Laqgħa bejn l-Asja u l-Ewropa (ASEM), 25 u 26 ta' Novembru 2021

Riżultati ewlenin

It-13-il Laqgħa bejn l-Asja u l-Ewropa (ASEM13) saret permezz ta' vidjokonferenza minn Phnom Penh, il-Kambodja, fil-25 u s-26 ta' Novembru 2021.

Taħt it-tema ġenerali ta' "it-tisħiħ tal-multilateraliżmu għal tkabbir kondiviż", il-laqgħa laqqgħet flimkien il-mexxejja tat-30 pajjiż membru Ewropew u l-21 pajjiż membru Asjatiku, l-UE u s-Segretarjat tal-ASEAN. Hija kienet ippreseduta minn Hun Sen, Prim Ministru tal-Kambodja.

Charles Michel, President tal-Kunsill Ewropew, u Ursula von der Leyen, President tal-Kummissjoni Ewropea, irrappreżentaw lill-UE. Il-Prim Ministru tas-Slovenja, Janez Janša, irrappreżenta l-presidenza b'rotazzjoni tal-Kunsill tal-UE. Ir-Rappreżentant Għoli għall-Affarijiet Barranin u l-Politika ta' Sigurtà, Josep Borrell, ukoll ħa sehem fil-laqgħa.

Is-summit ta' din is-sena kien wieħed mill-aktar laqgħat multilaterali importanti tal-2021. Iddiskutejna kif nistgħu nagħtu spinta lill-irkupru soċjoekonomiku ta' wara l-pandemija, niżguraw trasformazzjoni ekoloġika, u nsaħħu l-kooperazzjoni dwar il-politiki barranin u ta' sigurtà. Il-President Charles Michel wara s-summit tal-ASEM13

• Kummenti mill-President Charles Michel fil-konferenza stampa wara s-summit ASEM13

Filwaqt li ċċelebraw il-25 anniversarju tal-ASEM, il-mexxejja laqgħu l-progress u l-kisbiet tagħha mill-1996 sal-lum u impenjaw ruħhom li jkomplu jsaħħu l-kooperazzjoni, is-sħubija u l-konnettività bejn l-Asja u l-Ewropa.

• Dikjarazzjoni tal-President: "It-Tisħiħ tal-Multilateraliżmu għal Tkabbir Kondiviż"
• Dikjarazzjoni ta' Phnom Penh dwar l-irkupru soċjoekonomiku wara l-COVID-19
• It-Triq 'il Quddiem dwar il-Konnettività tal-ASEM

Irkupru soċjoekonomiku wara l-COVID-19

Il-mexxejja kellhom skambju ta' fehmiet dwar is-sitwazzjonijiet politiċi u soċjoekonomiċi attwali fir-reġjuni rispettivi tagħhom u d-dinja inġenerali, u dwar modi kif tissaħħaħ il-kooperazzjoni tal-ASEM.

Dan kien jinkludi diskussjonijiet dwar is-salvagwardja tas-saħħa taċ-ċittadini u l-benesseri soċjoekonomiku, u l-bini mill-ġdid tal-ekonomiji tal-pajjiżi tagħhom b'mod sostenibbli għal futur aħjar.

Il-kooperazzjoni multilaterali, u b'mod partikolari relazzjoni b'saħħitha bejn l-Ewropa u l-Asja, hija kruċjali għall-irkupru globali tagħna... Aħna nemmnu li huwa importanti għas-sħab kollha tal-ASEM li jaħdmu flimkien biex "nibnu mill-ġdid aħjar" – b'mod aktar ekoloġiku, diġitali, sostenibbli u inklużiv. Charles Michel, President tal-Kunsill Ewropew

• Kummenti mill-President Charles Michel fis-sessjoni tal-ftuħ tat-13-il Laqgħa Asja-Ewropa

Il-mexxejja enfasizzaw l-impatti sproporzjonati tal-COVID-19 fuq is-soċjetajiet tagħhom, inkluż in-nisa, il-bniet, il-familji u dawk f'sitwazzjonijiet vulnerabbli.

Huma enfasizzaw il-ħtieġa li l-pajjiżi kollha jkollhom aċċess ekwu u f'waqtu għal dijanjostika, terapiji, mediċini u vaċċini ta' kwalità, sikuri, effettivi, affordabbli u effikaċi għar-rispons għall-COVID-19.

• Skeda informattiva: L-Ewropa u l-Asja magħqudin kontra l-COVID-19 (SEAE

Il-mexxejja nnutaw li r-rispons globali għall-pandemija ppreżenta opportunità biex jiġu aċċellerati t-tranżizzjonijiet lejn irkupru soċjoekonomiku reżiljenti, diġitali u b'livell baxx ta' emissjonijiet ta' karbonju, u lejn ekonomiji ekoloġiċi, ċirkolari u aktar sostenibbli.

Huma rrikonoxxew l-importanza li s-swieq u l-ktajjen tal-provvista globali jinżammu miftuħa, stabbli u aċċessibbli.

Huma affermaw mill-ġdid ukoll l-għanijiet tal-Ftehim ta' Pariġi u laqgħu l-eżitu tas-26 Konferenza tal-Partijiet (COP26).

• Skeda informattiva: L-Ewropa u l-Asja għall-pjaneta tagħna (SEAE)

Il-mexxejja affermaw mill-ġdid ukoll l-appoġġ qawwi tagħhom għall-preservazzjoni u t-tisħiħ tas-sistema kummerċjali multilaterali bbażata fuq ir-regoli, miftuħa, trasparenti, inklużiva u nondiskriminatorja mal-Organizzazzjoni Dinjija tal-Kummerċ (WTO) fil-qalba tagħha.

Huma enfasizzaw il-ħtieġa urġenti li jinżamm l-ordni internazzjonali bbażat fuq ir-regoli u l-prinċipji tad-dritt internazzjonali man-Nazzjonijiet Uniti fil-qalba tiegħu sabiex jiġu indirizzati l-isfidi globali u reġjonali.

• Dikjarazzjoni ta' Phnom Penh dwar l-Irkupru Soċjoekonomiku wara l-COVID-19

Kwistjonijiet globali u reġjonali

Il-mexxejja enfasizzaw l-importanza ta' miżuri għall-bini tal-fiduċja u diplomazija preventiva fil-kontribut għall-paċi u l-istabbiltà.

Huma ddiskutew sitwazzjonijiet speċifiċi bħall-isforzi biex tiġi denuklearizzata l-peniżola Koreana, l-implimentazzjoni tal-Pjan ta' Azzjoni Komprensiv Konġunt (PAKK) rigward l-Iran, il-kriżi fil-Myanmar, u s-sitwazzjoni fl-Afganistan.

Il-President Michel għamel enfasi partikolari fuq ir-reġjun Indo-Paċifiku, u enfasizza l-importanza dejjem tikber tiegħu kif rifless fl-istrateġija tal-UE għall-kooperazzjoni mar-reġjun.

Diġà għandna l-akbar investitur f'dan ir-reġjun. U aħna wkoll sieħeb ewlieni fil-kooperazzjoni għall-iżvilupp u l-kummerċ f'dan ir-reġjun. "Iddeċidejna li nsaħħu l-fokus strateġiku, il-preżenza u l-azzjonijiet tagħna mar-reġjun. L-istrateġija tal-UE għall-kooperazzjoni fl-Indo-Paċifiku tibgħat sinjal politiku qawwi. Il-President Charles Michel wara s-summit tal-ASEM13

Konnettività

Filwaqt li rrikonoxxew li l-konnettività sostenibbli hija essenzjali għall-integrazzjoni ekonomika reġjonali u l-iżvilupp globali, il-mexxejja adottaw dikjarazzjoni dwar il-konnettività tal-ASEM.

• Dikjarazzjoni: It-Triq 'il Quddiem dwar il-Konnettività tal-ASEM

Id-dikjarazzjoni tistabbilixxi għadd ta' rakkomandazzjonijiet li l-membri jistgħu jimplimentaw fuq bażi volontarja. Dawn jikkonċernaw l-organizzazzjoni ta' laqgħat, il-kondiviżjoni tal-informazzjoni, u l-promozzjoni tal-konnettività tal-ASEM permezz tal-ASEM InfoBoard.

• InfoBoard tal-ASEM

Il-mexxejja enfasizzaw ukoll l-importanza li jissaħħu r-rabtiet soċjali u kulturali bejn l-Ewropa u l-Asja. Dawn jinkludu l-parteċipazzjoni taż-żgħażagħ fil-proċessi politiċi, iżda wkoll il-volontarjat u s-setturi ekonomiċi bħat-turiżmu sostenibbli u l-ekonomija kreattiva.

Informazzjoni ġenerali

Normalment avveniment biennali, is-summit kien skedat li jsir fl-2020 iżda kellu jiġi pospost minħabba l-pandemija tal-COVID-19.

Tħejjijiet għall-ASEM13

Fil-laqgħa tal-Kunsill Ewropew tal-21 u t-22 ta' Ottubru 2021, il-mexxejja tal-UE ddiskutew it-tħejjijiet għall-ASEM13. F'dan il-kuntest, huma appoġġaw l-istrateġija tal-UE għall-kooperazzjoni fir-reġjun Indo-Paċifiku u stiednu lill-Kunsill jiżgura l-implimentazzjoni rapida tagħha.

• Konklużjonijiet tal-Kunsill Ewropew, 21-22 ta' Ottubru 2021

Strateġija tal-UE għall-kooperazzjoni fl-Indo-Paċifiku

F'April 2021, il-Kunsill adotta konklużjonijiet dwar l-istrateġija tal-UE għall-kooperazzjoni fir-reġjun Indo-Paċifiku.

• Indo-Paċifiku: il-Kunsill jadotta konklużjonijiet dwar strateġija tal-UE għall-kooperazzjoni (stqarrija għall-istampa, 19 ta' April 2021)

F'Settembru 2021, il-Kummissjoni Ewropea u r-Rappreżentant Għoli għall-Affarijiet Barranin u l-Politika ta' Sigurtà ħarġu komunikazzjoni konġunta dwar l-istrateġija.

• Komunikazzjoni Konġunta: L-istrateġija tal-UE għall-kooperazzjoni fl-Indo-Paċifiku (SEAE)
• L-UE u r-reġjun Indo-Paċifiku: sħab naturali (stqarrija għall-istampa tal-Kummissjoni Ewropea, 16 ta' Settembru 2021)

Konnettività

Il-konnettività tal-ASEM hija bbażata fuq l-istrateġija tal-UE għall-konnessjoni bejn l-Ewropa u l-Asja, approvata mill-Kunsill qabel is-summit tal-ASEM12 fl-2018.

• Konnessjoni bejn l-Ewropa u l-Asja: Il-Kunsill jadotta konklużjonijiet (stqarrija għall-istampa, 15 ta' Ottubru 2018)

F'Ottubru 2018, il-Kummissjoni Ewropea nediet il-portal ta' konnettività sostenibbli tal-ASEM, bażi tad-data online li fiha 49 indikatur relatati mal-konnettività u s-sostenibbiltà.

• Portal tal-ASEM ta' konnettività sostenibbli (Kummissjoni Ewropea)

Dwar l-ASEM

Stabbilita fl-1996, il‑Laqgħa bejn l-Asja u l‑Ewropa hija pjattaforma informali għad-djalogu u l‑kooperazzjoni bejn l‑Ewropa u l‑Asja.

Bit-53 membru tagħha (30 pajjiż Ewropew u 21 pajjiż Asjatiku flimkien mal-UE u s-Segretarjat tal-ASEAN), hija l-akbar laqgħa tal-mexxejja internazzjonali wara l-Assemblea Ġenerali tan-NU. Il-grupp Ewropew fi ħdan l-ASEM huwa magħmul mis-27 stat membru tal-UE kif ukoll min-Norveġja, l-Iżvizzera u r-Renju Unit.

• Is-sit elettroniku tal-ASEAN

L‑ASEM f'ċifri

Is‑sħab tal‑ASEM jirrappreżentaw:

• 68 % tal‑kummerċ dinji
• 60% tal-popolazzjoni dinji
• 65% tal‑PDG dinji
• 75 % tat-turiżmu dinji

Aktar fatti u ċifri dwar l-ASEM:

• Fuljett dwar l‑ASEM (SEAE)
• Skeda informattiva dwar l‑ASEM (SEAE)

25 sena tal-ASEM

Attivitajiet

L-2021 tfakkar il-25 anniversarju tal-proċess tal-ASEM li jrawwem id-djalogu u l-kooperazzjoni, ir-rispett reċiproku, u s-sħubija ugwali bejn l-Asja u l-Ewropa.

• Lista ta' attivitajiet li jiċċelebraw il-25 sena tal-ASEM (Avviżiera tal-ASEM)

Jum l-ASEM

Biex tiċċelebra l-25 anniversarju tal-ASEM, l-UE fi sħubija maċ-Ċentru tal-Arti ta' Brussell (BOZAR) u l-Fondazzjoni Asja-Ewropa (ASEF) ospitat iċ-ċelebrazzjoni virtwali tal-Jum tal-ASEM fis-7 ta' Marzu 2021.

• Jum l-ASEM – 25 sena tal-Laqgħa bejn l-Asja u l-Ewropa (SEAE)
• Paġna dwar Jum l-ASEM (Avviżiera tal-ASEM)

Djalogu Politiku ta' Livell Għoli

Josep Borrell, ir-Rappreżentant Għoli għall-Affarijiet Barranin u l-Politika ta' Sigurtà, ta diskors fid-Djalogu Politiku ta' Livell Għoli biex ifakkar il-25 anniversarju tal-ASEM u ddiskuta l-prijoritajiet komuni għall-futur.

• L-ASEM tagħlaq 25 sena: It-tisħiħ tas-Sħubija bejn l-Asja u l-Ewropa f'Dinja li qed Tinbidel (SEAE)

Laqgħat preċedenti

Laqgħa tal-Ministri għall-Affarijiet Barranin tal-ASEM

L-14-il laqgħa tal-ministri għall‑affarijiet barranin tal-Asja u l-Ewropa saret f'Madrid, Spanja fil-15 u s-16 ta' Diċembru 2019. Din laqqgħet il-ministri għall-affarijiet barranin minn pajjiżi Ewropej u Asjatiċi, taħt it-tema "L-Asja u l-Ewropa: flimkien għal multilateraliżmu effettiv".

• Laqgħa Asja-Ewropa (ASEM) tal-Ministri għall‑Affarijiet Barranin, 15‑16 ta' Diċembru 2019

Summit preċedenti

It-12-il Laqgħa bejn l-Asja u l-Ewropa, li kienet ospitata mill-Unjoni Ewropea, saret fi Brussell fit-18 u d-19 ta' Ottubru 2018.

• Laqgħa bejn l-Asja u l-Ewropa (ASEM), 18-19 ta' Ottubru 2018