Tranżizzjoni diġitali: insawru l-futur diġitali tal-UE
It-tranżizzjoni diġitali hija kruċjali għat-tkabbir ekonomiku u l-awtonomija strateġika tal-UE. L-UE trid tiżgura li l-Ewropa taħtaf bis-sħiħ l-opportunitajiet offruti mid-deċennju diġitali.
Diġitalizzazzjoni: opportunitajiet u riskji
It-teknoloġiji diġitali qed jittrasformaw il-ħajja tan-nies - mill-mod kif nikkomunikaw għal kif ngħixu u naħdmu.
Id-diġitalizzazzjoni għandha l-potenzjal li tipprovdi soluzzjonijiet għal ħafna mill-isfidi li l-Ewropa u l-Ewropej għandhom quddiemhom u toffri opportunitajiet bħal:
- il-ħolqien tal-impjiegi
- l-avvanz tal-edukazzjoni
- spinta lill-kompetittività u l-innovazzjoni
- il-ġlieda kontra t-tibdil fil-klima u l-iffaċilitar ta' tranżizzjoni ekoloġika
Id-diġitalizzazzjoni għandha rwol essenzjali għas-soċjetà, il-prosperità u l-innovazzjoni. Madankollu, it-teknoloġiji diġitali ma joffrux biss benefiċċji u opportunitajiet, iżda joħolqu wkoll sfidi u riskji ġodda. Il-kriżi tal-COVID-19, pereżempju, enfasizzat id-distakki diġitali persistenti fl-Ewropa – mhux biss bejn żoni konnessi sew u territorji remoti, iżda wkoll bejn in-nies u n-negozji li jistgħu jibbenefikaw bis-sħiħ mill-ispazju diġitali u dawk li ma jistgħux.
Biex is-soċjetajiet u l-ekonomiji tagħna jkunu adattati għall-era diġitali, l-UE hija impenjata li toħloq spazju diġitali sikur għaċ-ċittadini u għan-negozji b'mod li jkun inklużiv u aċċessibbli għal kulħadd. Dan ifisser li tippermetti trasformazzjoni diġitali li tħares il-valuri tal-UE u tipproteġi d-drittijiet fundamentali u s-sigurtà taċ-ċittadini, filwaqt li ssaħħaħ ukoll is-sovranità diġitali tal-Ewropa.
Għal dan il-għan, jeħtieġ li l-UE:
- tindirizza kwistjonijiet li jfixklu t-trasformazzjoni diġitali (bħan-nuqqas ta' ħiliet, in-nuqqas ta' infrastrutturi u d-diġitalizzazzjoni kajmana tas-setturi pubbliċi u privati)
- tnaqqas id-dipendenza tagħha fuq reġjuni oħra għal kapaċitajiet diġitali ewlenin
- iżżid l-investiment fit-teknoloġiji diġitali
- tippromwovi l-konverġenza fost l-istati membri
- toħloq sinerġiji bejn it-tranżizzjoni ekoloġika u dik diġitali
Programm dwar id-deċennju diġitali
Il-"perkors għad-deċennju diġitali" huwa programm ta' politika tal-UE għat-trasformazzjoni diġitali. Il-programm huwa strutturat fuq erba' oqsma:
- il-ħiliet diġitali
- it-trasformazzjoni diġitali tan-negozji
- l-infrastrutturi diġitali siguri u sostenibbli
- id-diġitalizzazzjoni tas-servizzi pubbliċi
Il-programm ta' politika dwar id-deċennju diġitali jistabbilixxi miri u stadji importanti diġitali speċifiċi li għandhom jintlaħqu sal-2030. Biex jintlaħqu dawn l-objettivi, dan jinkludi ċiklu ta' kooperazzjoni annwali li jinvolvi lill-Kummissjoni Ewropea u lill-istati membri, kif ukoll mekkaniżmu ta' monitoraġġ.
Il-programm jiddependi ħafna fuq proġetti fuq skala kbira li jippermettu lill-istati membri jikkontribwixxu r-riżorsi tagħhom u jaħdmu flimkien mill-qrib biex jibnu kapaċitajiet diġitali li ma setgħux jiżviluppaw waħedhom.
Dawn il-proġetti bl-involviment ta' diversi pajjiżi jiffaċilitaw l-investimenti f'oqsma bħal:
- l-infrastruttura komuni tad-data
- l-implimentazzjoni ta' kurituri 5G
- il-computing ta' prestazzjoni għolja
- l-infrastruttura tas-servizzi blockchain
- l-amministrazzjoni pubblika diġitali
- is-sħubijiet ta' teknoloġija avvanzata għall-ħiliet diġitali
Adozzjoni tal-programm ta' politika dwar id-deċennju diġitali
F'Marzu 2021, il-Kummissjoni ppreżentat komunikazzjoni dwar il-"kumpass diġitali" li jistabbilixxi viżjoni u miri għat-trawwim tad-diġitalizzazzjoni fl-UE sal-2030. Dan jiddeskrivi l-ambizzjoni tal-UE li tkun diġitalment sovrana f'dinja miftuħa u interkonnessa, u li ssegwi politiki diġitali li jippermettu lin-nies u lin-negozji li jsawru futur diġitali ċċentrat fuq il-bniedem, inklużiv, sostenibbli u prosperu.
Il-Kumpass jinkludi proposta għal deċiżjoni tal-Parlament Ewropew u tal-Kunsill biex jiġi stabbilit programm ta' politika tal-UE li jistabbilixxi l-qafas ta' governanza biex jintlaħqu l-objettivi diġitali għall-2030.
Fil-25 ta' Marzu 2021, il-mexxejja tal-UE enfasizzaw il-ħtieġa li tissaħħaħ is-sovranità diġitali tal-UE b'mod awtonomu u miftuħ u stiednu lill-Kunsill jeżamina malajr il-kumpass diġitali bil-ħsieb li jħejji l-programm ta' politika diġitali previst. Huma stiednu wkoll lill-Kummissjoni tidentifika aktar sistemi ta' teknoloġiji kritiċi u setturi strateġiċi addizzjonali, u twessa' s-sett ta' għodod tal-UE għat-trasformazzjoni diġitali.
Bi tweġiba għal dan, il-Kummissjoni pproponiet il-programm ta' politika diġitali "Perkors għad-Deċennju Diġitali" f'Settembru 2021. Il-Kunsill adotta l-programm fit-8 ta' Diċembru 2022.
Ara wkoll
L-aħħar reviżjoni: 11 ta' Novembru 2025