Kif l-UE tieħu ħsieb il-flussi migratorji

Nattiraw il-ħiliet u t-talent

Fis-27 ta' April 2022, il-Kummissjoni Ewropea ppreżentat komunikazzjoni li tistabbilixxi approċċ lejn politika tal-migrazzjoni legali tal-UE ġdida u sostenibbli, li tattira l-ħiliet u t-talent li l-UE għandha bżonn biex tindirizza n-nuqqas ta' ħaddiema u li twieġeb għat-tibdil demografiku fl-Ewropa.

Fl-istess jum, il-Kummissjoni ppreżentat ukoll żewġ proposti biex timmodernizza d-direttiva dwar il-permess uniku u d-direttiva dwar ir-residenti għal żmien twil.

• Komunikazzjoni: Nattiraw il-ħiliet u t-talent lejn l-UE (leġiżlazzjoni tal-UE)

Riżerva ta' talent

L-UE qed tistabbilixxi riżerva ta' talent, pjattaforma għall-UE kollha. Ir-riżerva ta' talent tal-UE tista' ttejjeb il-profil tal-UE u tagħti lill-impjegaturi fl-UE aċċess aħjar għal ċittadini ta' pajjiżi terzi b'ħiliet speċifiċi. Ser tkun l-ewwel pjattaforma għall-UE kollha li għandha l-għan tagħmel ir-reklutaġġ internazzjonali aktar faċli u rapidu għal impjiegi bi skarsezza ta' ħaddiema fl-UE kollha.

Għandha l-għan li:

• tqabbad persuni li qed ifittxu impjieg ibbażati f'pajjiżi terzi ma' impjegaturi bbażati fl-UE
• tgħin biex jiġu indirizzati skarsezzi kritiċi fis-suq tax-xogħol domestiku tal-UE

Għal min hi?

• persuni minn pajjiżi terzi li qed ifittxu impjieg
• impjegaturi fl-Ewropa, b'mod speċifiku fis-setturi fejn hemm skarsezza ta' ħaddiema
• l-istati membri interessati jistgħu jissieħbu fuq bażi volontarja

• Il-Kunsill jagħti l-kunsens finali tiegħu għal pjattaforma tat-talent tal-UE għal persuni mhux mill-UE li qed ifittxu impjieg (stqarrija għall-istampa, 30 ta' Marzu 2026)

Permess uniku

Il-proposta biex tiġi rieżaminata d-direttiva dwar il-permess uniku għandha l-għan li tkompli tissimplifika din il-proċedura biex tagħmilha aktar faċli biex l-istati membri jattiraw il-ħiliet u t-talent minn pajjiżi terzi. Il-proposta ssaħħaħ ukoll il-protezzjoni tal-ħaddiema migranti kontra l-isfruttament u t-trattament inugwali.

Din id-direttiva proposta għandha l-għan li tistabbilixxi:

• proċedura unika ta' applikazzjoni għal permess ta' xogħol u ta' residenza kkombinat
• garanzija ta' sett komuni ta' drittijiet għaċ-ċittadini ta' pajjiżi terzi eliġibbli abbażi tat-trattament ugwali bħaċ-ċittadini tal-istat membru li jagħti l-permess uniku
• ipproċessar aktar mgħaġġel ta' applikazzjoni
• il-possibbiltà għad-detenturi ta' permess uniku li jibdlu l-impjegatur
• struzzjonijiet ċari jekk detentur ta' permess uniku jispiċċa bla xogħol

Fit-8 ta' Ġunju 2023, il-Kunsill adotta l-approċċ ġenerali tiegħu. Fl-20 ta' Diċembru l-Kunsill u l-Parlament Ewropew qablu proviżorjament li jaġġornaw il-proċedura tal-permess uniku. Id-direttiva dwar il-permess uniku ġiet adottata mill-Kunsill fit-12 ta' April 2024.

• Migrazzjoni legali: il-Kunsill jagħti l-approvazzjoni tiegħu għall-permess uniku ta' xogħol u ta' residenza għal ċittadini mhux tal-UE (stqarrija għall-istampa, 12 ta' April 2024)

Residenti għal żmien twil

Il-proposta tal-Kummissjoni ta' Settembru 2020, ukoll parti mill-pakkett usa' dwar il-migrazzjoni legali, għandha l-għan li:

• toħloq status reali ta' resident għal żmien twil tal-UE
• issaħħaħ id-dritt tar-residenti għal żmien twil li jiċċaqilqu u jaħdmu fi stati membri oħra

Il-proposta għal direttiva tistabbilixxi l-kundizzjonijiet li bihom ċittadini ta ' pajjiżi terzi li jkunu kontinwament għexu legalment fi stat membru għal mill-inqas ħames snin jistgħu jiksbu permess ta' residenza għal żmien twil jew permanenti tal-UE.

Ser japplikaw ċerti kundizzjonijiet sabiex l-applikanti jkunu jistgħu jiksbu status ta' residenti għat-tul bħal:

• applikanti ta' pajjiżi terzi jridu jipprovdu evidenza ta' riżorsi stabbli u regolari li huma suffiċjenti biex imantnu lilhom infushom u lill-membri tal-familja tagħhom, kif ukoll assigurazzjoni tal-mard
• l-istati membri jistgħu jirrikjedu wkoll li ċittadini ta' pajjiżi terzi jikkonformaw mal-kundizzjonijiet ta' integrazzjoni

Fit-23 ta' Novembru 2023, l-istati membri tal-UE qablu dwar il-mandat ta' negozjar tagħhom għall-aġġornament ta' din id-direttiva.

• Proposta għal direttiva dwar l-istatus ta' ċittadini ta' pajjiżi terzi li jkunu residenti għal żmien twil (riformulazzjoni)
• Ċittadini ta' pajjiżi terzi: L-UE taġġorna r-regoli għal status fit-tul (stqarrija għall-istampa, 23 ta' Novembru 2023)

Ħaddiema b'livell għoli ta' ħiliet

Fis-7 ta' Ottubru 2021, il-Kunsill adotta d-direttiva riveduta dwar il-karta blu. Ir-regoli l-ġodda jarmonizzaw aktar il-kondizzjonijiet ta' dħul u residenza għall-ħaddiema bi kwalifiki għolja minn pajjiżi mhux tal-UE u jagħmlu l-karta blu tal-UE aktar attraenti.

Din is-sistema ta' ammissjoni fl-UE kollha għandha l-għan li tattira u żżomm ħaddiema bi kwalifiki għoljin, b'mod partikolari fis-setturi li qed jiffaċċaw nuqqas ta' ħiliet, b'mod partikolari billi:

• tistabbilixxi kriterji ta' ammissjoni aktar inklużivi
• tiffaċilita l-mobbiltà ġewwa l-UE
• tħaffef ir-riunifikazzjoni tal-familji
• tissimplifika l-proċeduri għal impjegaturi rikonoxxuti
• tagħti livell għoli ħafna ta' aċċess għas-suq tax-xogħol

L-istati membri ser ikunu jistgħu jżommu l-iskemi nazzjonali għal ħaddiema bi kwalifiki għoljin b'mod parallel mal-iskema tal-karta blu tal-UE. Madankollu, ir-regoli l-ġodda ser jintroduċu għadd ta' dispożizzjonijiet biex jiġi żgurat li d-detenturi ta' karti blu tal-UE u l-familji tagħhom ma jkunux fi żvantaġġ meta mqabbla mad-detenturi ta' permessi nazzjonali.

Id-direttiva dwar il-karta blu tal-UE ġiet adottata għall-ewwel darba fl-2009. Il-Kummissjoni pproponiet riforma tar-regoli fl-2016.

• Migrazzjoni legali: il-Kunsill jadotta direttiva dwar il-karta blu biex jattira ħaddiema bi kwalifiki għolja (stqarrija għall-istampa, 7 ta' Ottubru 2021)

Risistemazzjoni

Ir-risistemazzjoni tippermetti li r-refuġjati li jeħtieġu protezzjoni jidħlu fl-UE b'mod legali u sikur mingħajr ma jkollhom għalfejn jirriskjaw ħajjithom waqt vjaġġi perikolużi.

Mill-2015 'l hawn, skemi ta' risistemazzjoni ta' suċċess appoġġati mill-UE għenu lil aktar minn 98 000 mill-aktar persuni vulnerabbli li jeħtieġu protezzjoni internazzjonali sabiex isibu kenn fl-Unjoni Ewropea. Qabel l-implimentazzjoni ta' kull skema ta' risistemazzjoni, il-pajjiżi tal-UE jħabbru l-wegħdiet tagħhom għal kemm-il refuġjat beħsiebhom jilqgħu.

L-iskema 2021-2022 għall-ewwel darba inkludiet wegħdiet għal ammissjonijiet umanitarji, flimkien mal-wegħdiet għar-risistemazzjoni.

Flimkien mal-programmi ta' ammissjoni umanitarja, l-istati membri tal-UE s'issa offrew protezzjoni lil madwar 130 000 persuna:

• 19 455 fl-2015-2017, li jkopru 86% tal-wegħdiet totali
• 45 570 fl-2018-2019, li jkopru 91% tal-wegħdiet totali
• 24 656 fl-2020-2021, li jkopru 72% tal-wegħdiet totali
• 33 800 fl-2021-2022 (kważi 5 000 persuna taħt programmi ta' risistemazzjoni u 28 800 taħt programmi ta' ammissjoni umanitarja)

Il-perjodu ta' implimentazzjoni għall-iskema 2020-2021 ġie estiż minħabba t-tifqigħa tal-coronavirus. Il-wegħdiet tal-istati membri għar-risistemazzjoni u l-ammissjoni umanitarja komplew jiġu implimentati matul l-2022.

F'Lulju 2022, il-Kummissjoni Ewropea nediet l-eżerċizzju ta' wegħdiet 2023-2025 għar-risistemazzjoni u l-ammissjonijiet umanitarji u stiednet lill-istati membri biex jipprovdu:

• wegħdiet għall-2023
• tbassir ta' wegħdiet għall-2024-2025 (sa fejn ikun possibbli)

Minbarra l-iskemi ta' risistemazzjoni, aktar minn 37 300 persuna ġew risistemati skont id-Dikjarazzjoni UE-Turkija tal-2016.

Fl-2016, il-Kummissjoni Ewropea pproponiet regolament li jistabbilixxi qafas ta' risistemazzjoni tal-UE biex jiġu pprovduti rotot sikuri u legali għall-protezzjoni internazzjonali lil dawk fil-bżonn. B'dan il-mod l-UE ser timxi minn skemi ta' risistemazzjoni ad hoc għal qafas aktar stabbli b'aktar sostenibbiltà u prevedibbiltà.

• Tisħiħ tal-mezzi legali: il-Kummissjoni tipproponi li toħloq qafas komuni tal-UE dwar ir-risistemazzjoni (Kummissjoni Ewropea, 13 ta' Lulju 2016)
• Rakkomandazzjoni dwar mogħdijiet legali għall-protezzjoni fl-UE: il-promozzjoni tar-risistemazzjoni, l-ammissjoni umanitarja u mogħdijiet komplementari oħra (Kummissjoni Ewropea, 23 ta' Settembru 2020)

Flussi migratorji legali oħra

Studenti u riċerkaturi

Fl-2016, l-UE adottat direttiva li tistabbilixxi l-kondizzjonijiet ta' dħul u residenza ta' ċittadini ta' pajjiżi terzi għall-finijiet ta' riċerka, studji, taħriġ, servizz volontarju, skemi ta' skambju ta' skulari jew proġetti edukattivi u au pairing.

Dawn ir-regoli jgħinu biex:

• l-UE tiġi promossa bħala ċentru dinji ta' eċċellenza
• l-UE tavvanza fil-kompetizzjoni globali għat-talent u t-tmexxija
• tiżdied il-kompetittività ġenerali u r-rati ta' tkabbir tal-UE
• jiġu promossi l-ġenerazzjoni u l-kisba tal-għarfien u l-ħiliet
• tiġi żviluppata s-solidarjetà u isir kontribut għal koeżjoni soċjali aktar b'saħħitha
• isir kontribut għall-arrikkiment reċiproku u l-familjarità ma' kulturi oħra

• Direttiva dwar il-kundizzjonijiet ta' dħul u residenza ta' ċittadini ta' pajjiżi terzi għall-finijiet ta' riċerka, studji, taħriġ, servizz volontarju, skemi ta' skambju ta' skulari jew proġetti edukattivi u au pairing (leġiżlazzjoni tal-UE)

Barra minn hekk, l-UE tippromwovi l-mobbiltà tal-istudenti, ir-riċerkaturi u l-intraprendituri permezz tal-programm Erasmus+ tagħha, li għandu baġit stmat ta' €26.2 biljun. Dan huwa kważi d-doppju tal-finanzjament għall-programm predeċessur tiegħu (2014–2020). Il-programm għall-2021-2027 jenfasizza b'mod qawwi l-inklużjoni soċjali, it-tranżizzjoni ekoloġika u dik diġitali, u l-promozzjoni tal-parteċipazzjoni taż-żgħażagħ fil-ħajja demokratika.

• Il-Programm Erasmus+

Ħaddiema staġonali

L-ekonomija tal-UE tiddependi minn għadd kbir ta' ħaddiema staġonali li jiġu minn barra l-UE peress li għaddejja minn nuqqas dejjem jikber ta' ħaddiema.

Il-Kunsill u l-Parlament adottaw id-direttiva dwar il-ħaddiema staġonali fl-2014. Din tiddeskrivi l-kondizzjonijiet li bihom iċ-ċittadini mhux tal-UE jistgħu jidħlu u joqogħdu fl-UE bħala ħaddiema staġonali.

Dawn ir-regoli jgħinu biex:

• jiġu armonizzati u simplifikati r-regoli tal-ammissjoni fl-istati membri kollha
• jitħarsu l-ħaddiema staġonali mhux tal-UE mill-isfruttament u l-kondizzjonijiet tax-xogħol ħżiena
• tiġi indirizzata l-problema tal-ħaddiema staġonali mhux tal-UE li jibqgħu b'mod irregolari fl-UE

• Direttiva dwar il-kondizzjonijiet għad-dħul u s-soġġorn ta' ċittadini ta' pajjiżi terzi għall-fini ta' impjieg bħala ħaddiema staġjonali (leġiżlazzjoni tal-UE)

Trasferimenti intraazjendali

Fl-2014, il-Kunsill u l-Parlament adottaw direttiva dwar il-kondizzjonijiet għad-dħul u r-residenza ta' ċittadini ta' pajjiżi terzi fil-qafas ta' trasferiment intraazjendali.

Bis-saħħa ta' dawn ir-regoli ġodda ċ-ċittadini mhux tal-UE jistgħu japplikaw biex jiġu ammessi fl-UE bħala maniġers, speċjalisti jew impjegati trainees fil-qafas ta' trasferiment intraazjendali.

• Direttiva dwar il-kondizzjonijiet għad-dħul u r-residenza ta' ċittadini ta' pajjiż terz fil-qafas ta' trasferiment intra-azjendali (leġiżlazzjoni tal-UE)

Riunifikazzjoni tal-familja

Ir-riunifikazzjoni tal-familja tippermetti lil dawk li jirrisjedu legalment fl-UE li jingħaqdu mal-membri tal-familja tagħhom. Din tgħin liċ-ċittadini mhux tal-UE jintegraw aħjar fis-soċjetà.

Ir-regoli tal-UE dwar ir-riunifikazzjoni tal-familja huma stabbiliti fid-direttiva dwar id-dritt għar-riunifikazzjoni tal-familja, li tistabbilixxi regoli komuni għall-eżerċitar tad-dritt għar-riunifikazzjoni tal-familja fl-UE (bl-eċċezzjoni tal-Irlanda u d-Danimarka).

• Riunifikazzjoni tal-familja (Kummissjoni Ewropea)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN

Persuni li jfittxu ażil

Is-sistema Ewropea komuni tal-ażil (SEKA) tistabbilixxi standards minimi komuni għat-trattament tal-persuni li jfittxu ażil. Fil-prattika, il-persuni li jfittxu ażil mhumiex trattati b'mod uniformi u r-rati ta' rikonoxximent ivarjaw minn stat membru għal ieħor.

B'riżultat ta' dan, ħafna persuni li jfittxu ażil jiċċaqilqu fl-UE biex ifittxu l-aħjar pajjiż fejn japplikaw għall-ażil. Dan il-fenomenu huwa magħruf bħala "shopping għal ażil".

Il-kriżi tal-migrazzjoni aggravat din il-kwistjoni u enfasizzat il-ħtieġa għal armonizzazzjoni mtejba tal-proċeduri u l-istandards għall-ażil.

• Patt dwar il-migrazzjoni u l-ażil
• Patt ġdid dwar il-migrazzjoni u l-ażil (Kummissjoni Ewropea)
• Il-Kunsill u l-Parlament Ewropew jagħmlu pass importanti fir-riforma tas-sistema tal-ażil u l-migrazzjoni tal-UE (stqarrija għall-istampa, 20 ta' Diċembru 2023)

Politika ta' ritorn u ftehimiet ta' riammissjoni

Il-politika ta' ritorn tal-UE hija bbażata fuq id-direttiva dwar ir-ritorn. Din id-direttiva tistabbilixxi regoli ċari, trasparenti u ġusti għar-ritorn taċ-ċittadini mhux tal-UE li jirrisjedu illegalment.

Id-direttiva tenfasizza wkoll il-ħtieġa li jiġu konklużi ftehimiet ta' riammissjoni ma' pajjiżi terzi. Dawn il-ftehimiet huma kruċjali għall-implimentazzjoni tal-politika ta' ritorn tal-UE, li tistabbilixxi r-regoli għar-ritorn ta' persuni li jirrisjedu illegalment fl-UE lejn il-pajjiż ta' oriġini tagħhom.

L-UE tinnegozja u tikkonkludi ftehimiet ta' riammissjoni ma' pajjiżi terzi. Il-Kunsill jagħti mandat lill-Kummissjoni biex tinnegozja ftehimiet bħal dawn ma' pajjiżi terzi speċifiċi.

L-UE issa kkonkludiet 18-il ftehim ta' riammissjoni. Il-ftehim ta' Cotonou (il-qafas tal-UE għar-relazzjonijiet ma' 79 pajjiż Afrikan, tal-Karibew u tal-Paċifiku) jinkludi wkoll dispożizzjoni dwar ir-ritorn ta' migranti irregolari lejn il-pajjiż ta' oriġini tagħhom.

Minbarra l-ftehimiet ta' riammissjoni, l-UE kkonkludiet ukoll arranġamenti ta' ritorn ma' xi pajjiżi terzi bl-istess objettiv.

Il-Kunsill Ewropew u l-Kunsill regolarment jenfasizzaw il-ħtieġa li tissaħħaħ u tittejjeb l-effettività tal-politika tal-UE dwar ir-ritorn u r-riammissjoni, permezz tal-implimentazzjoni sħiħa tal-ftehimiet ta' riammissjoni u l-arranġamenti ta' ritorn eżistenti u l-konklużjoni ta' arranġamenti ġodda.

F'Settembru 2018, il-Kummissjoni pproponiet riforma tar-regoli komuni tal-UE dwar ir-ritorn. Il-bidliet proposti għandhom l-għan li jagħmlu r-regoli eżistenti aktar effettivi. Fis-7 ta' Ġunju 2019, il-Kunsill laħaq qbil dwar il-pożizzjoni tiegħu rigward regoli ġodda biex titjieb l-effettività tar-ritorni.

• Il-Kunsill u l-Parlament jilħqu ftehim dwar ir-ritorn ta' ċittadini ta' pajjiżi terzi b'soġġorn illegali
• Il-Kunsill jilħaq ftehim dwar il-liġi tal-UE dwar ir-ritorn ta' ċittadini ta' pajjiżi terzi b'soġġorn illegali (8 ta' Diċembru 2025)
• Politika dwar il-migrazzjoni: il-Kunsill jaqbel dwar pożizzjoni ta' negozjar parzjali rigward id-direttiva dwar ir-ritorn (stqarrija għall-istampa, 7 ta' Ġunju 2019)