Vidjokonferenza tal-ministri għall-affarijiet interni, 8 ta' Ottubru 2020

Riżultati ewlenin

Migrazzjoni u ażil

Il-ministri għall-affarijiet interni kellhom l-ewwel diskussjoni dwar il-proposti reċenti tal-Kummissjoni għal patt dwar il-migrazzjoni u l-ażil. Huma qablu b'mod ġenerali mal-approċċ tal-Presidenza li jimxu 'l quddiem pass pass fir-rigward tar-riforma l-ġdida tal-ażil u l-migrazzjoni.

Li wieħed isib soluzzjoni ġusta, effiċjenti u reżiljenti għall-ġestjoni tal-migrazzjoni u l-ażil hija ta' importanza kruċjali għall-futur tal-Ewropa. Biex niksbu dan, jeħtieġ li lkoll nagħmlu kompromessi. L-istati membri llum esprimew l-impenn sħiħ tagħhom li jaħdmu lejn dan l-għan fix-xhur li ġejjin. Horst Seehofer, Ministru Federali għall-Intern, il-Bini u l-Komunità tal-Ġermanja

Il-Presidenza indikat l-intenzjoni tagħha li torganizza dibattiti ta' orjentazzjoni dwar tliet aspetti ewlenin u interrelatati: il-proċedura qabel id-dħul fl-UE, il-prevenzjoni tal-abbuż tas-sistema tal-ażil u s-solidarjetà. L-għan tagħha huwa li jintlaħaq qbil politiku dwar dawn l-aspetti sa tmiem il-Presidenza. Ser titmexxa 'l quddiem ukoll il-ħidma dwar il-finalizzazzjoni ta' fajls leġiżlattivi ewlenin fejn tidher li tista' tintlaħaq il-finalizzazzjoni rapida. Dawn huma r-regolament Eurodac u r-regolament dwar l-aġenzija tal-UE għall-ażil.

• Politika tal-UE dwar il-migrazzjoni

L-involviment ma' pajjiżi terzi dwar il-migrazzjoni

Il-ministri evalwaw l-aħħar żviluppi u inizjattivi dwar l-involviment ma' pajjiżi terzi dwar il-migrazzjoni, b'mod partikolari rigward l-Afrika ta' Fuq u l-Balkani tal-Punent. Huma ffukaw fuq żewġ strutturi jew pjattaformi operazzjonali li nbdew fix-xhur li għaddew.

L-ewwel pjattaforma biex titjieb il-koordinazzjoni bejn l-atturi rilevanti kollha tar-Rotta tal-Mediterran tal-Lvant qed tiġi stabbilita wara konferenza ministerjali fit-22 u t-23 ta' Lulju li laqqgħet flimkien diversi stati membri tal-UE u s-sħab tal-Balkani tal-Punent. Wara vidjokonferenza fit-13 ta' Lulju li laqqgħet flimkien għadd ta' stati membri tal-UE u sħab tal-Afrika ta' Fuq, qed isiru aktar sforzi biex jiġu operazzjonalizzati l-kooperazzjoni fil-ġestjoni tal-fruntieri u l-prevenzjoni u l-ġlieda kontra l-faċilitazzjoni ta' dħul klandestin ta' migranti.

Sħubija Ewropea tal-Pulizija

Il-ministri ddiskutew l-iżvilupp ta' Sħubija Ewropea tal-Pulizija strateġika biex jingħata impetu ġdid lill-kooperazzjoni tal-pulizija fil-livell tal-UE. Huma ffukaw fuq il-ħtieġa li tittejjeb l-arkitettura tas-sigurtà eżistenti fi tliet oqsma:

• L-applikazzjoni ta' teknoloġiji ġodda, bħall-intelliġenza artifiċjali, biex jinftiehem aħjar il-fluss dejjem jikber ta' data.
• It-tisħiħ tal-kooperazzjoni operazzjonali bejn il-forzi tal-pulizija billi jiġi kkonsolidat l-acquis dwar il-kooperazzjoni tal-pulizija u jiġi żgurat li l-uffiċjali jkunu jistgħu jsiru jafu faċilment liema għodod ta' kooperazzjoni huma disponibbli għalihom
• Il-bini ta' sħubija attiva ma' pajjiżi terzi, billi jiġi żgurat li nistgħu nikkooperaw b'mod effiċjenti filwaqt li naderixxu mal-valuri tagħna.