Kunsill Affarijiet Ġenerali, 17/10/2017, 17 ta' Ottubru 2017

Riżultati ewlenin

Kunsill Ewropew ta' Ottubru

Il-Kunsill iffinalizza t-tħejjijiet għall-Kunsill Ewropew li jmiss b'diskussjoni dwar l-abbozz ta' konklużjonijiet. Fil-laqgħa tagħhom tad-19 ta' Ottubru, il-mexxejja tal-UE ser jiffokaw fuq il-migrazzjoni, l-Ewropa Diġitali, id-difiża u r-relazzjonijiet esterni. It-temi li ser jiġu diskussi jinkludu miżuri biex jitwaqqfu l-flussi illegali tal-migrazzjoni u l-progress fir-riforma tas-Sistema Ewropea Komuni tal-Asil; l-aħjar modi biex jinħatfu l-opportunitajiet u jiġu indirizzati l-isfidi ippreżentati mir-rivoluzzjoni diġitali; il-kooperazzjoni strutturata permanenti ppjanata dwar id-difiża (PESCO); u kwistjonijiet speċifiċi ta' politika barranija, inkluż r-relazzjonijiet mat-Turkija.

L-istat tad-dritt fl-era diġitali

Il-Kunsill kellu wkoll it-tielet djalogu annwali tiegħu dwar l-istat tad-dritt, iffukat fuq il-pluraliżmu tal-media u l-istat tad-dritt fl-era diġitali. Bil-parteċipazzjoni tad-Direttur tal-Aġenzija tal-UE għad-Drittijiet Fundamentali, Michael O'Flaherty, il-ministri ddiskutew l-isfidi tal-istat tad-dritt u d-drittijiet fundamentali fl-ambjent tal-media l-ġdida, l-aħjar modi biex ikun appoġġat ġurnaliżmu ta' kwalità għolja u l-ħtieġa li jiġi żgurat li ċ-ċittadini tal-UE ta' kull età jkollhom biżżejjed ħiliet fil-litteriżmu fil-media.

"L-aħbarijiet foloz minn dejjem eżistew, iżda dak li huwa ġdid hu li llum il-ġurnata kulħadd jista' jxerred l-informazzjoni - jew id-diżinformazzjoni - lil udjenza prattikament illimitata f' tebqa t'għajn," qal Matti Maasikas, il-Viċi Ministru Estonjan għall-Affarijiet Ewropej u l-president tal-laqgħa tal-lum tal-Kunsill. "Għaldaqstant huwa essenzjali li n-nies ikunu konxji ta' dawn ir-riskji u jkunu jistgħu jivvalutaw jekk aħbar tkunx falza jew vera u jkunu jistgħu jagħrfu troll."

Il-presidenza ser tħejji konklużjonijiet dwar id-dibattitu, li ser jintbagħtu lill-korpi rilevanti tal-Kunsill għal aktar konsiderazzjoni.