"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Vidjokonferenza tal-ministri għall-ġustizzja, 2 ta' Diċembru 2020
Riżultati ewlenin
Il-ministri tal-UE ddiskutew l-aspetti tal-ġustizzja tal-ġlieda kontra t-terroriżmu u l-iżviluppi tal-istat tad-dritt fil-qasam tal-ġustizzja. Huma ħarsu wkoll lejn l-aħħar żviluppi li jikkonċernaw ir-regolament dwar iċ-ċessjonijiet tal-pretensjonijiet u l-istabbiliment tal-Uffiċċju tal-Prosekutur Pubbliku Ewropew.
Il-ġlieda kontra t-terroriżmu
Wara l-aħħar attakki fi Franza, l-Awstrija u l-Ġermanja, il-ministri ddiskutew l-aspetti tal-ġustizzja tal-ġlieda kontra t-terroriżmu, fejn koprew għadd ta' kwistjonijiet.
Dwar is-suġġett tad-diskors ta' mibegħda online, il-ministri ddiskutew l-esperjenza tagħhom fil-livell nazzjonali rigward ir-rappurtar ta' reati kriminali marbutin ma' reati ta' mibegħda u diskors ta' mibegħda u aktar azzjoni possibbli. Huma qablu b'mod ġenerali li l-isforzi volontarji tal-pjattaformi online biex jipprevjenu b'mod effettiv it-tixrid ta' tali kontenut illegali mhumiex biżżejjed u jenħtieġu regoli vinkolanti.
Il-ġlieda kontra t-terroriżmu hija wkoll ġlieda kontra l-mibegħda u d-disprezz għall-umanità fuq l-internet. Kull min jinċita l-vjolenza għandu jitħarrek b'mod aktar b'saħħtu u fi stadju aktar bikri madwar l-Ewropa. Neħtieġu rekwiżiti ċari madwar l-Ewropa kollha dwar kif il-pjattaformi online jittrattaw diskors ta' mibegħda kriminali. Jekk dawk ir-rekwiżiti ma jiġux sodisfatti, irid ikun hemm sanzjonijiet. Impenji volontarji mhumiex biżżejjed meta wieħed jittratta t-theddid ta' mewt u l-propaganda terroristika. Tassew wasal iż-żmien li n-nies jiġu mħarsa b'mod effettiv kontra l-mewġ ta' mibegħda.
Christine Lambrecht, Ministru Federali għall-Ġustizzja u l-Protezzjoni tal-Konsumatur tal-Ġermanja
Il-ministri kkunsidraw ukoll jekk ikunx xieraq li wieħed imur lil hinn mit-tħassir tal-kontenut u li jiġi previst obbligu għall-pjattaformi online li jirrappurtaw reati kriminali relatati ma' reati ta' mibegħda u diskors ta' mibegħda lill-awtorità kompetenti jekk isiru jafu bihom. Il-bilanċ it-tajjeb, skont il-prinċipji tan-neċessità u l-proporzjonalità, bejn dawn l-obbligi vinkolanti u l-libertà tal-espressjoni ġie enfasizzat ukoll minn xi ministri.
Il-ministri evalwaw il-ħidma li għaddejja fuq il-kooperazzjoni diġitali. Il-presidenza enfasizzat studju tal-Kummissjoni dwar il-ġustizzja kriminali diġitali transkonfinali, li jistipula bosta modi biex id-diġitalizzazzjoni tintuża aktar għall-kooperazzjoni ġudizzjarja fl-UE. Il-ministri tennew ukoll l-importanza tal-pakkett ta' evidenza elettronika, li dwaru l-Kunsill adotta l-pożizzjoni ta' negozjar tiegħu f'Diċembru 2018. In-negozjati mal-Parlament Ewropew ser jibdew ladarba dan ikun adotta l-pożizzjoni tiegħu. Bosta stati membri esprimew ukoll il-ħtieġa li tinstab triq 'il quddiem fuq il-kwistjoni taż-żamma tad-data li tieħu kont tal-aħħar sentenzi mill-Qorti Ewropea tal-Ġustizzja.
L-appoġġ għall-vittmi tat-terroriżmu u t-tisħiħ tad-drittijiet tagħhom huwa parti fundamentali mill-politika tal-UE kontra t-terroriżmu. Il-presidenza għarrfet lill-ministri dwar il-ħidma li għaddejja f'dan il-qasam, fejn il-koordinazzjoni f'każijiet b'implikazzjonijiet transkonfinali għad trid tittejjeb biex tiġi ffaċilitata l-għajnuna immedjata għal vittmi ta' attakki kull fejn dan iseħħ.
Il-presidenza ppreżentat ukoll il-konklużjonijiet tal-Kunsill dwar l-isfidi attwali u t-triq 'il quddiem fir-rigward tal-mandat ta' arrest Ewropew u l-proċeduri ta' estradizzjoni, li ġew adottati fl-1 ta' Diċembru 2020.
Il-ministri kkunsidraw ir-rapport mill-Eurojust u n-Network għall-Ġenoċidju dwar il-prosekuzzjoni kumulattiva ta' ġellieda terroristi barranin għal reati internazzjonali ewlenin u reati marbutin mat-terroriżmu. Ir-rapport jikkonkludi li l-prosekuzzjoni ta' reati terroristiċi flimkien ma' reati internazzjonali ewlenin tiżgura r-responsabbiltà kriminali sħiħa tal-awturi, tirriżulta f'sentenzi ogħla u tagħti aktar ġustizzja lill-vittmi.
Il-ministri qasmu l-fehmiet tagħhom dwar l-iżviluppi fl-istat tad-dritt fil-qasam tal-ġustizzja, wara l-preżentazzjoni mill-Kummissjoni f'Settembru tar-rapport annwali tagħha tal-2020 dwar l-istat tad-dritt.
Huma qasmu l-fehmiet tagħhom dwar aspetti relatati mal-ġustizzja, l-iżviluppi u l-aħjar prattiki tal-istat tad-dritt, speċjalment fir-rigward tal-elementi ewlenin tal-indipendenza ġudizzjarja, l-effiċjenza u l-ġlieda kontra l-korruzzjoni. Huma wrew ukoll appoġġ mifrux għall-ħolqien ta' forum ta' diskussjoni għall-imħallfin bħala għodda importanti biex tissaħħaħ il-bażi komuni f'termini ta' kultura legali u biex jittejbu l-iskambji fil-qasam tal-istat tad-dritt.
Ċessjonijiet tal-pretensjonijiet
Il-ministri ġew infurmati mill-presidenza dwar is-sitwazzjoni attwali tal-proposta għal regolament dwar iċ-ċessjonijiet tal-pretensjonijiet.
Matul l-aħħar xhur, sar progress sinifikanti fuq għadd ta' elementi, fosthom ċerti esklużjonijiet mill-kamp ta' applikazzjoni tar-regolament, id-definizzjoni tal-effetti fuq partijiet terzi fiċ-ċessjonijiet tal-pretensjonijiet u t-trattament ta' stati b'aktar minn sistema legali waħda. Madankollu, għad hemm bżonn ta' aktar ħidma f'għadd ta' oqsma, bħar-regola ġenerali li għandha tiġi applikata, aspetti oħra relatati mal-kamp ta' applikazzjoni tal-proposta u t-trattament ta' ċessjonijiet ta' pretensjonijiet iggarantiti bi proprjetà immobbli jew assi rreġistrati.
Il-ħidma fuq din il-proposta hija mistennija tkompli fil-livell tekniku taħt il-presidenza Portugiża li jmiss tal-Kunsill.
Il-ministri għall-ġustizzja ġew infurmati mill-Kummissjoni dwar is-sitwazzjoni attwali fir-rigward tal-implimentazzjoni tar-regolament dwar l-UPPE. Għaddejja ħidma f'diversi oqsma bil-għan li l-UPPE jkun stabbilit u operazzjonali kompletament mill-aktar fis possibbli.
F'dawn l-aħħar xhur sar progress fil-ħatra tal-Prosekuturi Delegati Ewropej, kif ukoll, fil-Kunsill, dwar ir-relazzjonijiet tal-UPPE ma' pajjiżi terzi u mal-istati membri li ma jipparteċipawx fil-kooperazzjoni msaħħa. Dwar dan l-aħħar punt il-presidenza ħejjiet rapport komprensiv li huwa maħsub biex jipprovdi analiżi fil-fond tal-istrumenti legali rilevanti u gwida għall-passi li jmiss.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-ġlieda kontra t-terroriżmu hija wkoll ġlieda kontra l-mibegħda u d-disprezz għall-umanità fuq l-internet. Kull min jinċita l-vjolenza għandu jitħarrek b'mod aktar b'saħħtu u fi stadju aktar bikri madwar l-Ewropa. Neħtieġu rekwiżiti ċari madwar l-Ewropa kollha dwar kif il-pjattaformi online jittrattaw diskors ta' mibegħda kriminali. Jekk dawk ir-rekwiżiti ma jiġux sodisfatti, irid ikun hemm sanzjonijiet. Impenji volontarji mhumiex biżżejjed meta wieħed jittratta t-theddid ta' mewt u l-propaganda terroristika. Tassew wasal iż-żmien li n-nies jiġu mħarsa b'mod effettiv kontra l-mewġ ta' mibegħda.
