"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Laqgħa tal-mexxejja UE-Amerka Latina u Karibew permezz ta' vidjokonferenza, 2 ta' Diċembru 2021, 2 ta' Diċembru 2021
Riżultati ewlenin
Il-mexxejja tal-UE u ta' seba' pajjiżi tal-Amerka Latina u tal-Karibew (ALK) iltaqgħu permezz ta' vidjokonferenza fit-2 ta' Diċembru 2021.
Charles Michel, President tal-Kunsill Ewropew, ippresieda l-laqgħa. President Michel u Ursula von der Leyen, President tal-Kummissjoni Ewropea, irrappreżentaw lill-UE. Josep Borrell, Rappreżentant Għoli għall-Affarijiet Barranin u l-Politika ta' Sigurtà, ukoll ħa sehem fil-laqgħa.
Il-laqgħa tal-mexxejja tal-lum hija pass importanti għat-tnedija mill-ġdid tad-djalogu bejn l-UE u l-Amerka Latina u l-Karibew fl-ogħla livell. Nittamaw li dan ikun ukoll pass 'il quddiem lejn summit bireġjonali sħiħ hekk kif il-kundizzjonijiet jippermettu.
Charles Michel, President tal-Kunsill Ewropew
Is-sħab tal-Amerka Latina u l-Karibew kienu rrappreżentati mill-mexxejja tal-istat jew tal-gvern tal-pajjiżi tal-ALK li għandhom il-presidenzi ta' organizzazzjonijiet reġjonali u subreġjonali fl-2021: il-Brażil, il-Kolombja, il-Costa Rica, l-Ekwador, il-Gwatemala, il-Messiku u s-Suriname.
It-tema ġenerali tal-laqgħa kienet "Jingħaqdu l-forzi għal irkupru sostenibbli wara l-COVID".
Ir-rispons u l-irkupru għall-COVID-19
Il-mexxejja tal-UE tennew li huma lesti jżidu l-kooperazzjoni biex tiġi indirizzata l-pandemija tal-COVID-19.
B'ħidma bħala Tim Ewropa flimkien mal-istati membri, l-UE diġà pprovdiet €3 biljun f'appoġġ immedjat għas-saħħa lill-ALK. L-UE esportat aktar minn 130 miljun doża ta' tilqim lejn il-pajjiżi tal-ALK. Hija wasslet aktar minn 50 miljun doża fir-reġjun u għalhekk hija kontributur ewlieni għall-COVAX. L-istati membri tal-UE taw 10 miljun doża oħra lil kważi nofs il-pajjiżi kollha tal-ALK.
Il-Bank Ewropew tal-Investiment (BEI) ser jipprovdi self lill-Arġentina ta' madwar €85 miljun għall-finanzjament ta' inizjattivi ta' reżiljenza u ta' tħejjija għall-pandemiji kif ukoll b'appoġġ għax-xiri tat-tilqim.
L-UE hija lesta wkoll li tesplora l-possibbiltajiet għall-appoġġ tal-produzzjoni u d-distribuzzjoni tal-vaċċini fir-reġjun.
Aktar minn qatt qabel, l-assoċjazzjoni strateġika tagħna hija waħda ta' rilevanza ġeopolitika: flimkien, l-UE u l-ALK jirrappreżentaw kważi terz tas-sħubija tan-NU u seba' membri tal-G20. Għalhekk aħna jista' jkollna rwol deċiżiv fit-tfassil tal-aġenda multilaterali u fl-indirizzar tal-isfidi globali ewlenin bħall-COVID-19, l-iżvilupp sostenibbli u t-tibdil fil-klima.
Charles Michel, President tal-Kunsill Ewropew
Tħejjija għas-saħħa
L-UE hija lesta li tappoġġa inizjattivi reġjonali bħall-pjan ECLAC tan-NU għall-awtosuffiċjenza fi kwistjonijiet tas-saħħa fl-ALK u l-isforzi li għaddejjin tal-Organizzazzjoni Pan-Amerikana tas-Saħħa.
Filwaqt li enfasizzaw l-importanza ta' rispons multilaterali, il-mexxejja tal-UE stiednu lis-sħab tal-ALK biex jappoġġaw il-ħidma fuq strument internazzjonali ġdid dwar il-prevenzjoni, it-tħejjija u r-rispons għall-pandemiji.
Il-mexxejja tal-UE ħabbru li taħt l-NDICI-Ewropa Globali (2021-2027) ser ikunu disponibbli €3.4 biljun għall-ALK b'appoġġ għal irkupru sostenibbli fit-tul mill-pandemija.
Barra minn hekk, l-UE għandha l-għan li timmobilizza aktar minn €12 biljun ta' investiment pubbliku u privat fir-reġjun permezz tal-Fond Ewropew għall-Iżvilupp Sostenibbli Plus (EFSD+).
Mill-inqas €800 miljun ser ikunu riżervati biex jappoġġaw lill-Karibew u l-implimentazzjoni tal-Ftehim ta' wara Cotonou.
Il-ġlieda kontra t-tibdil fil-klima u t-telfien tal-bijodiversità
Il-mexxejja tal-UE ħabbru inizjattiva ġdida ta' Tim Ewropa li ser tappoġġa l-isforzi biex titwaqqaf id-deforestazzjoni fl-Amazon. Huma enfasizzaw ukoll il-kontribuzzjoni tal-UE ta' €1 biljun għall-Impenn Globali għall-Finanzjament tal-Foresti mħabbar fil-COP26 fi Glasgow.
L-UE ser tappoġġa finanzjarjament lis-sħab tal-ALK fit-twettiq tal-impenji tagħhom skont il-Ftehim ta' Pariġi. Il-mexxejja tal-UE offrew ukoll li jsaħħu l-kooperazzjoni biex jappoġġaw l-adattament għall-klima.
Il-mexxejja stennew b'interess it-tnedija ta' Alleanza Diġitali UE-ALK fl-2022 biex b'mod konġunt tavvanza d-diġitalizzazzjoni ċċentrata fuq il-bniedem. L-alleanza ser tibni fuq l-użu reċenti ta' kejbil fibrottiku transatlantiku (EllaLink) li jgħaqqad iż-żewġ reġjuni permezz tal-Portugall u l-Brażil. Il-kejbil dalwaqt għandu jiġi estiż għal pajjiżi oħra tal-ALK.
Wara t-tnedija fl-1 ta' Diċembru 2021 tal-Portal Globali, l-istrateġija ta' konnettività tal-UE, l-UE ser timpenja ruħha mal-pajjiżi tal-ALK biex b'mod konġunt tidentifika proġetti vijabbli oħra, bħall-iżvilupp tal-potenzjal tal-idroġenu ekoloġiku u l-ħolqien ta' ktajjen tal-valur sostenibbli tal-materja prima mar-reġjun tal-ALK.
Il-mexxejja tal-UE ħeġġew li jsir użu sħiħ min-network vast ta' ftehimiet kummerċjali u ta' assoċjazzjoni bejn iż-żewġ reġjuni bħala mutur għall-irkupru ekonomiku, il-ħolqien tal-impjiegi, u l-opportunitajiet ta' negozju u investiment fuq iż-żewġ naħat tal-Atlantiku.
Il-koeżjoni soċjali u l-ġlieda kontra l-inugwaljanzi
Il-mexxejja tal-UE enfasizzaw li r-rispett għad-drittijiet tal-bniedem u l-libertajiet fundamentali kien essenzjali għal irkupru dejjiemi, b'attenzjoni partikolari li għandha tingħata lil gruppi vulnerabbli u l-promozzjoni tat-tisħiħ tal-pożizzjoni tan-nisa u l-bniet. Inizjattiva reġjonali ġdida tat-Tim Ewropa dwar is-sigurtà u l-ġustizzja ser tappoġġa l-kooperazzjoni bireġjonali dwar is-sigurtà taċ-ċittadini, il-kriminalità organizzata u l-istat tad-dritt.
Il-mexxejja ddiskutew ukoll il-kooperazzjoni biex jiġu indirizzati l-inugwaljanzi li qed jiżdiedu u tiġi promossa l-koeżjoni soċjali. Inizjattiva ta' Tim Ewropa fl-2022 ser tiffoka fuq l-indirizzar ta' sfidi strutturali relatati, bħal pereżempju billi jinbnew sistemi ta' protezzjoni soċjali reżiljenti, it-tfassil mill-ġdid ta' politiki fiskali u l-promozzjoni ta' tfassil ta' politika pubblika inklużiva.
Il-mexxejja tal-UE u tal-ALK impenjaw ruħhom li jingħaqdu flimkien għal irkupru sostenibbli mill-pandemija tal-COVID-19
Sfond
Tħejjijiet għal-laqgħat
Is-suġġetti diskussi fil-laqgħa tal-mexxejja ġew identifikati waqt laqgħa ministerjali informali UE-ALK fl-14 ta' Diċembru 2020, li ġiet ospitata virtwalment f'Berlin mill-presidenza Ġermaniża ta' dak iż-żmien tal-Kunsill tal-UE.
Bi tħejjija għal-laqgħa tal-mexxejja UE-ALK, il-President Michel ħa sehem fis-sitt summit tal-Komunità ta' Stati tal-Amerka Latina u tal-Karibew (CELAC) fid-19 ta' Settembru 2021.
Marbuta mill-qrib f'termini ta' storja, kultura, popli u valuri, l-UE u l-Amerka Latina u l-Karibew (ALK) huma fost l-aktar reġjuni li jaħsbuha l-istess. Flimkien, dawn jiffurmaw terz tas-sħubija tan-NU u jirrappreżentaw seba' membri tal-G20.
Il-konnettività diġitali UE-ALK żdiedet b'mod sostanzjali permezz tal-kejbil fibrottiku sottomarin transatlantiku BELLA (Building the Europe Link with Latin America), li jgħaqqad il-Portugall mal-Brażil. Il-bini tiegħu ġie ffinalizzat f'Marzu 2021 u ġie uffiċjalment inawgurat fl-1 ta' Ġunju matul l-Assemblea Diġitali tal-2021, organizzata b'mod konġunt mill-presidenza Portugiża tal-Kunsill tal-UE u l-Kummissjoni Ewropea.
Is-sħubija bejn iż-żewġ reġjuni tinkludi network ta' ftehimiet ta' assoċjazzjoni, kummerċ, politika u kooperazzjoni bejn l-UE u 27 mit-33 pajjiż fl-Amerka Latina u l-Karibew.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Aktar minn qatt qabel, l-assoċjazzjoni strateġika tagħna hija waħda ta' rilevanza ġeopolitika: flimkien, l-UE u l-ALK jirrappreżentaw kważi terz tas-sħubija tan-NU u seba' membri tal-G20. Għalhekk aħna jista' jkollna rwol deċiżiv fit-tfassil tal-aġenda multilaterali u fl-indirizzar tal-isfidi globali ewlenin bħall-COVID-19, l-iżvilupp sostenibbli u t-tibdil fil-klima.
