Kunsill Affarijiet Ġenerali, 07/03/2017, 7 ta' Marzu 2017

Riżultati ewlenin

Rieżami ta' nofs it-terminu tal-qafas baġitarju tal-UE għall-2014-2020

Il-Kunsill qabel li jaġġusta l-qafas finanzjarju pluriennali tal-UE għall-2014-2020 biex jallinjah ma' prijoritajiet ġodda. It-tibdiliet miftiehma jsaħħu l-appoġġ tal-UE sabiex tindirizza l-kriżi tal-migrazzjoni, it-tisħiħ tas-sigurtà, il-promozzjoni tat-tkabbir u l-ħolqien tal-impjiegi. Ser jippermettu lill-UE twieġeb b’mod aktar faċli għal ħtiġijiet mhux mistennija mingħajr tibdil fil-limiti massimi tan-nefqa tal-QFP. U ser jgħinu biex tiġi evitata akkumulazzjoni eċċessiva ta' kontijiet mhux imħallsa.

“Dan l-ewwel rieżami li qatt sar tal-qafas baġitarju pluriennali ser jiżgura li l-baġit tal-UE jkun saħansitra aktar effettiv biex jittratta l-isfidi attwali u jwieġeb għal ħtiġijiet mhux mistennija. Ineħħi wkoll il-pressjoni żejda fuq il-baġits nazzjonali tal-istati membri fi żmien ta' sforzi kontinwi ta' konsolidament tal-finanzi pubbliċi. Il-presidenza Maltija, filwaqt li kompliet fuq il-ħidma tal-presidenza Slovakka, ħadmet ħafna biex tiżblokka s-sitwazzjoni staġnata tas-sena li għaddiet u ninsabu sodisfatti ħafna li llum seta' jintlaħaq ftehim.”

Louis Grech, Viċi Prim Ministru ta’ Malta u President tal-Kunsill

Kunsill Ewropew tar-rebbiegħa

Il-Kunsill iffinalizza t-tħejjijiet għall-Kunsill Ewropew ta’ Marzu billi ddiskuta l-abbozz ta’ konklużjonijiet li jkopru s-suġġetti li huma mistennija jiġu diskussi mill-mexxejja tal-UE. Il-Kunsill Ewropew tar-rebbiegħa ser jiffoka fuq l-impjiegi, it-tkabbir u l-kompetittività. Ser jirrifletti dwar kif għandha tiġi żgurata s-sostenibbiltà tat-tkabbir ekonomiku li qed jesperjenzaw l-istati membri kollha bħalissa. Ser jiddiskuti l-politika kummerċjali u l-progress fir-rigward tal-fajls relatati mas-suq uniku.

"Qed nibdew naraw ir-riżultati: għall-ewwel darba fi kważi għaxar snin l-ekonomiji tal-istati membri kollha qegħdin jikbru - u huma mistennija jkomplu jikbru għall-futur prevedibbli. Iżda biex jinħolqu l-impjiegi huwa kruċjali li t-tkabbir ekonomiku ikun sostenibbli. Permezz tal-laqgħa tal-Kunsill tal-lum stajna nħejju għal diskussjoni sinifikattiva fil-Kunsill Ewropew, fejn il-ġejjieni tal-Ewropa jinsab fiċ-ċentru tal-aġenda tagħna”

Louis Grech, Viċi Prim Ministru ta’ Malta u President tal-Kunsill

Dwar il-migrazzjoni, il-mexxejja Ewropej ser janalizzaw il-progress fl-implimentazzjoni tal-miżuri li ġew maqbula f’Malta kmieni fi Frar biex jitrażżan il-fluss migratorju fir-rotta tal-Mediterran Ċentrali. Ser janalizzaw ukoll l-implimentazzjoni tal-konklużjonijiet tal-Kunsill Ewropew ta’ Diċembru 2016 dwar is-sigurtà esterna u d-difiża u ser jiddiskutu s-sitwazzjoni fil-Balkani tal-Punent. Il-Kunsill Ewropew mistenni wkoll jeleġġi l-President tiegħu għall-perjodu mill-1 ta’ Ġunju 2017 sat-30 ta’ Novembru 2019.

Ġlieda kontra t-terroriżmu

Il-Kunsill adotta direttiva li taġġorna u testendi l-għodod legali disponibbli biex twieġeb għat-theddida terroristika li qed tevolvi madwar l-UE. Ir-regoli l-ġodda ser jgħinu fil-prevenzjoni ta’ attakki terroristiċi billi jikkriminalizzaw atti bħal dawk ta' taħriġ jew ivvjaġġar għal finijiet terroristiċi, kif ukoll l-organizzazzjoni jew il-faċilitazzjoni ta’ dawn il-vjaġġi. Huma jsaħħu wkoll id-drittijiet tal-vittmi tat-terroriżmu. Il-Kunsill adotta wkoll regolament li jsaħħaħ il-kontrolli fil-fruntieri esterni.

• L-UE ssaħħaħ ir-regoli sabiex jiġu evitati forom ġodda ta’ terroriżmu
• Il-kodiċi tal-fruntieri ta' Schengen: Il-Kunsill jadotta regolament biex jissaħħu l-verifiki fil-fruntieri esterni (Stqarrija għall-istampa, 7 ta’ Marzu 2017)

Apparat mediku

Il-Kunsill adotta regoli ġodda tal-UE li jtejbu s-sikurezza tal-apparat mediku. Dawn ser itejbu s-saħħa tal-pazjenti u jipprovdu kwalità tal-ħajja aħjar lil persuni b’diżabilità filwaqt li jiżguraw li l-pazjenti jkollhom aċċess f’waqtu għal soluzzjonijiet innovattivi tal-kura tas-saħħa.

It-tagħmir mediku u t-tagħmir mediku dijanjostiku in vitro jgħinu fid-dijanjosi, il-prevenzjoni u t-trattament jew it-taffija tal-mard. Huma jkopru firxa wiesgħa ta’ prodotti, minn stikek sa impjantazzjonijiet ta' proteżi fil-ġenbejn u apparat tas-smigħ, u minn testijiet tat-tqala għal dawk tal-HIV.

• Tagħmir mediku aktar sigur: il-Kunsill jadotta regoli ġodda tal-UE