Summit UE-Ukrajna, Kiev, l-Ukrajna, 12 ta' Ottubru 2021, 12 ta' Ottubru 2021

Riżultati ewlenin

It-23 summit bejn l-Unjoni Ewropea u l-Ukrajna sar f'Kiev fit-12 ta' Ottubru 2021.

Charles Michel, il-President tal-Kunsill Ewropew, u Ursula von der Leyen, il-President tal-Kummissjoni Ewropea, irrappreżentaw lill-UE. Il-President Volodymyr Zelenskyy rrappreżenta lill-Ukrajna.

Wara l-laqgħat uffiċjali, hemm kisbiet konkreti li jbiddlu ħajjet in-nies, iġibu l-libertà, aktar kapaċitajiet biex jiġi appoġġat l-istat tad-dritt, u aktar prosperità. Din hija t-tifsira reali tar-rabtiet bejn l-Ukrajna u l-UE. Charles Michel, il-President tal-Kunsill Ewropew

Fi tmiem is-summit, il-mexxejja adottaw dikjarazzjoni konġunta.

Assoċjazzjoni politika u integrazzjoni ekonomika

Il-mexxejja affermaw mill-ġdid l-impenn kontinwu għat-tisħiħ tal-assoċjazzjoni politika u l-integrazzjoni ekonomika tal-Ukrajna mal-Unjoni Ewropea.

Huma laqgħu r-riżultati li nkisbu permezz tal-ftehim ta' assoċjazzjoni (AA) bejn l-UE u l-Ukrajna u s-suċċess taż-żona ta' kummerċ ħieles approfondita u komprensiva (DCFTA). Sa mill-bidu tal-applikazzjoni tad-DCFTA fl-2016, il-flussi kummerċjali bilaterali żdiedu b'mod sostanzjali.

Iż-żewġ naħat laqgħu l-iskambju tal-valutazzjonijiet tagħhom tal-AA bil-ħsieb li jippreżentaw valutazzjoni konġunta fis-summit bilaterali li jmiss fi Brussell fl-2022.

Aħna nagħmlu parti mill-istess familja Ewropea. F'dawn l-aħħar snin, 17,000 student Ukren kellhom l-opportunità li jipparteċipaw fil-proġett Erasmus+. 50 miljun ċittadin Ewropew ibbenefikaw minn moviment mingħajr viża lejn l-UE. Kummenti mill-President Michel wara s-summit UE-Ukrajna

Il-mexxejja qablu li jkomplu jsaħħu l-integrazzjoni u l-kooperazzjoni ekonomika fil-qafas tal-AA, inkluż fl-oqsma li ġejjin:

• l-approssimazzjoni tal-politiki u l-leġiżlazzjoni tal-Ukrajna mal-Patt Ekoloġiku Ewropew
• l-integrazzjoni tas-swieq tal-enerġija u tas-sistemi tal-enerġija tal-Ukrajna mas-suq tal-enerġija tal-UE, li tistabbilixxi kondizzjonijiet ekwivalenti ta' kompetizzjoni
• il-kontinwazzjoni tat-tranżitu tal-gass permezz tal-Ukrajna lil hinn mill-2024, il-modernizzazzjoni tas-sistema ta' trażmissjoni tal-gass tal-Ukrajna u t-tisħiħ tas-sigurtà tal-enerġija Ewropea
• l-allinjament tal-Ukrajna mas-Suq Uniku Diġitali tal-UE fi ħdan il-mandat tal-ftehim ta' assoċjazzjoni.

L-UE u l-Ukrajna ffirmaw ukoll tliet ftehimiet fil-marġini tas-summit:

• ftehim dwar l-avjazzjoni ċivili li joħloq opportunitajiet kummerċjali ġodda għal-linji tal-ajru tal-Ukrajna u tal-istati membri tal-UE
• ftehim dwar l-adeżjoni tal-Ukrajna mal-programm Orizzont Ewropa u l-programm ta' Riċerka u Taħriġ tal-Euratom
• ftehim dwar l-adeżjoni tal-Ukrajna mal-programm Ewropa Kreattiva

Fit-tħejjija għas-summit tas-Sħubija tal-Lvant, il-mexxejja laqgħu l-progress li sar fl-implimentazzjoni tal-AAs u d-DCFTAs mal-Georgia, ir-Repubblika tal-Moldova u l-Ukrajna, u appellaw għall-implimentazzjoni sħiħa tagħhom. Is-summit ser isir fi Brussell fil-15 ta' Diċembru 2021.

Proċess ta' riforma

Il-mexxejja rrikonoxxew il-progress sostanzjali li sar mill-Ukrajna fil-proċess ta' riforma tagħha, bħall-ftuħ storiku tas-suq tal-art agrikola.

Huma enfasizzaw il-ħtieġa li jiżdiedu dawn l-isforzi, b'mod partikolari fir-rigward tar-riformi ġudizzjarji, il-ġlieda kontra l-korruzzjoni u r-riforma tas-settur tas-sigurtà.

L-UE affermat mill-ġdid l-appoġġ sostanzjali kontinwu tagħha għall-Ukrajna b'rabta ċara mal-implimentazzjoni effettiva tar-riformi u l-miżuri ta' politika. Sa mill-2014, l-UE u l-Istituzzjonijiet Finanzjarji Ewropej mobilizzaw pakkett bla preċedent ta' aktar minn €17-il biljun f'self u għotjiet għall-Ukrajna.

Assistenza tal-COVID-19

Il-mexxejja nnutaw li l-appoġġ tal-UE biex tgħin lill-Ukrajna tindirizza l-impatt soċjoekonomiku tal-pandemija jmur ferm lil hinn minn dak li l-UE pprovdiet lil kwalunkwe sieħeb ieħor, b'allokazzjoni ta' €1.2 biljun f'assistenza makrofinanzjarja flimkien ma' pakkett ta' appoġġ ta' €190 miljun.

L-UE u l-Ukrajna ser jikkooperaw mill-qrib biex jiżguraw li l-Ukrajna jkollha aċċess għat-tilqim kontra l-COVID-19 fil-qafas tal-pjattaforma COVAX, inkluż permezz tal-Mekkaniżmu tal-UE għat-Trasferiment tal-Vaċċini.

Il-mexxejja laqgħu wkoll il-fatt li l-Ukrajna tagħmel parti mill-pajjiżi u t-territorji mhux tal-UE konnessi maċ-Ċertifikat COVID Diġitali tal-UE. Dan ifisser li ċertifikat COVID tal-Ukrajna huwa aċċettat fl-UE bl-istess kundizzjonijiet bħaċ-Ċertifikat COVID Diġitali tal-UE. Bl-istess mod, iċ-Ċertifikat COVID Diġitali tal-UE huwa aċċettat mill-Ukrajna.

• Ċertifikat Diġitali tal-UE: kif jaħdem (tagħrif ġenerali)
• Infografika - Ċertifikat Diġitali tal-UE
• Ċertifikat COVID Diġitali tal-UE (Kummissjoni Ewropea)

Politika barranija u ta' sigurtà

L-UE affermat mill-ġdid l-appoġġ sod tagħha għall-indipendenza, is-sovranità u l-integrità territorjali tal-Ukrajna.

Il-mexxejja ħadu nota tal-importanza li tissaħħaħ aktar il-kooperazzjoni fil-qasam tal-Politika ta' Sigurtà u ta' Difiża Komuni (PSDK) u tal-konverġenza akbar tal-Ukrajna mal-Politika Estera u ta' Sigurtà Komuni (PESK).

Huma rrikonoxxew ukoll l-importanza li tissaħħaħ aktar il-kooperazzjoni fil-ġlieda kontra t-theddid ibridu u l-indirizzar tad-diżinformazzjoni.

Is-sigurtà tfisser ukoll li jiżdiedu l-isforzi biex jiġu miġġielda t-theddid ibridu u l-attakki ċibernetiċi. Huwa għalhekk li ser inkomplu nsaħħu d-djalogu ċibernetiku tagħna. Kummenti mill-President Michel wara s-summit UE-Ukrajna

Il-mexxejja tennew il-kundanna qawwija tagħhom tal-ksur ċar tas-sovranità u l-integrità territorjali tal-Ukrajna minn atti ta' aggressjoni mill-forzi armati Russi minn Frar 2014.

L-UE laqgħet l-istabbiliment tal-Pjattaforma Internazzjonali dwar il-Krimea varata fis-summit ta' tnedija li sar fit-23 ta' Awwissu f'Kiev, u tappoġġa l-implimentazzjoni tad-dikjarazzjoni konġunta li ffirmaw l-UE u l-istati membri tagħha.

L-Ukrajna laqgħet il-konklużjonijiet tal-Kunsill Ewropew f'Ġunju, li fihom il-mexxejja tal-UE affermaw mill-ġdid li l-implimentazzjoni sħiħa tal-ftehimiet ta' Minsk tibqa' l-kundizzjoni ewlenija għal kwalunkwe bidla sostanzjali fil-pożizzjoni tal-UE fir-relazzjonijiet tagħha mar-Russja.

Sanzjonijiet tal-UE kontra r-Russja

Il-mexxejja enfasizzaw li l-UE kienet reġgħet estendiet is-sanzjonijiet ekonomiċi tagħha fuq ir-Russja, li kienu ġew adottati mill-2014 b'reazzjoni għall-annessjoni illegali tal-Krimea u d-destabbilizzazzjoni intenzjonata tal-Ukrajna.

It-tul ta' żmien ta' dawn is-sanzjonijiet jibqa' marbut b'mod ċar mal-implimentazzjoni sħiħa tal-ftehimiet ta' Minsk.

Barra minn hekk, fil-jum ta' qabel is-summit, il-Kunsill impona miżuri restrittivi fuq tmien individwi addizzjonali talli b'mod attiv appoġġaw azzjonijiet u implimentaw politiki li jdgħajfu jew jheddu l-integrità territorjali, is-sovranità u l-indipendenza tal-Ukrajna.

Informazzjoni ġenerali

Relazzjonijiet tal-UE mal-Ukrajna

Ir-relazzjonijiet bejn l-UE u l-Ukrajna huma bbażati fuq ftehim ta' assoċjazzjoni (AA) li daħal fis-seħħ fl-2017. Il-parti ekonomika tal-AA hija żona ta' kummerċ ħieles approfondita u komprensiva (DCFTA).

• Ir-relazzjonijiet tal-UE mal-Ukrajna (informazzjoni ġenerali)
• Is-sit web tad-delegazzjoni tal-Unjoni Ewropea fl-Ukrajna

Liberalizzazzjoni tal-viża

Mill-2017 'l hawn, iċ-ċittadini Ukreni ma għadhomx jeħtieġu viża għal soġġorni qosra fiż-żona Schengen.

Is-summit preċedenti

Is-summit preċedenti UE-Ukrajna sar fis-6 ta' Ottubru 2020 fi Brussell.