevitaw il-piżijiet
- tiffavorixxi r-regolamenti flok id-direttivi
- tillimita l-użu ta' atti delegati u ta' implimentazzjoni, li għandhom jiffukaw fuq aspetti tekniċi
Bħala segwitu, f'April 2026 il-Kummissjoni ħarġet komunikazzjoni dwar ġabra ta' regoli tal-UE aktar sempliċi, aktar ċari u infurzati aħjar, li tistabbilixxi approċċ aktar robust għal regolamentazzjoni aħjar. Il-Kummissjoni mistennija tiġġenera sensiela ta' inizjattivi li għandhom jitmexxew fil-korpi preparatorji rilevanti tal-Kunsill.
Din hija l-ewwel riforma tal-qafas ta' regolamentazzjoni aħjar mill-2021 'l hawn.
Ara wkoll
L-aħħar reviżjoni: 10 ta' Settembru 2026