Físchomhdháil na n-airí gnóthaí baile, 13 Samhain 2020

Na príomhthorthaí

An sceimhlitheoireacht a chomhrac

Nuair a oibríonn an Eoraip as láimh a chéile chun an sceimhlitheoireacht agus an t-antoisceachas a chomhrac, is geall le sárchumhacht í. Ghlac na Ballstáit uile an dearbhú maidir leis na hionsaithe sceimhlitheoireachta is déanaí. Tugann sé sin comhartha láidir dlúthpháirtíochta. Ó thaobh an sceimhlitheoireacht agus an t-antoisceachas a chomhrac, ar comhrac fadtéarmach, gan staonadh é, seasann an Eoraip gualainn le gualainn. Horst Seehofer, Aire Cónaidhme Gnóthaí Baile, Foirgníochta agus Pobail na Gearmáine

Tar éis na n-ionsaithe sceimhlitheoireachta le déanaí, d'fhéach na hairí an bhféadfaí iarrachtaí comhpháirteacha an Aontais i gcoinne na sceimhlitheoireachta a neartú a thuilleadh agus d'eisigh siad ráiteas comhpháirteach.

• Ráiteas comhpháirteach ó airí gnóthaí baile an Aontais maidir leis na hionsaithe sceimhlitheoireachta a rinneadh le déanaí san Eoraip (preaseisiúint, an 13 Samhain 2020)

Sa ráiteas, athdhearbhaíonn na hairí go bhfuil rún daingean acu luachanna coiteanna an Aontais a chosaint agus cur i gcoinne na sceimhlitheoireachta barbaraí sin ar bhealach iomlánaíoch. Meabhraíonn siad na bearta a rinneadh le scór bliain anuas agus leagtar béim ar roinnt gníomhaíochtaí ar cheart dul ar aghaidh leo, mar shampla i réimsí na saoirse reiligiúnaí agus an chomhtháthaithe shóisialta, slándáil agus feidhmiú limistéir Schengen a threisiú, slándáil a áirithiú, an radacú ar líne agus as líne a chosc, faisnéis a mhalartú maidir le daoine ar bagairt sceimhlitheoireachta nó bagairt foréigin antoiscigh iad, trodaithe eachtracha sceimhlitheoireachta, ailtireacht faisnéise athnuaite an Aontais agus spásanna poiblí a chosaint.

• An fhreagairt ar bhagairt na sceimhlitheoireachta (eolas cúlra)

An comhshocrú um imirce agus tearmann

Phléigh na hairí na tograí ón gCoimisiún le haghaidh comhshocraithe um imirce agus um thearmann. Bhí díospóireacht bheartais acu maidir le príomhghnéithe an chomhshocraithe, lena n-áirítear an ghné sheachtrach, an chéim réamhiontrála atá á beartú, an sásra dlúthpháirtíochta, an imirce inmheánach agus an bainistiú tearmainn, modhanna éagsúla chun an filleadh a fheabhsú, ról na ngníomhaireachtaí, bealaí dlíthiúla chun teacht isteach san Eoraip agus an lánpháirtiú.

Leanfar den scrúdú ar an gcomhshocrú ar an leibhéal teicniúil, agus meastar go bhfillfidh na hairí ar na príomhghnéithe arís ag an gcruinniú a bheidh acu i mí na Nollag.

• An comhshocrú nua um imirce agus um thearmann (an Coimisiún Eorpach)
• An tslí a mbainistíonn an tAontas sreabha imirce (eolas cúlra)
• Sreabha imirce (grafaic faisnéise)