Kunsill Affarijiet Ġenerali, 13/12/2016, 13 ta' Diċembru 2016

Riżultati ewlenin

Fond Ewropew għall-iżvilupp sostenibbli

Il-Kunsill adotta l-pożizzjoni ta' negozjar tiegħu dwar il-fond Ewropew għall-iżvilupp sostenibbli, u ressqu pass ieħor lejn it-twettiq tiegħu.

"Dan il-fond huwa strument essenzjali li b'mod partikolari għandu l-għan li jindirizza l-kawżi ewlenin tal-migrazzjoni irregolari. Huwa jfittex li joħloq opportunitajiet ta' impjieg, jinkoraġġixxi l-investimenti u jiffaċilita l-iżvilupp sostenibbli fil-pajjiżi sħab fl-Afrika, kif ukoll fil-viċinat Ewropew. Issa huwa kruċjali li nħaffu l-pass tan-negozjati mal-Parlament Ewropew biex il-fond jitnieda malajr."

Miroslav Lajčák, il-Ministru Slovakk għall-Affarijiet Barranin u Ewropej u President tal-Kunsill

Prijoritajiet tal-UE għall-2017

Il-Kunsill approva l-prijoritajiet leġislattivi tal-UE għall-2017, li jiffokaw fuq sitt oqsma prinċipali:

• impjiegi, tkabbir, investimenti
• Ewropa soċjali
• sigurtà
• riforma tal-politika dwar il-migrazzjoni
• suq uniku diġitali
• enerġija u klima

"Din hija l-ewwel darba li l-UE stabbilixxiet ġabra ta' prijoritajiet leġislattivi komuni għas-sena ta' wara. Dan ser jgħinna nagħmlu progress fl-oqsma fejn huwa l-aktar meħtieġ."

Miroslav Lajčák, il-Ministru Slovakk għall-Affarijiet Barranin u Ewropej u President tal-Kunsill

• Il-Kunsill japprova l-prijoritajiet leġislattivi tal-UE għall-2017

Kunsill Ewropew ta' Diċembru

Il-Kunsill iffinalizza t-tħejjijiet għall-Kunsill Ewropew tal-15 ta' Diċembru 2016 billi ddiskuta l-abbozz ta' konklużjonijiet. Fil-laqgħa tagħhom tal-15 ta' Diċembru, il-mexxejja tal-UE ser jindirizzaw erba' punti:

• il-migrazzjoni, fejn ser janalizzaw l-implimentazzjoni tad-dikjarazzjoni UE-Turkija, l-oqfsa ta' sħubija konklużi mal-ewwel pajjiżi Afrikani u s-sitwazzjoni attwali fir-riforma tar-regoli tal-UE dwar l-asil
• is-sigurtà, b'enfasi partikolari fuq l-implimentazzjoni tal-aġenda dwar is-sigurtà u l-kooperazzjoni tal-UE dwar is-sigurtà esterna u d-difiża
• l-iżvilupp ekonomiku u soċjali, iż-żgħażagħ, fejn ser jevalwaw il-progress fil-fond Ewropew għall-investimenti strateġiċi u fil-ġlieda kontra l-qgħad fost iż-żgħażagħ
• ir-relazzjonijiet esterni b'enfasi partikolari fuq ir-referendum tan-Netherlands dwar il-ftehim ta' assoċjazzjoni bejn l-UE u l-Ukrajna

Tkabbir

Il-Kunsill iddiskuta t-tkabbir u l-proċess ta' stabbilizzazzjoni u ta' assoċjazzjoni, u wara dan il-presidenza nnutat li ma kienx hemm kunsens li jippermetti l-adozzjoni tal-konklużjonijiet tal-Kunsill dwar din il-kwistjoni. Għalhekk, il-presidenza fasslet ġabra ta' konklużjonijiet li ġew appoġġati mill-maġġoranza l-kbira tad-delegazzjonijiet matul id-diskussjonijiet.

"Affermajna mill-ġdid l-impenn tagħna lejn it-tkabbir bħala politika ewlenija tal-UE u stabbiltà tal-investimenti strateġiċi, demokrazija u prosperità fl-Ewropa. Aħna nagħtu importanza kbira lill-kredibbiltà tat-tkabbir bħala proċess bidirezzjonali - jekk pajjiż iwettaq ir-riformi meħtieġa, l-UE trid twettaq l-impenji tagħha."

Miroslav Lajčák, il-Ministru Slovakk għall-Affarijiet Barranin u Ewropej u President tal-Kunsill