Summit bejn l-UE u l-Ukrajna, 09/07/2018, 9 ta' Lulju 2018

Riżultati ewlenin

L-UE u l-Ukrajna reġgħu affermaw is-sħubija b'saħħitha tagħhom imsejsa fuq il-ftehim ta' assoċjazzjoni tagħhom u ddiskutew kif jagħmlu progress fiha.

Il-mexxejja tal-UE u l-Ukrajna wiegħdu li jsaħħu l-assoċjazzjoni politika u l-integrazzjoni ekonomika tal-Ukrajna mal-UE.

"Is-sħubija tagħna hija mibnija fuq pedamenti sodi. Il-ftehim ta' assoċjazzjoni u ż-żona ta' kummerċ ħieles approfondita u komprensiva daħlu fis-seħħ b'mod sħiħ sena ilu. Ir-riżultat hu ċar u pożittiv. U l-ekonomija tal-Ukrajna qed tirkupra bi tkabbir pożittiv imġedded." Il-President Tusk waqt il-konferenza stampa wara s-summit UE-Ukrajna, 9 ta' Lulju 2018

• Kummenti mill-President Donald Tusk wara s-summit UE-Ukrajna, 9 ta’ Lulju 2018

L-UE ttenni l-appoġġ determinat tagħha għall-indipendenza, is-sovranità u l-integrità territorjali tal-Ukrajna. L-UE esprimiet ukoll l-appoġġ tagħha għall-aġenda ambizzjuża ta’ riforma tal-Ukrajna.

Il-President Donald Tusk u l-President Jean-Claude Juncker irrappreżentaw lill-UE fis-summit. Il-President Petro Poroshenko rrappreżenta lill-Ukrajna. Huma adottaw dikjarazzjoni konġunta:

• dikjarazzjoni konġunta tal-20 summit bejn l-UE u l-Ukrajna - Brussell, 9 ta' Lulju 2018

Implimentazzjoni tal-ftehim ta' assoċjazzjoni

Il-mexxejja tal-UE u tal-Ukrajna ddiskutew il-passi li jmiss fl-implimentazzjoni tal-ftehim ta' assoċjazzjoni u ż-żona ta' kummerċ ħieles tiegħu applikati mill-2016.

Huma laqgħu l-impatt pożittiv tal-ftehim fuq il-kummerċ bejn l-UE u l-Ukrajna kif ukoll fuq l-ekonomija tal-pajjiż:

• il-kummerċ fl-oġġetti bejn l-UE u l-Ukrajna kiber b'24% fl-2017
• l-ekonomija tal-Ukrajna żdiedet bi 2.5% fl-2017 u mistenni tkabbir ta' 3.5% fl-2018

Il-mexxejja laqgħu wkoll l-introduzzjoni ta' vvjaġġar mingħajr viża għaċ-ċittadini Ukreni:

"Sitt xhur wara li daħlet fis-seħħ il-liberalizzazzjoni tal-viża, aktar minn nofs miljun persuna Ukrena użaw din l-opportunità l-ġdida." Il-President Tusk waqt il-konferenza stampa wara s-summit UE-Ukrajna, 9 ta' Lulju 2018

Proċess ta' riforma tal-Ukrajna

Il-mexxejja tal-UE u l-Ukrajna wiżnu l-proċess ta' riforma fuq firxa wiesgħa li qed twettaq l-Ukrajna. Huma laqgħu t-tnedija ta' riformi importanti ġodda mill-aħħar summit:

"F'din l-aħħar sena l-gvern beda jwettaq għadd ta' riformi, bħal dawk tal-pensjonijiet u l-kura tas-saħħa, li ser ikunu diffiċli fuq perjodu qasir iżda ser jagħmlu lill-Ukrajna aktar b'saħħitha fuq perjodu twil." Il-President Tusk waqt il-konferenza stampa wara s-summit UE-Ukrajna, 9 ta' Lulju 2018

Il-mexxejja qalu li hu importanti li jitkomplew u jitħaffu l-isforzi ta' riforma, b'mod partikolari biex:

• tiġi miġġielda aħjar il-korruzzjoni
• tittejjeb il-klima tan-negozju u jitħarsu d-drittijiet tal-operaturi ekonomiċi
• jiġi mmodernizzat is-settur tal-enerġija

L-UE tenniet l-appoġġ tagħha għall-aġenda ta' riforma tal-Ukrajna u qablet li żżid l-isforzi f'diversi oqsma bħal:

• l-iżvilupp tal-ħiliet
• l-effiċjenza fl-użu tal-enerġija
• iċ-ċibersigurtà
• id-diżinformazzjoni

F'Mejju 2018, il-Kunsill qabel dwar pakkett ġdid ta' assistenza makrofinanzjarja ta' €1 biljun għall-Ukrajna. L-iżborżi ser ikunu soġġetti għal għadd ta' kondizzjonijiet ta' politika, li ser ikollu jintlaħaq qbil dwarhom bejn l-UE u l-awtoritajiet Ukreni.

Fil-marġini tas-summit, l-Ukrajna u l-Bank Ewropew tal-Investiment iffirmaw ftehim ta' self ta' €75 miljun biex jiġu ffinanzjati proġetti ta' sikurezza tat-toroq fil-pajjiż.

• Il-bank tal-UE jappoġġa investimenti ewlenin fis-sikurezza tat-toroq urbani fl-Ukrajna b'EUR 75 miljun (stqarrija għall-istampa tal-BEI, 09/07/2018)

Annessjoni illegali tal-Krimea u Sevastopol

L-UE reġgħet affermat l-appoġġ tagħha għall-indipendenza, is-sovranità u l-integrità territorjali tal-Ukrajna.

L-UE tenniet il-kundanna qawwija tagħha tal-annessjoni illegali mir-Russja tal-Krimea u Sevastopol:

"In-nonrikonoxximent tagħna tal-annessjoni illegali tal-Krimea u Sevastopol għadu sod u l-lista ta' projbizzjonijiet tal-viża kibret wara li saru l-elezzjonijiet Presidenzjali tar-Russja fuq il-peniżola u nbena l-pont Kerch mingħajr il-kunsens tal-Ukrajna." Il-President Tusk waqt il-konferenza stampa wara s-summit UE-Ukrajna, 9 ta' Lulju 2018

Il-mexxejja ser jenfasizzaw il-ħtieġa għal implimentazzjoni sħiħa tal-ftehimiet ta' Minsk min-naħat kollha, filwaqt li jenfasizzaw ir-responsabbiltà tar-Russja għall-gwerra fil-lvant tal-Ukrajna. Mill-2014, in-Nazzjonijiet Uniti ddokumentaw aktar minn 10,250 persuna maqtula u 24,600 midruba sa issa f'dan il-konflitt.

Minħabba n-nuqqas ta' progress, il-mexxejja tal-UE qablu f'Ġunju 2018 li jestendu s-sanzjonijiet ekonomiċi li jolqtu setturi speċifiċi tal-ekonomija Russa.

Il-President Tusk irrepeta l-appell tiegħu biex jinħeles id-direttur tal-films u kittieb Ukren li ntbagħat il-ħabs illegalment Oleh Sentsov u dawk kollha li huma detenuti illegalment fil-Krimea u fir-Russja.

Ara wkoll

• Summit bejn l-UE u l-Ukrajna, 12-13/07/2017
• Relazzjonijiet tal-UE mal-Ukrajna (informazzjoni ġenerali)
• Relazzjonijiet bejn l-UE u l-Ukrajna (SEAE)
• Delegazzjoni tal-UE għall-Ukrajna (SEAE)