Kunsill Affarijiet Ġenerali, 25/09/2017, 25 ta' Settembru 2017

Riżultati ewlenin

Il-Kunsill beda t-tħejjijiet għall-Kunsill Ewropew ta' Ottubru billi ddiskuta aġenda proviżorja. F'dik il-laqgħa, il-mexxejja tal-UE mistennija jikkonċentraw fuq il-migrazzjoni, l-Ewropa Diġitali, id-difiża u r-relazzjonijiet esterni.

"Dawn is-suġġetti jidħlu perfettament fil-prijoritajiet tal-presidenza Estonjana, li jinkludu l-isforzi kontinwi biex tiġi indirizzata l-kriżi tal-migrazzjoni, l-iżvilupp tal-kooperazzjoni fid-difiża Ewropea u li jintlaħqu l-għanijiet globali tal-progress fil-kwistjonijiet diġitali kollha."

Matti Maasikas, Viċi Ministru għall-Affarijiet Ewropej tal-Estonja

Il-ministri ddiskutew ukoll il-prijoritajiet tal-Kummissjoni fil-Programm ta’ Ħidma tal-Kummissjoni għall-2018. Huma appoġġaw b’mod ġenerali l-intenzjonijiet tal-Kummissjoni u enfasizzaw ċerti inizjattivi li qiesu partikolarment utli. Il-kontribut tal-ministri ser jgħin lill-Kummissjoni tiffinalizza l-programm ta’ ħidma tagħha, li għandu jiġi adottat f'Ottubru.

Taħt "Affarijiet oħrajn", il-Kummissjoni aġġornat lill-ministri dwar is-sitwazzjoni attwali rigward id-djalogu tagħha mal-Polonja dwar l-istat tad-dritt. Il-Kunsill għalaq ukoll il-proċedura ta’ defiċit eċċessiv għall-Greċja, u kkonferma li d-defiċit issa huwa inqas minn 3% tal-PDG, il-valur ta' referenza tal-UE għad-defiċits tal-gvern.

"Wara bosta snin ta' diffikultajiet serji, il-finanzi tal-Greċja jinsabu f'qagħda ħafna aħjar. Nilqgħu għalhekk b'sodisfazzjon id-deċiżjoni tal-lum."

Toomas Tõniste, Ministru għall-Finanzi tal-Estonja