Vidjokonferenza tal-ministri għall-affarijiet interni, 13 ta' Novembru 2020

Riżultati ewlenin

Il-ġlieda kontra t-terroriżmu

Meta l-Ewropa taħdem flimkien biex tiġġieled it-terroriżmu u l-estremiżmu, imbagħad hemm tkun superpotenza. L-istati membri kollha adottaw id-dikjarazzjoni dwar l-aħħar attakki terroristiċi. Dan jibgħat sinjal qawwi ta' solidarjetà. F'dak li għandu x'jaqsam mal-ġlieda fit-tul u bla kompromessi kontra t-terroriżmu u l-estremiżmu, l-Ewropa taħdem id f'id. Horst Seehofer, Ministru Federali għall-Intern, il-Bini u l-Komunità tal-Ġermanja

Wara l-attakki terroristiċi reċenti, il-ministri taw ħarsa lejn kif jistgħu jkomplu jissaħħu l-isforzi konġunti tal-UE fil-ġlieda kontra t-terroriżmu u ħarġu dikjarazzjoni konġunta.

• Dikjarazzjoni konġunta mill-ministri għall-affarijiet interni tal-UE dwar l-attakki terroristiċi reċenti fl-Ewropa (stqarrija għall-istampa, 13 ta' Novembru 2020)

F'din id-dikjarazzjoni l-ministri jaffermaw mill-ġdid id-determinazzjoni tagħhom li jirrispettaw il-valuri komuni tal-UE u jiġġieldu dan it-terrur barbaru b'mod olistiku. Huma jfakkru fil-miżuri meħuda matul dawn l-aħħar għoxrin sena u jenfasizzaw għadd ta' azzjonijiet fejn għandha titmexxa 'l quddiem il-ħidma, inkluż fl-oqsma tal-libertà reliġjuża, il-koeżjoni soċjali, it-tisħiħ tas-sigurtà ta' żona Schengen li tiffunzjona tajjeb, l-iżgurar tas-sigurtà, il-prevenzjoni tar-radikalizzazzjoni online u offline, l-iskambju ta' informazzjoni dwar persuni li huma ta' theddida terroristika jew estremista vjolenti, ġellieda terroristi barranin, l-arkitettura tal-informazzjoni mġedda tal-UE u l-protezzjoni tal-ispazji pubbliċi.

• Rispons għat-theddida terroristika (informazzjoni ġenerali)

Patt dwar il-migrazzjoni u l-ażil

Il-ministri ddiskutew il-proposti tal-Kummissjoni għal patt dwar il-migrazzjoni u l-ażil. Kellhom dibattitu ta' orjentazzjoni dwar elementi ewlenin tal-patt, inkluż dwar id-dimensjoni esterna, il-fażi proposta ta' qabel id-dħul, il-mekkaniżmu ta' solidarjetà, il-migrazzjoni interna u l-ġestjoni tal-ażil, diversi mezzi biex jittejjeb ir-ritorn, ir-rwol tal-aġenziji, il-perkorsi legali għad-dħul fl-Ewropa u l-integrazzjoni.

L-eżami tal-patt ser ikompli fil-livell tekniku, filwaqt li l-ministri huma mistennija jerġgħu lura għal dawn l-elementi ewlenin fil-laqgħa tagħhom f'Diċembru.

• Patt ġdid dwar il-migrazzjoni u l-ażil (Kummissjoni Ewropea)
• Kif l-UE timmaniġġa l-flussi migratorji (informazzjoni ġenerali)
• Flussi tal-migrazzjoni (infografika)